16
God Israel lam i verei
1 Anina ma mai Israel Elim i netawanei ma i nae au mutulua wavana Sin, wei dobuna lamna Elim ma Sinai au poui. Egypt i opu-tawanei nawaravi tagogi ma wiki ruaḡa i kwa ma wei au dobuna i ḡeta.
2 Mai Israel Moses ma Aaron awarii i ḡaiḡaiawa.
3 Ma i riwei, “Bada boiboḡi au Egypt ita viraḡeniai! Kampa sia nauii a kiala kwaviviroi ma ai ḡoanei a amam, wate taumi o taravaina-opunelai au mutulua da am-iraḡe ana iraḡelei.”
4 Anina ma Bada Moses i riwei, “Lam marei ana paritawana-ḡaireiai me garewa. Au pom patapatana rava ina opu ma lam au pom tagogi ruvana ava ina vaia. Wei taunei rava ana raudadani da riwau bagibagina ina voteletelei bo eḡa.”
5 Au pom vi-6-na au pom ruaḡa ruvana ina tami da ina vokaukauei.
11 Bada Moses i riwei,
12 “Mai Israel ai ḡaiawa a nonori. Ma riwei, ‘Raviraviai taumi sia ona ani, ma ubaubanai lam ona maurei.’ Ma lamna maranai ona aramanei da Tau Bada ami God.”
13 Raviraviai kiu iviki boruna i nei da taui i maemae lana gabuna i vioai. Ma ubaubanai ḡelauna doa anatapuna turuvani i vioai.
14 Maranai turuvani i paira ma purapura avavai me palawa nanare doa au tepana i mae.
15 Maranai mai Israel wei purapurai i ʼnanai ma i vinuanaina ma i vitara-viravira vivira i pa, “Wei aiwai?”
Ma Moses rava i riwei, “Wei aniam Bada i veremi.”
16 Bada riwana bagibagina lamna wei, “Rava tagogi lam ana au ruva ina tuarui. Nau muomuoi ruaḡa ruvana ona tuarui, rava tagogi au numa aubaina.”
17 Aiwai i ririweia nanare mai Israel i kauei, ḡelaui ruva ḡaeḡaena i tami ma ḡelaui ruva aburuna i vaia.
18 Wate maranai i ruvai ma i ʼnanai da rava anatapui ruva i vaia da tagotagogina, Taui da ruva ḡaeḡaena i tami eḡa aiwai ita mae-terei ma taui da aburuna i tami ma i nelaḡai da lamna tagotagogina taui aubaii. Numa nununai ravai lam ruvaruvana i vaia.
19 Anina ma Moses i riwa, “Eḡa aiai lam ina tereriei da au maratom aubaina.”
20 Wate rava ḡelaui Moses eḡa ita rautaniḡanei ma lam ḡelaui i tereriei ma ubaubanai motamota lam i oai ma i bova, ma Moses amlona i ḡaiḡai taui awarii.
21 Ubaubanai patapatana taui lam ai au ruva i tuarui, ma maranai madeḡa i vibola ma lam i viwaira da i amoa.
22 Ma au pom vi-6-na taui au pom ruaḡa ruvana nanare i tuarui, ma melagai babadai i nei da Moses i pariverei.
23 Moses taui i riwei, “Bada riwa bagibaginei wenanare i riwa, ‘Maratom lauvitau vivireina Sabate ana mara, Tau aubaiu. Aiwai apuna o ḡoeḡoeia amadodo ona apui ma aiwai vitavana o ḡoeḡoei amadodo ona vitavi. Ma aiwai i mae-terei, ona tereriei au maratom aubaina.”
24 Ma taui lam i tereriei ma eḡa ita bova ma ita motamota me Moses i ririwa nanare,
25 Moses i riwa, “Wei lamna amadodo ona ani, aubaina amadodo Sabate, lauvitau ana mara vivivireina i terei Bada aubaina. Ma amadodo amapo lam au doa eḡa ona nelaḡai.
26 Au pom 6 lam ona tuarui, wate au pom vi-7-na Sabate, amapo lam eḡa ona nelaḡai.”
27 Ma au pom vi-7-na rava ḡelaui i opu da lam ita tuarui wate eḡa aiwai ita nelaḡai.
28 Anina ma Bada, Moses i riwei da rava i riwei i pa, “Mara biaḡa au tarawatu ma au viararamana ona rau-aḡaiḡaiei?
29 Ona notai da Tau Bada, Sabate a veremi, ma au pom vi-6-na lam a veremi da au pom ruaḡa aubaina. Ma rava anatapui au numa ita mae ma avena ita opu.”
30 Ma au pom vi-7-na rava i vilauvitau.
31 Rava mai Israel wei lamna i ḡorei “manna.”
35 Ma mai Israel manna i amam da madeḡa 40 i kwa. Taui manna i amam da Canaan ana au parata i ḡeta.