3
Moses kampa mai Midian ai pirisi pulo tauapuna maiteni i mae, ma natuna Zippora i ravaḡi.
God Moses awarina i babani
Moses poiana Jethro ana sipu ma gote i ḡamoḡamoi - Jethro lamna mai Midian ai pirisi pulo tauapuna. Mara tagogi Moses ḡamoḡamo i naiei au mutulua au gia dewadewana ma au Sinai i ḡeta, God ana au ola. Kampa Bada ana anela Moses awarina i eḡa, inanana me ai menamenana, ai rugurugui au orana da i ḡeḡae. Moses ai i lebalebara i ʼnanai wate aina ruguruguna maiteni eḡa ita ararai. Moses i vinua-notanota, “Wei lamna aiwai? Aiwai aubaina ai e lebalebara wate ai eḡa ita ararai? Ana nae au ḡereḡerena ma ana tuvirevirei.”
Maranai Bada i ʼnanai da Moses i nenei au ḡereḡere da ita tuvirevirei, God ai menamenana au orana Moses i ḡorei, “Moses! Moses!”
Ma i paribelei, “Ee, Tau weka.”
Bada i riwa, “Eḡa ma neguratanai. Wei gabuna au tepana e maimairi lamna doa vivivireina, lamna aubaina am ae uma ma votawanei. Tau amamam Abraham ma Isaac ma Jacob ai God.” Maranai Moses wei babanina i nonori i rovo kaua ma naona i tere-govaḡi da avena God naona ita inanai.
Anina ma Bada i riwa, “A inanai menanare mai Egypt natunatu e rarau-iviapoapoelei. Ma ai tou agu aubaina i ḡetai awariu da vibadabadai awarii ata vaitawanei. Menanare e vinua-apoapoenei a aramanei. Lamna aubaina a ḡairai da natunatu Egypt awari ana vaitawanei ma ana opunei da dobu wapuna ḡaeḡaena ma doana maumaurana ina maeni. Kampa marina mai Canaan, mai Hitti, mai Amori, mai Perisi, mai Hivi ma mai Jebus e mamae. Ai tou a nonori. A inanai menanare mai Egypt taui e rarau-iviapoapoelei. 10 Tau a paripari-tawanem, marina ma nae vibadabadana Pharaoh awarina da mai Israel au Egypt ma taravaina-opunei.”
11 Wate Moses i riwa, “Tau aiai da ata nae Pharaoh awarina ma mai Israel ata taravaina-opunei?”
12 Ma God i paribelei, “Tau tam maiteni ana mae. Maranai ravai Egyptei ma taravaina-opunei. Taumi wei au olana ona rauduneleu. Lamna ina vimataira da Tau a pari-tawanem.”
13 Wate Moses i riwa, “Maranai ana nae au rava awarii ma ana riwei, ‘Amamata ai God i paritawaneu awarimi.’ Ma taui ina paridadaneu, ‘Tauna wavana aiai?’ Ma aiwai ana riwei?”
14 God Moses i riwei, “Tau maemae-nonoau.* Wei mai Israel ma riwei, Tauna wavana, Tau Maemae Nonoau. i paritawaneu awarimi. 15 Mai Israel ma riwei, ‘Tau Bada, amamami ai God, Abraham, Isaac ma Jacob ai God, tauna i paritawaneu awarimi.’
—Wei Tau wavau Maemae-Nonoana, kimta anatapui wenanare wavau ina ḡorei.”
Wei au murina Moses i naeme poiana ana au dobu, ma i nae au Egypt. Ma kaua anatapui i tuputupua tuana Aaron ma Israel babadai i riwei. Ma Moses ma Aaron i nae Pharaoh awarina ma i riwei, “Bada i paritawaneiai awarim da ata riwem da natunatuna mai Israel ma vianinei da ina opu au mutulua da pulo ina apui tauna awarina.”
Egypt gulauna i riwa, “Tau eḡa ana vianinei da nanare ina kauei. Taui eḡa aiwai ḡelauna ina kauei ma ina nola.”
Ma God kaua maḡamaḡauna aniba ma viʼnirovorovoi i kaukauei mai Egypt awarii, wate Egypt ai gulau amapo da i viviḡa. Waira i vitara wate amapo da Egypt ai gulau kolana i vobagibagi. Mai Egypt ai ḡamoḡamo i viʼrairaḡelana ma mai Egypt tupuai paramaitua i oai, Wate amapo da mai Egypt ai gulau eḡa mai Israel ita voterei da ita nae.
3:2 Act 7:30-34 * 3:14 Pona Hebrewei, Tau maemae-nonoau nonorana me Yahweh. Vipanipani au Babilon i kwa ma mai Jew i nememei au murina, taui i vitumaḡana da wava Yahweh lamna vivivireina ma eḡa aiai ina latoni. Aubaina da ai au buka giruma ḡaeḡaei wei wavana i girumi da eḡa melanai ina latoni ma Adonai (bada) i latolatoni epaiana. Ma riwa Bada muomuonei i girumi lamna God wavana.