12
Bada, Abram i kwatuei
1 Bada Abram i riwei i pa, “Am dobu, am rava ma amam ana dam ravai ma netawanei ma ma nae dobu ana viatataiem kampa ma mae.
2 Ma am epaepaia ai dam ana viratai,
ma ana viaiainim,
ma ana kauei da wavam ina rata,
ma tamei viaiaina ina nei rava awarii.
3 Ma aiai i viaiainim, tau ana viaiaini,
ma aiai i parivai-apoapoenim, tauna ana parivai-apoapoeni,
ma tamei dam anatapui au dobu ana viaiaini.”
4-5 Ma Bada i ririweia nanare, Abram awana Sarai ma maiana Lot Haran i opu-tawanei, Abram ana madeḡa 75. Ai purapura, ai ḡamoḡamo ma ai laralaraga ma i vomairi Canaan aubaina.
6 I ḡeta Canaan ana au parata ma i verautua da au gabu vinevinena, Shekem melagaina ḡaeḡaena au ririvana. Ma kampa au Moreh ai ḡaeḡaena au ḡouna i rauḡaravu. (Nai maranaina mai Canaan, nai au dobuna i mamae.)
7 Kampa Bada i viatataeana-melei ma i riwa i pa, “Wei dobuna Canaan am epaepaia ana verei.” Ma Abram pulo aniapuna, i voai Bada awarina ma pulo i apui. Mepa Bada i viatataeana-melei lamna au gabuna aniamapu i voai.