18
Nelara tonuḡa i nei Abraham awarina.
1 Au benai Abraham ana numagara au metaetana i kiakiala.
2 I taepai ma nelara tonuḡa i ʼnanai i maimairi. Maranai i ʼnananai i ruba da au naoi i mae-ḡaira ma i raudune.
3 Ma i riwa i pa, “Au bada. Mepa da u notai da tau anina, eḡa ma tutelareu.
4 Waira ana neiai da aemi ana oḡai ma ona vilauvitau ai au ḡouna.
5 Lam ana veremi da ina vovai-virewapanimi ma muriai ona vaḡai. Taumi o notaiu da o nei.”
Taui i paribelei, “Anina u ririweia ma kauei.”
6 Anina ma Abraham laḡilaḡina i nae au numagara ma Sarah i riwei i pa, “Laḡilaḡina, am palawa aiaina baikena ma vaia ma palawa ma apui.”
7 Ma i ruba ma bulumakau orotona ḡaubona i vaia da ana taunola i verei ma i vokaukauei.
8 Anina ma Palawa ma mereki ma mereki ravi taputapui ma sia i neiai taui awarii au ḡou da i am ma tauna i mae-paini.
9 Taui i paridadana i pa, “Awam Sarah mepa?”
Tauna i paribelei i pa, “Tauna numagara au orana.”
10 Taui tagogi Abraham i riwei i pa, “Riwa kaua da wei au marana nanare madeḡa au ḡelauna ana nenememei, lamna awam Sarah tevera orotona ina ḡuni.”
Ma Sarah, ravai au muri numagara au metaetana, i rarautaniḡana.
11 Sarah ma Abraham i magura kaua ma Sarah ana vinatuna ana mara i kwa.
12 Sarah i mutu-kaka ma i riwana-melei, “Tau ma awau a magura kaua ma au vinatuna ana mara i kwa. Ma amapo tagotagogina da duama ana morelanei bo?”
13 Bada Abraham i paridadanei i pa, “Aiwai aubaina Sarah i kaka ma i riwa, ‘Tau a magura kaua ma riwa kaua da ana vinatuna bo?’
14 Aiwai i piripiri guratana Bada au matana? Me a ririwem nanare, ana nememei awarim wei marana nanare madeḡa au ḡelauna ma awam Sarah tevera orotona ina ḡuni.”
15 Sarah i rovo ma i bovi ma i riwa i pa, “Tau eḡa ata kaka.”
Tauna i paribelana i pa, “Eḡa! Tam u kaka.”
Sodom ana virarautua
16 Maranai nelara tonuḡa i vomairi da ita nae, Abraham taui maiteni i nae da au etanai ita tuterei. Ma taui i ʼnana ḡaira au Sodom,
17-19 ma Bada ana au nota i pa, “Aiwai marina ana kauei, eḡa ana tere-govaḡi Abraham awarina. Abraham ana epaepaia ina vidam ḡaeḡaena ma vivirewapanana ma taunei dam anatapui au dobu ana viaiaini. Tauna a vinei da natunatuna ina riwei ma taui natunatui ina riwei da Bada ana lawana ina votaḡotaḡoi da aiaina ma jijimanina, ina kaukauei da tau Abraham a paripari-vainuaḡania ana kauei.”
20 Ma Bada Abraham i riwei, “Tau, vikaruwaḡawaḡa maḡamaḡaui a nonori da Sodom ma Gomorah melagaii ravai ai ḡoʼapoapoe i rata guratana.
21 A ḡaiḡaira da ana inanai da wei vikaruwaḡawaḡana riwa kaua bo eḡa.”
22 Bada Abraham maiteni i maimairi ma nelara ruaḡa i nae au Sodom.
23 Abraham i nei Bada awarina ma i riwa i pa, “Riwa kaua da rava aiaii ma vipupui rava apoapoei maiteni?
24 Mepa da rava aiaii 50 au melagai, amapo melagaina ma vipupui bo? Ma rava 50 notaiei ma melagaina eḡa ma vipupui?
25 Lamna eḡa ita ai, ma eḡa ma kauei. Tam eḡa rava aiaii ma viraḡeni rava apoapoei maiteni. Nai kauai e kaukauei rava aiaii awarii, kauana tagogina rava apoapoei awarii e kaukauei, eḡateni! Tam rava anatapui au dobu tauetareina ma ma etarana-kauelai tapa?”
26 Bada i riwa i pa, “Mepa da rava 50 aiaii ana nelaḡai au Sodom, dobuna ana voterei taui ai ḡoʼaiaii aubaina.”
27 Abraham i paribelei i pa, “Au Bada tau am molaka, wate tau wei babanina a vikarei aubaina amapo ana paridadana me.
28 Mepa da rava 50 aiaii ma 5 ina deḡa, amapo melagaina ma vipupui bo?”
I riwa i pa, “Mepa da rava 45 kampa ana nelaḡai lamna eḡa ana vipupui.”
29 Abraham i paridadana me i pa, “Mepa da rava aiaii 40 ava kampa u nelaḡai?”
I riwa i pa, “Mepa da kampa 40, amapo eḡa ana kauei.”
30 Abraham i riwa i pa, “Au Bada, eḡa awariu ma ḡaiawa ma vianineu da ana babani me, mepa da 30 ava kampa ma nelaḡai?”
I riwa i pa, “Mepa da 30 ava ana nelaḡai, amapo eḡa ana kauei.”
31 Abraham i riwa i pa, “Tau wei babanina a vikarei, mepa da 20 ava kampa ma nelaḡai?”
I riwa i pa, “Mepa da 20 ana nelaḡai lamna, eḡa ana vipupui.”
32 Abraham i riwa i pa, “Au Bada, eḡa awariu ma ḡaiawa ma vianineu da mara tagogi ava ana babani me. Mepa da 10 kampa ma nelaḡai?”
I riwa i pa, “Mepa da 10 ana nelaḡai, amapo eḡa ana vipupui.”
33 Maranai Bada Abraham awarina i babani vorove, tauna i nae ma Abraham i nae ana au melagai.