Job
Pariverena
Rava jijimanina tagogi vinuabola apoapoei maḡamaḡaui i nenelaḡai lamna au bukana e vivirarautuei. Job ana nota ma ana rava ai nota wei nuabolai awari lamna e viviatataieta. Ana rava e notanotai da Job kaua apoapoei i kauei aubaina God, tauna e kovokovoḡi. Job i aramanei da wei eḡa riwa kaua. Tauna, God i vivitumaḡanei, wate i ḡoeḡoei da ita aramanei aiwai aubaina wei nuabolana e tuputupua. God, Job ana vinuapoapoe anona eḡa ita vieḡei, wate God ana rewapana ma ana nuaulaula i rata guratana au baina rava eḡa tagotagogina da ina aramanei aiwai e viviatataieta. Maranai i aramanei da God ana rewapana ma ana nuaulaula i rata guratana, tauna God vitaraviravirana i voterei ma i voepaepai. Wei virarautuana au damona God Job i vilawani ma natunatuna i vimaḡai ma i vimaura-melei. God Job ana rava tonuḡa i ena-guratei aubaina taui eḡa ita aramana-kauei aiwai i latolatoni ma Job i vinuapoapoe.
1
Job ana virarautua
Oroto wavana Job au Uz i mae. Tauna rava jijimana kaukauana ma ḡoʼapoapoei i geduaiei. Tauna God i vivirei ma ḡoa aiaii ava i kaukauei. Tauna natunatuna nelarai 7 ma waivinei tonuḡa, ma ana sipu 7,000; kamel 3,000; uata bullna 1,000 ma donkey waivinei 500 ma ana taunola maḡamaḡaui. Ma i vipurapura ma i maura kaua eḡa aiai ḡelauna nanare nai au dobuna, au maramatanei.
Ai mara i tereterei nanare Job natunatuna nelarai nununai ai au numa i toretorela, ma varevarei ma novunovui i rauḡoreiai ma anatapui i amam ma i umauma gogona. Aupom biaḡa nanare torela au murina, Job ubaubanai boiboḡi ina vovomairi ma natunatuna nununai ina rauḡoreiai ma epaiai ḡamoḡamo taputapuna ina apuapui Bada awarina da natunatuna ina viaiaini. Tauna i notanota da, “Mepa da roaroa i kauana-boai ma au orai God i parivaiapoapoeni.”
Satan Job ana tumaḡana i raudadani
Marina mara i ḡetai da anela au mara i ḡeta Bada awarina ma tauviwavu - Satan taui i votaḡoi da i ḡeta. Bada Satan i paridadanei, “Tam meiei e nenei?”
Satan i paribelei i pa, “Tau were ma nare a nenae ma a nenei, dobu a tetetei.”
Ma Bada i paridadana, “Au taunola Job u inanai bo eḡa? Tauna rava aiaii kaukauana, eḡa aiai ḡelauna au dobu nanare. Tauna rava jijimanina ma patupatutuna. E vivivireiu ma e paipaina-melei da eḡa kaua apoapoe ita kaukauei.”
Satan i paribelei, “Tam Job e paipaina-kauei lamna aubaina e voepaepaim! 10 Marana patapatai tauna ana numa ravai ma ana purapura e gagagaloei, ma anatapuna uranei e vovodadani e viaiaini, ma bulumakau u verei da wapuna i oai. 11 Wate uram ma viloloi ma anatapuna ḡarinei ma vaitawanei, ma au matam ina parivai apoapoenim.”
12  Bada i riwa i pa, “Anina, ana purapura anatapuna au uram a tereterei, wate eḡa tupuana aiwaina ma vodadani.” Ma Satan Bada i netawanei.
13 Mara tagogi, Job natunatuna nelarai ma waivinei i toretorela, tuai ana au numa, 14 ma taupariverena i ḡeta Job awarina ma i riwei i pa, “Am taunola burumakauei doa i uauatai ma au ḡereḡerei donkey modu i amam, 15 ma mai Sabea i ruba-ḡairai ma ḡamoḡamo anatapui i kwalei, am taunola anatapui i viraḡena-naiei, ma tau ainelau a ruba da ata pariverem.”
16 I bababani ma taupariverena ḡelauna i ḡetai ma i riwa, “Namanamara marei i ḡairai da sipu ma taupainii i viraḡena-pai, ma tau ainelau a rubai da ata paripariverem!”
17 Ravana i bababani ma taupariverena ḡelauna i ruba ḡetai ma i riwa, “Mai Caldia boru tonuḡa ana melaḡina i ḡairai ma am kamel i viaḡaḡana-naiei ma taupainii i viraḡena-pai, tau ainelau a ruba da ata paripariverem!”
18 Amapo i bababani ma wate taupariverena ḡelauna i ruba ḡetai ma i riwa, “Natunatum nelarai ma waivinei, natuevou ana au numa i toretorela, 19 ma maratagogi kojikojira mutuluei i opui ma numa i vipeuni au tepai ma anatapui i viaijijini, tau ainelau a ruba da ata pariverem!”
20 Anina ma Job i vomairi ma ana kwama i sikai. Kolana i ḡari ma i peu ḡaira au doa ma Bada i voepaepai. 21 Ma i riwa,
“Ana kovakovau a nei;
ana kovakovau ana nae.
Bada i verena ma i vai-melei;
Bada wavana ana voepaepai ma ana viborumei.”
22 Wei anatapuna au orana, Job eḡa ḡoʼapoapoe aiwaina ita kauei bo God ita viwavui.