3
Jonah i nae au Niniveh
1 Ma Bada i babani me Jonah awarina,
2 I pa, “Ma nae taon ḡaeḡaena vinualaulaunana Niniveh ma au riwa a vereverem ma pariverei.”
3 Jonah, Bada riwana i voteletelei ma i nae au Niniveh. Niniveh lamna taon ḡaeḡae otana ma aupom tonuḡa i vaia da i verautuini.
4 Jonah i vikarei nai au taona ma aupom tagogi i babara ma i jima i pa, “Aupom 40 ina kwa ma Niniveh ina pupu.”
5 Mai Niniveh Bada riwana i vitumaḡanei ma i vioga da anatapui magurina da aburuoina i vianina tagogi da ina uji ma uji garana i oteni da ina vimataira.
6 Maranai Niniveh ana gulau wei riwana i nonori, tauna ana anikiala i opu-tawanei ma ana gulau garana i ḡiḡi. Uji garana i oteni ma au lapukare i kiala.
7 Ma mai Niniveh awarii wei vinolanolana bagibagina i paritawanei tauna au wavanei. Wenanare i riwa:
Eḡa rava bo bulumakau bo sipu, aiwai ina ani bo ina umai.
8 Ma ḡamoḡamo ma rava uji garana ina oteni ma ina raupari guratana Bada awarina. Ma kaua apoapoe ma ḡoaḡai ina geduaiei.
9 Aiai i aramanei? Mepa da God nuanuana ina amviravira ma nuavainei ana meji ina vojijini da eḡa ina pupunita.
10 Maranai God inanai aiwai i kaukauei ma menanare ai kaua apoapoe i geduaiei, Tauna nuanuana i virai ma eḡa ita pupuni.