19
Elijah i ruba govaḡa au Sinai
1 Ma Ahab awana Jezebel i vibenabenamei, aiwai anatapuna Elijah i kaukauei ma menanarena Baal ana peroveta anatapui i vununaiei.
2 Ma Jezebel taupariverena i paritawanei Elijah awarina ma i pa, “Wenanarena marana au maratom, tau ana viraḡenim me au peroveta u viraḡenanei nanare. Mepa da wenanare eḡa ana kauei, a raraupari da god ina kovoḡa-kaueu bo ina viraḡeniu.”
3 Elijah i rovo ma ana lawana aubaina i ruba. I nae au Beersheba au Judah, ma kampa ana taunola i voterei.
4 Ma tauna ainelana i nae aupom au mutulua, ma i ḡeta ai brum au ḡouna ma i kiala ma i raupari da ita iraḡe. I riwa i pa, “Bada, tau malau a vai-avei. Au lawana ma vaitawanei marina, tau irairaḡeu, me noinoiu.”
5 Ma i mae-ḡaera ai brum au karena ma i matave. Ma maratagogi Bada ana anela Elijah i vodadani ma i riwa, “Ma vomairi, ma am.”
6 I ʼnana viravira ma i matamatave lana au kolanei palawa apuapunana ma waira aniuma. I am ma i uma ma i matave me.
7 Bada ana anela i nememei, i vodadani ma i riwei, “Ma vomairi ma ma am aubaina am vaḡai ina manawa guratana.”
8 Elijah i vomairi da i am ma lamnei rewapana i vaia da ina babara aupom 40 ma maratom 40 da au Sinai, Bada ana au ola i ḡeta.
9 Ma kampa i ḡeta au guba ma i matave. Wate Bada i riwa, “Elijah weka aiwai e kaukauei?”
Bada Elijah awarina i eḡa
10 Elijah i paribelei, “Oo Bada vivirewapana kaukauam, Tau mara nonoa tam a viborumem - tam ainelam. Mai Israel am parivainuaḡana bagibagina i viaigai, am pulo aniapuna i viairikarikai, ma am peroveta i viraḡena-pai, tau ainelau i votereu, ma marina i ḡoei da tau maiteni ina viraḡeniu!”
11 Bada i riwa, “Ma opu au ola ma au naoi ma mairi.”
Ma Elijah kampa i maimairi ma labu ḡaeḡaena olana i ravi, da i gunevi, wate bada eḡa nai kojikojirana au orana. Ive au murina lolo, wate Bada eḡa nai lolona au orana.
12 Lolo au murina ai araratana, wate Bada eḡa nai aina au orana. Ma ai au murina pariararava jinajinana i nonori.
13 Maranai Elijah wei i nonori ana kwama i vaia da naona i purui ma i opu guba au naona i mairi. Ma pona i riwa, “Elijah weka aiwai e kaukauei?”
14 I paribelei, “Oo Bada God, vivirewapana kaukauam, mara nonoa tam ainelam aubaim a vivilaraḡa. Wate Israel ravai am parivainuaḡana bagibagina i geduaiei, am pulo aniapuna i rikanaiei, ma am peroveta anatapui i viraḡeni. Tau ainelau a mamae. Ma marina i ḡoei da tau maiteni ina viraḡeniu.”
15 Bada i riwa, “Meiei e nenei nanare ma nae me, ma ma‑rui au mutulua Damaskas, maranai u ḡeta au taon, Hasael ma buloi, mai Syria ai gulau;
16 Nimshi natuna Jehu ma buloi Israel ai gulau, ma Shaphat natuna Elisha, ana taon Abel-Mehola ma buloi peroveta da am gabu ina vaia.
17 Aiavoi da Hasael i rovoei da e rubaruba, Jehu taui ina viraḡeni ma aiavoi da Jehu i rovoei da e rubaruba, Elisha taui ina viraḡeni!
18 Wate mai Israel ai maḡa 7,000 eḡa melanai Baal ita raudunelei bo kokoitaui ita vigia-laḡolaḡonei, ina lawana!”
Bada Elisha i kwatuei
19 Ma Elijah i nae da Shaphat natuna Elisha i viaroni doa i uauatai, bulumakau 12 ruaruaḡei ava raḡiraḡitai aniuata i taitaini ma i uauata. Elisha ana bulumakau, au murioina i nolanola. Elijah i ḡaira awarina ma ana kwama i votawanei ma Elisha i vioteni.
20 Elisha bulumakau i votere-tawanei ma Elijah i rubei, ma i riwa, “Au naona ma votereu da ana nae amau ma alou ana inanai ma ana vigia-lagolagonei ma tana nae.”
Elijah i paribelei, “Anina ma nae wate aiwai a kauei awarim ma vinuanotenotei!”
21 Ma Elisha i nae da ana bulumakau ruaḡai i viraḡeni, pawe bulumakau au uai i viaigaigai da ai i viviri da sia i apui ma rava i verei da i am. Anina ma i opu da Elijah i votagotagoi.