3
Solomon nuaulaula i vibaḡei
Solomon, Bada nuanuana i vaia ma lamna aubaina amana David ana tarawatu i vojijina-kauei. Wate kaua tagogi i kaukauana-boai lamna pulo i apuapu labalababai nai dobuna ravai ai pulo ai au aniamapuna.* Wei lamna pulo aniapuna gabuna, wavana naenaena i mae au Gibeon. Solomon i nae weka da ḡamoḡamo 1,000 i apu-tapui Bada awarina. Waguvara tagogi Bada, Solomon ana au rauboni i riwei i pa, “Aiwai e ḡoeḡoei, ma vibaḡei ma ana verem?”
Solomon i paribelei, “Bada au God, tam u tereu da amau a raviepaiai da gulau, wate tau tevera ota ma eḡa ata aramanei menanare ana vibadanei. Ma tau weka am rava u vinevineia au poui, taui i maḡa dewadewa da eḡa aniavana. Eḡa aiai ainelana tagotagogina am rava, u vinevineia ina vibadei. Lamna aubaina nuaulula ma vereu da ana aramanei metauna aiaina ma metauna apoapoena.”
 
10  Bada i vinuaiai da Solomon nuaulaula i vibaḡei. 11 Ma Solomon i riwei, “Tam eḡa lawana manamanaina bo mane, uta vibaḡei bo uta vibaḡaiu da am ḡavia ata viraḡeni. Eḡa! Tam u vibaḡaiu nuaulaula aubaina da au rava ma vibadana-kauei. 12 Aiwai u vibaḡei ana verem! Nota aiaina ma nuaulaula ana verem, eḡa me aiai ḡelauna au naona nanare bo aiai ḡelauna muriai ina vaia nanare. 13 Avena da mane ma vipurapura ma wavam vimae‑ḡaeḡaenana aubaina, eḡa uta vibaḡei, wate ana verem, da am au lawana eḡa aiai gulauna am vigulau ina votani. 14 Ma mepa da ma rautaniḡaneu ma au tarawatu ma voteletelei me amam David i kaukauei nanare, tam am lawana ina manawa.”
 
Solomon ana nuaulaula i vieḡai
16 Muriai etanai waivinei ruaḡa i ḡeta gulau awarina da tauna ai ḡaiawa ita okei. 17 Wavine tagogi i riwa, “Au bada tauai airuaḡa ai numa tagogi. Ma tau tevera orotona a vinatunei au numa, maranai noi wavinena kampa. 18 Ma aupom tonuḡa au murina wavine viruaina nanare tevera orotona i vinatunei. Eḡa aiai ḡelauna au numa anina airuaḡa ava.
19 —Ma waguvara tagogi wavine natuna i matave-jijini da i ʼraḡe. 20 Ma waguvarai au pouna i vomairi, ma natu au ririvau i matamatave i vaia. Tauna natuna irairaḡena au ririvau i vimataveni ma tau natu lawalawaina i vaia da au ririvana. 21 Ubaubanai a vomairi da natu ata viḡuḡui, lamna a baei da natu i ʼrairaḡena. Ma mara i tom kaua ma ata inana-kauei lamna eḡa tau natu.”
22 Wate wavinena ḡelauna i riwa, “Eḡa! Tau natu lawalawaina; tam natum irairaḡena.”
Ma wavine au naona i vinatuna i riwa bagibagi i pa, “Tevera irairaḡena lamna tam natum ma lawalawaina lamna tau natu! Ma nanare airuaḡa i viḡeḡae.”
23 Anina ma gulau Solomon i riwa, “Wei tauna e ririwa, ‘Tau natu lawalawaina ma tam natum irairaḡena.’ Ma noi tauna e ririwa, ‘Eḡa! Tam natum irairaḡena ma tau lawalawaina.”
24 Ma gulau i riwa, “Sod ona neiai.” Ma i neiai gulau awarina.
25 Ma i eḡara, “Tevera lawalawaina au pouna ona viailaraḡi da navanava tagogi wavine tagogi ma navanava ḡelauna wavine ḡelauna.”
26 Tevera lawalawaina alo oina, nuanuana i bola-kauei ma gulau i riwei, “Au gulau a vivibaḡaim da tevera lawalawaina noi wavinena ma verei! Eḡa ma viraḡeni!”
Wate wavinena ḡelauna i riwa, “Eḡa tam bo tau teverana tana vaia. Tevera au pouna ma viailaraḡi!”
27 Anina ma gulau ana paribelana i tere-ḡairei i pa, “Eḡa tevera ona viraḡeni ma wavine au naona i vivinatuna ona verei, tauna tevera alo oina.”
28 Maranai mai Israel Solomon ana etara riwana i nonori, marina taui Solomon ina vivirei, ma i aramanei da God, Solomon nuaulaula i verei da lawana ina tere-vaijijimani.
 
* 3:3 Eng. High placesWeka ola muomuou au tepai pulo aniapuna i voa-naiei Canaan