4
Elisha wavine Shunemei i voagui
8 Mara tagogi Elisha i nae au Shunem taon. Weka wavine manemanena i mae, ma Elisha i vibaḡa-guratei da ita mae da ita am. Ma maranai Elisha wei au dobuna e vaḡavaḡai, tauna weka i amam.
9 Wavine awana i riwei, “Aramanei da orotona weka e nenei lamna Bada ana peroveta vivivireina.
10 Ana numa aburuna au poewa tana voai ma ani matave, kepakepa, ani kiala ma rampa tana terei au orana tauna aubaina. Ma kampa ina mae maranai e nenei.”
11 Mara tagogi Elisha i nei ma i ḡae ana au numa da i rauvirai.
14 Muriai Elisha ana taunola wavana Gehasi i paridadanei, “Aiwai ana kauei wavinena aubaina.”
Ma Gehasi i paribelei, “Tauna eḡa natuna orotona ma awana i magura.”
15 Ma Elisha i riwa, “Ma ḡoreiai.” Ma Gehasi wavine i ḡoreiai ma i nei da au metaeta i raumairiei.
16 Ma Elisha wavine i riwei, “Wenanare marana madeḡa au ḡelauna tam natum orotona ma ḡuniḡuni.”
Wavine i paribelei, “Eḡa au bada. Tam peroveta ma tau am taunola, eḡa ma morui!”
17 Wate wavine i raumanawa. Ma marana wenanare madeḡana au ḡelauna wavinena natuna orotona i ḡuniḡuni, Elisha i ririweia nanare.
Elisha rava 100 i viambagibagi
42 Mara ḡelauna, oroto tagogi melagai Baal-Shalishahei i nei. Tauna nai madeḡana witina naona i labai ma palawa i apui da iavana 20. Ma witi majiḡai baikena maiteni i neiai da Elisha i verei. Elisha ana taunola i riwei, “Rava lam ma verei da ina am.”
43 Ma ana taunola i garara, “Aiwai! Wei lam eḡa tagotagogina da rava 100 tana viambagibagi?” Wate i paribelei i pa, “Bada i riwa da rava ma verei da ina am ma lam ina mae-terei.”
44 Ma lam au naoi i terei ma taui i am ma lam i mae-terei, Bada i ririweia nanare.