3
Iesu, Oroto urana irairaḡena i vilawani
(Matthew 12:9-14; Luke 6:6-11)
1 Mara ḡelauna au Sabat, Iesu i naeme au pari numana ma oroto urana irairaḡena i ʼnanai kampa i kiakiala.
2 Ma Pharisi ḡelaui i ḡoei da aiwaiei Iesu ita viwavui. Lamna aubaina i ʼnana-taḡotaḡoi da oroto ita vilawani bo eḡa au Sabat.
3 Ma Iesu, orotona i riwei, “Ma nei, au naoi ma mairi!”
4 Ma Iesu, ravai i vitara-virevirei i pa, “Sabat au marana, metauna i aii: Aiaina tana kauei bo apoapoena? Tana vilawana bo tana viraḡena? Tarawatu aiwai i riwei?” Ma anatapui i genuana.
5 Iesu ana amloḡaiḡaina i ʼnana viravira ma i ʼnanai da taui orai i bado ma nuanuana i bola-kauei. Ma orotona i riwei i pa, “Uram ma viloloi!” Ma i viloloi ma i lawana.
6 Ma Pharisi maratagogi i opu ma i nae Herod ana rava awarii ma ai oga i tarai da Iesu mena ita viraḡenanei.
Iesu, Patara awari i babani
7-8 Iesu ana tauvotaḡotaḡo maiteni, taui i netawanei ma i nae au gera da ita vilauvitau; ma mai Galili patara ḡaeḡaena i votaḡotaḡo. Rava maḡamaḡaui, Iesu aiwai i kaukaueia nolana i nonori ma mai Galili ma Judea, Jerusalem taon, Idumea ma taon ḡelaui waira Jordan taon au babagelauna, Taia taon ma Sidon taon, taui anatapui i nei Iesu awarina.
9-10 Iesu, rava maḡamaḡaui i vilawani. Ma lamna aubaina doridoriai maḡamaḡaui i viviamdudu ma i ḡoei da tauna ita vodadani. Lamna aubaina ana tauvotaḡotaḡo i riwei da waga i vokaukauei.
11 Maranai, arua-apoapoei rava au orai maemaei, Iesu i ʼnanai ma au naona i peu ma i garara, “Tam God Natuna!”
12 Ma Iesu taui i viḡaei da avena ita vieḡa da tauna aiai.
Iesu ana Apasol 12 i vinei
(Matthew 10:1-4; Luke 6:12-16)
13 Anina ma Iesu i ḡae au ola ma ana ḡoanei nanare, rava i kwatuei da awarina i ḡei.
14 Tauna, nelara 12 i vinei da maiteni ita mae ma muriai ita paritawanei da ita raugugula. Ma i ḡorei Apasol.
15 Ma i vovai-virewapani da arua-apoapoei rava au orai ina viopuni.
16 Taui i vinevinei 12 ai wava wenanare,
Simon i ḡoreḡoreia Peter
17 ma Zebedi natuna James ma ana tevera John i ḡorei Boaneges, anona waiparara natunatuna,
18 Andrew,
Philip,
Batolomeo,
Matthew,
Thomas,
James, tauna Apius natuna,
Thadeus,
Simon, tauna Ununurana,
19 ma Judas Iskariotei; tauna, Iesu tauvibenabenameina.
Rava i riwa da arua-apoapoei Iesu e vivibadei.
(Matthew 12:22-32; Luke 11:14-23; 12:10)
20 Ma Iesu ana tauvotaḡotaḡo maiteni i rui au numa. Ma patara i rieiai da taui eḡa tagotagogina da ita am.
21 Ma Iesu ana numa ravai nolana i nonori ma i riwa i pa, “Tauna i bua.” Lamna aubaina i nei da ina taravaini.
22 Tarawatu babadai ḡelaui Jerusalemei i nei ma i riwa i pa, “Arua-apoapoei, ai bada Bielsibul, Iesu au orana i rui ma lamnei arua-apoapoei e viviopuni.”
23 Lamna aubaina Iesu, wei Babadai i ḡorei ma awanainei i pa, “Satan amapo Satan eḡa ina viopuni.
24 Mepa da dobu ravai ina viḡavia vivira, lamna dobuna ita mae ava.
25 Ma nanare dam ina viḡavia vivira, nai damna ita mae ava.
26 Ma Satan ita vomairi ma ita viḡaviana-melei, amapo ita mae ava.
27 Taudanene amapo eḡa rava virewapanana ana au numa ina danene, eḡa da au naona ravana ḡuravei ina raḡini ma muriai ina danene.
28 Riwa kaua a ririwemi da God ami ḡoʼapoapoei ma ami vijiboḡa anatapui ina nota-tawanei.
29 Wate aiai da Arua Vivivireina e vivijiboḡi, God, nai ravana ana ḡoʼapoapoei eḡa melanai ina nota-tawanei ma ana ḡoʼapoapoe ina mae-nonoa.”
30 Iesu wenanare i babani, aubaina rava ḡelaui e ririwa, “Iesu au orana arua-apoapoei e mamae.”
Iesu ana dam oina
(Matthew 12:46-50; Luke 8:19-21)
31 Iesu alona ma varevareina i nei ma au doa i maimairi ma riwa i paritawanei Iesu awarina da ita nei.
32 Ma patara Iesu i kiala kwaviviroi, ma taupariverena i riwei i pa, “Alom ma novunovum ma varevareim au doa ma e ḡoeḡoem.”
33 Iesu i paribelei i pa, “Aiai alou ma aiavoi varevareiu?”
34 Anina ma taui i kiakiala i ʼnanai ma i riwa i pa, “Ona inana! Wei taui alou ma varevareiu.
35 Aiai God ana ḡoana e kaukauei, tauna alou ma novu ma vareiu.”