114
Wakutuuna Miana Israel Alimba minaaka i Mesir
114:1-8
1 Wakutuuna miana Israel alimba minaaka i Mesir,
siitumo wakutuuna siwuluna Yakub abholi lipu moposalana pogauna sumai,
2 Kawasana Opu apamembali Yuda tampana momangkilo,
tee Israel amembali tampana pamarintana.
3 Tawo Towu Lambe akamata KAWASANA OPU sabutuna apalai tee amembali amatuu,
Umala Yordan ambuli i talikuna.
4 Manga gunu apekalumpa-lumpa mboomo dumba umane,
tee manga kabumbu apekatiba-tiba mboomo anana dumba.
5 E Tawo Towu Lambe, apokia upalai?
E Umala Yordan, apokia umbuli i talikumu?
6 E manga gunu, apokia upekalumpa-lumpa mboomo dumba umane,
tee manga kabumbu, apokia upekatiba-tiba mboomo anana dumba?
7 E alamu, torendemo i aroana Kawasana Opu,
i aroana Aulataʼala isombana Yakub,
8 mopamembalina uwe alimba minaaka i nuncana bhatu sakawana amembali tampana lembokana uwe to asumpuaka miana Yahudi,
tee o bhatu dhempa amembali matana uwe.