12
Devitda kau aaknga matakut.
1 Buyambam tapa, gata na gatangamuyo. Dasingge, aminu gae gen gwaamukgau tapatu dua yuak.
Gatu aminu gae banip singgau tapatu tawamba maik. Siwan gata na dua nandutewi banip dua sikaing aminkat gatake yutnim.
2 Siakan. Aminbamda notna notna kem yanikaing.
Ita waaminu kaa wam yanike tanzit pasikaing.
3 Buyambam tapa, gata kaa wam yakainggu, gena umumso.
Gatu yamandet aminu kuut gena umumso.
4 Waaminda anzing yakaing, “Ninda wam yake sanga inanatap tasike aminbam yapbitnim.
Aminu tapatuta ninu ninindakngananga dua. Wena. Ninu maminda kakuya tasinggak?”
5 Siwan waaminda aminu kekekngana wena amin gatu sangana wena amin yaipakepukaing.
Yaipakepuke yanisapduwawa meya pake yuaing.
Siwan ngana Buyambam tapata anzing yanggak,
“Nata enake aminu meya unzing pakaingu takekan yutningge nata kakuya tasiwit,” ngang yanggak.
6 Buyambam tapatane wamu kuupbam siakan gan.
Itane wamu take siknga, unzing suu gwendu silwa ngang yanikaingu
katap gwene tapduu katau kuutmusa gatu kautdu gweyaa ngang sawan dopna wena siknga singgak binga.
7 Buyambam tapa, ninu kakuya katak pasiyo. Ninu kakuya asinggan katak pasiyo.
Asinggan asinggan gata pasiwawi wai aminda ninu dua pasiwan mainim.
8 Dasingge, tapduu aminu kuupbamda sanga waiakngae natapan takekan siwanu
wai aminda tendeknga wena yamandet sike kepi kepi sukuke tawamban sandekgak.