140
Devitda kau aaknga matakut.
1 Buyambam tapa, gata na akgatangami wai aminda dua tasiwan maiwit.
Ngan, gata na kakuya katak tasike ma kapewi amak tasikaing aminda na nutning.
2 Asingganu waakwau musiaatangu sanga waiaknga tasinangge nataaing.
Ngan, gunzitbamu waakwakga kaanga wamu aminu kunduta amningge yakaing.
3 Waamindane wamna gomokgane gena paanga siknga binga. Sike wamu amin pasiwan mainanga waamindane genaatang doke yuak.
Unzing marasinu gomou waiakngatane genane yuak kaknga binga.
4 Buyambam tapa, gata na kakuya katak tasiwinu wai amindane kekeknganata na napbitnanga dua.
Ngan, gata na wamanapmambi aminu amak tasikaingga na tasiwan pimapitde yakaingu,
nae sanga takngatu dua tasining.
5 Sike yamandet aminu waakwakga na tanggaganutnangge natake yapapna pasike kusopuknga peaing.
Ngan, yapapna wa ngwayoknga pasike yuaing.
Siwan sanga bungep binga pasike kepiapane nae kaap zong binga umukusipa tasikaing.
6 Buyambam tapa, nata anzing ganinggat,
“Ga natane Anutuna. Nata wam yanggat takngae natake gatangamuyo,” ngang ganinggat.
7 Buyambam tapa, natane Anutuna, gata na akekekake takuyak.
Ngan, amak tapduk kopatangu gata na kakuya take siknga tasinggayak kapanin. Tasiwi gwapakngane nutnanga dua sikut.
8 Buyambam tapa, gata ma kapewi sanga wai aminda tasinangge nataaingu tasiwam.
Ngan, ita waiaknga tasinangge yandekingu ma siknga kapewi tasiwam.
Sanga waaknga yamandet amin dakngakaing.
9 Gata tasiwi aminu na nutnangge natake na umupbasikaingga
wamu meya nae apik kakngae yakaingu inae apik.
10 Ngan, gata kapewi aminu kunduta katap paimu pewa iangan engatangan pimaning.
Ngan, kapewi aminu kunduta waakwau pake mumba katapatang pukuning.
Ngan, gapma buyambam dakaatang pukuke gatu dua akopning.
11 Sike gata dua kapewi sapdut wamu aminu kunduta yakaingu siakanu siwik.
Ngan, kapewi sanga waita amak tasiya aminu tawamba kake pasiwa maining.
12 Buyambam tapata aminu sangana wena akgatayamuke tapduu wam yananga gwene tasiwan wamna noman siwik ngang nataat.
Ngan, ita aminu sangae dapmakainggengu gatayaman aminu kunduta wamu yumdekan temapa yakingu take dua siwik.
13 Sike noman amindanu gatane umanda ayatangenatning.
Ngan, waaminu gatane kaine take yutning.