143
Devitda kau aaknga matakut.
1 Buyambam tapa, natane tumuk wamma gata natapiakge nataat.
Maakga tewi kwanamu nata singgatde apsok.
Ga noman siknga siwan puya noman gan asinggan pasinggayak.
Unzingge natane tumuk wamma asiknga natake gatangamuyo.
2 Gata na gikane puya aminu ma usanziwim. Wam yananga tapduk gwenen.
Dasingge, aminu tapatu gutongana wena gae kaikane nomanganu yuwiu katasiwi maiwik. Wena.
3 Natane iwanata gwa nawake naitakepu teaing.
Ita na kaautde keu zikaa siknga dakaatang napmanggak.
Siwan na aminu tupa siknga kumbuu tapatuta binga yuat.
4 Unzingge natane natdetdetna apmaiwan
meya bam siknga pake yuat.
5 Sike apmanu sanga tupa aakingge gatu nataat.
Siwan nata sanga pasikuyakge gatu puya take siknga aknga ngang pasikuyakge nataat.
6 Nata gae tumuk wam yanggat. Yake musipmaatangu gae take siknga nataat.
Unzing aminu tapatutane guyakngaatang kupia siwan yangga tangopnangge nataak binga.
7 Buyambam tapa, gata natane tumuk wamma apman natapso.
Dasingge, natane banip singgat takngana dapaknga wai sinanggenggak.
Gata naenu ma kusopuwim.
Unzing tasinggawi na kungwake gwa kumbing aminda yuaing komune kuyat.
8 Sike na gae baniu asinggat.
Unzingge tembana siknga gata tasiwi gatane butaya buyambam takngae gatuna natapit.
Na gaekan tumuk wamu ganiawa natake
gata kepi yeikngami nata ga gawambit.
9 Buyambam tapa, na gatane gepbiatang koke kusopukgat.
Kusopuwawa na iwanatane katakngane sandeke tapso.
10 Sike ga natane Anutuna.
Gata na nanindamumbi gika nataayak taknga tawambitde nataat.
Gatane Waung kapata na tanomanuwan
kepi noman tapa tawambitde nataat.
11 Buyambam tapa, gata na asiknga tapiakge gika gwa yawi kekekakut. Ga take sikngaapa.
Unzingge meya nae kwaapzang napmamban kake meya waaknga sandeke na tapso.
12 Gata nae take siknga nataayak.
Natake gata iwanaat gatu na tasiwan maikum kat zipi kumning.
Minae, na gikane puya aminda.