49
1 Ginu aminu kuupbam, natapnong.
Ginu aminu kuupbam kepna kepna yuaingga maak gwaang pake natane wamde natapnong.
2 Ginu umanza kaya aminkat umanza wena aminkat
gatu sangabamna kayaat sangana wenaat ginu wamu aaknga katak natapnong.
3 Natane genanetanu wamu musip kwikwikganekan yanggat.
Unzingge nata wamu take akngakan daniwawa natdetdet damikgen.
4 Na tuwang wamu kundu gambok daniwit.
Gatu gwameming daka tanguyuuk tuwang wamdane yapii daniwit.
5 Aminu kunduta na takumbasike tasiwa maiwitde tasikaing.
Siwan ngana nata waaminde dua gwaumbit.
6 Sike waaminda ninu moninginbam bande apme kekekanimik ngang nataaing.
Natake ninu sanganin bamban ngang wamu kaapmapa yakaing.
7 Ninu atnataamang. Aminu tapatuta notna dua kupikge natake inane moningata usinanga dua.
Aho. Ita Anutue kayuk asinggan asinggan yutnanga akngana moningga usinanga dua. Wena siknga.
8 Dasingge? Amin usinanga aknga buyana enane siknga.
Sanga wa usinanga dua.
9 Aminda Anutu dua usiwan kayuk yutnanga aknga iman
kayuu asinggan yuke dua kupik.
10 Ninu kuupbamda akaamang. Ngan, natdetdet aminu akungwakaing.
Sike yamandotdong aminkat gatu katum aminkau akungwakaing.
Waaminu kungwake moninga ba sangana ngang pewa aminu kunduta paning.
11 Tupa aminu waakwau kepna kake aminu kuupbamda keu waamindane ngang natapbing.
Siwan ngana apmanu aminda kupan kwaiya gapma yotna binga dakngawan une asinggan asinggan yutning.
12 Aminu umana kaya akwau kungwak kakngata yapbitnanga dua.
Siwan waaminu kaap zongga kungwakaing binga kumning.
13 Sanga unzing kaknga aminu baniu ineakan sike sanga panggaganukaing gekan apik.
Siwan aminu kunduta waamindane wamna take natake tawaning. Sike aminu waakwakge sanga unzing kaknga asapik.
14 Anututa waakwau sipsipda binga kungwake paku gwakumbingga yuaing komune yutningge yawan yuaing.
Siwan kungwak kakngata kuyana ita kayuwik. Tembana aminu noman nomana aminda aminu waakwau kayutning.
Sike ngana yotna take siknga apekaing gwegwen peke epanu gupna gatukande bukana sikaing.
Siwanu wa gwa kupsa aminda yuaing komune yuaing.
15 Siwan ngana Anututa na atapik. Atapan gwa kupsa aminda yuaing komune nana kekeknga akngata na tanggaganutnanga dua.
Aho. Ita na tapan naat iat gatake asinggan asinggan yutzim.
16 Sike aminu tapatu moninga kwaapzang ba siwik. Siwan yotna buyambam gwendu mitapik.
Mitake sangabamu paku undang pewik. Undanga. Ga ie nangaakan ma natapim.
17 Ga atnataayak. Masande waapa akupik. Siwan sanga tapatu dua take inaat kusan.
Sangana kuupbam dua pake akupsa aminda yuaing komune kuwik.
18 Sike tapduu kayuk yukut komunenu sangana waakwakge apbakngakut.
Ita puya kekeknga pasike sangabam pakut.
Siwan aminda yake aapa take siknga, ngang yaking.
19 Siwan ngana undanga.
Waapa akungwakengu paku bapunaat gunzitdane kakaa gatuna dua kaaing komune yutning.
20 Aminu umana kaya akwau kungwak kakngata yapbitnanga dua.
Siwan waaminu kaap zongga kungwakaing binga kumning.