75
Kau aaknga Asapda matakut.
1 Anutu, ninda gae gaak kaknga akganikamang. Akganike umanda asinggan yatangenakamang.
Yatangenake gatane umanda kopsa akngae yakapmakamang.
Aminbamda sanga inata inata take siknga gata pasikuyakge yakaing.
2 Anututa anzing yakut,
“Nata wam yaningge tapduk gwenu gwa yawa yukut.
Sike nata wa usanziwiu noman gan.
Gutonga dua siwik,” ngang yakut.
3 Siwan anzing yakut,
“Kepdakata saasitakuwan aminu une yuaingga tanggaganuwa kekeknga yuwik.
4 Nata yamandotdong aminu anzing yaninggat, ‘Ginu yamandeu ma siwam.’ Sike gatu wai aminu anzing yaninggat,
‘Ginda gisane umanza ma yapangenawam.
5 Ginu gisane kekeknga akngasae ma bakngawam.
Siwan ma yanggamatake na sapdut wamu ma naniwam.’ ”
6 Sike aminu tapatutane umana takekopnanga aminu tapatu gunzitda akonggak katang ba
gunzitda pukunggak katang ba amunggwak ba aigwak ngangu wena.
7 Anutu awiapatakan nindane yuyuknginu usanzikgak.
Itanu aminu tapatutane umana atakepuke tapatutane umana atakekonggak.
8 Sike Buyambam tapata kau gomdu wainu toknga aknga tukngwamban dopan takut.
Ita yangga waaknga wai aminu kuupbamde tukngwayaman tangopa puyuwik.
Ina unzakan wai aminu Anutue kaine siknga wamu yaning ngana, gatukande siknga wena sining.
9 Siwan ngana nata Jekopdane Anutunae umana asinggan yakapit.
Yakapmake nata kau kumzang taike umana buyambam siknga yatangenawit.
10 Sike Anututanu wai amindane kekekngana apasiwan sopuning.
Siwan ngana noman amindenu kekeknga buyambam siknga yamik.