81
Kau aaknga Asapda matakut.
1 Anutu nin gatanimunggak kapae apbakngake yatawanong.
Kap taike Anutu wa ninu Jekopde dongatane Anutuninde yatawake umana yatangenatnong.
2 Gita ba kulele zipa gakngae
noman yawan kap taknga tainong.
3 Sike tapduu buyambam gwene yekau yeik gwenda akoke
kuku yapii gwen singgak komune pum puyapnong.
4 Waaknga ninu Isrel nana amindane mama wam taknga unin.
Anutu Jekopdane apata mama wamu waaknga ninde nimukut.
5 Sike tupa Anutu amak tasinangge Isip kukut komune
mama wamu waaknga ninu Isrel nana amindane bapuninde yamukut.
Sike keu waomune nana aminda wamu yawawa natake ninda guyaknga dua natapbumang.
6 Siwan ita anzing yakut, “Nata sanga meya kuupbam gwaamnane yukingu gwa sandekum.
Siwan nata yandupewa puyatane basket gwegwena kepdakane sandepeking.
7 Sike tapduu ginu meya buyambam paking komune nae yanawaking.
Yanawamban nata gatandama ginda take yuking. Na ena kakaa gakngatda yanggakge banakan kusopuke yuat komuneta tumuk wamu yakingu natake gatandamukum.
Siwan ginda yangga gapma Meriba ngang iniking komune yuwawa nata tanziu pasikum.
8 Natane aminabam, daniwa natapnong! Nata wamu kekeknga aknga ginde gwaut wam daniwit.
Ginu Isrel amin, natane wamu ginda natapningge take siknga nataat.
9 Ginu dongu kundutane anutu pupukngana ma yawambam.
Siwan ginu anutu pupuknga tapatue munu ma puwam. Ginda munu awia apaekan putnong.
10 Nakan na Buyambam tapasa, na gindane Anutusa.
Natakan ginu Isip kep komune pake danipakapbum.
Ginu genza akngawa nata nanamu genzeetang pewit.
11 Siwan ngana natane aminabamu natane wamu natapnangge apbitaking.
Siakande siknga, Isrel nanata natane wamu tawanangge dua tasiking.
12 Unzingge nata kapewa yamandet takngana tawake tasiking.
Tasike sanga ina natapbing kakngakan tawake tasiking.
13 Sike ninane aminabamu natane wam natapningge take siknga nataat.
Siwan nata Isrel nana aminda na baniu asinggan tawaningge nataat.
14 Sike unzing tasiwanu, nata zeetgaman iwana ayaipapakusiwit.
Yaipapaakusike waaminkat amake nata asiknga yapbimbit.
15 Yapbimba aminu na Buyambamtapa yuatde apbitakaingu nae asiknga gwauke munu nae putning.
Siwan asingganu nata meya yamuwawa kaning.
16 Siwan ngana nata ginu nanamu wit ngang yanikaingunin damunangge nataat.
Nata iningok dama napan musipza atdopikge nataat.”