86
Tumuk wamu aaknga Devitda matakut.
1 Buyambam tapa, na kekekngana wena, ge nata nina gatangamunanga dua.
Unzingge gata natane tumuk wamu take natangamuke gatangamuyo.
2 Sike na gatuka tapi na dua kupit.
Dasingge? Nata gatane puya aminda yuke
gae baniu asinggat.
Sike nata ga akgawanggat.
3 Anutu, ga natane Anutuna. Nata tapdukbamu kwakngaom gatu zikaane ngangu nata gae tumuk wamu ganinggat.
Ganiwawa gata musip kwikwiu nae natangamuyo.
4 Buyambam tapa, na gikane puya amindae
musipma tasiwi apbakngayok.
Dasingge? Na tumuk wamu gaekan yanggat.
5 Buyambam tapa, ga amindatdat binga yuayak, ge gata nindane waiaknganinu asandekgaak kapanin.
Sike gata aminu gae tumuk wam ganikaingge asiknga baknganggayak.
6 Buyambam tapa, nata gae tumuk wam ganiwa gata maak gwaang pake natane tumuk wamu natapso.
Gata na akgatangamiyakge natake yanggatde tumuk wama natapso.
7 Tapduu nata gae yanggat komune gata akgatangamunggayak.
Unzingge, tapdukbamu nata meya pakengu nata gae tumuk wamu ayanggat.
8 Buyambam tapa, anutu ga binga tapatu dua yuak. Gata anutu kuupbam ayapbikgayak.
Siwan aminu tapatuta puya gata tasinggayak binga dua tasiwik.
9 Sike aminu dongu kuupbamu gata pasikuyau
waaminda kuke gae munu puke gatane umanda yatangenatning.
Yatangenawawa umandaa kopsa siknga siwik.
10 Dasingge? Ga kekekngaka bamban tapa. Siwan gata gikatakan duya takngatu takngatu gwaam gwaamu tasinggayak.
Ga Anutu siknga awia tapatukan.
11 Buyambam tapa, gata sanga nata tasiwitde
take nataayak kaknga na katak siknga nanindamumso.
Nanindamuwawi nata asingganu gae banip takngakan tawambit. Gata natane musipma tangenawi natdetdeu takngaaya dua siknga natapit.
Dua natake nata gae natanggamatake gatane puya aknga asinggan tasiwit.
12 Anutu, natane Buyambam tapana, nata musip gwaangu buyambam siknga natanggamunggat.
Natake nata gatane umanda kopsa yuak kaknga asinggan asinggan yatangenawit.
13 Dasingge? Asingganu gata nae take siknga natangamunggayak.
Natangamuke gata akumnanga akngane sandeke tapi nata aminu gwa kumbingga yuaing komune dua pukuwit.
14 Anutu, apmanu yamandet aminu kunduta apu na nutnangge tasikaing.
Sike wai aminu waakwau musip kwikwiu dua natake poot tasike na nuwa kupitde yakaing.
Sike waaminu gatane wamu dua tawake gae wamu asandekaing.
15 Siwan ngana Buyambamtapa, butaya buyambam siknga gata natangamunggayak. Unzingge gata kaanga zet dua naninggayak.
Sike gata nae gwaam siknga natangamunggayak. Natake gikane wamu takngatu takngatu yanggau atawanggayak.
16 Gata nae apuke butaya natangamuyo.
Ngan, na puya aminda unzing mingata puya aminda tasikut binga tasinggatde
kekekangamuke gatuka tapso.
17 Buyambam tapa, nata sanga gata musipbaatangu butaya natangamunggayak kakngatane tuwang yeikngamuyo.
Yeikngami natane iwanata kake gata gatangamuke tapi kekekanggat ngang natapning.
Natake waaminda inane waiaknganae asiknga maakaning.