5
5:1-10 Yisas wo mian yab bigau tari igo inmoromsi igo
Munon qei mian yab bigau gigit igoarar qamb wurimaribigub eng ete at igour: Qenu wonou Isrel munon mian yab big igour yurau end ger gab qereima munon yamangar wurit sarau ebet igo. Ende aba Qenu wonou uyes sarau uber wes-wes banam ar imbiga ebet ne wurinou qomon boru wes-wes abari wurimaragansi wurit biruet igo. Munon eng wonou maigas me nonoguret sarau irou ebeinerei. End ne wo mesenau munon qoyam ue eng nob munon yurau Qenu qomon biisitet igour eng nob wurit sarau ebet igo. Igo munon yamangar wurinou qomon boru end mian yab big ne wonout gor mian yab big ende at igour.
Munon qomon boru wurit biruoub qamb mian iset bigau sarau eng sig qau. End munon ger wonou misirt sarau eng ebeib qamb me ebeinerei. Ue, Qenu wonou munon gab musub qereima ne sarau eng ebeiba. Qoan Aron sier gas ende.
Munon inubersiau tari wo Qenu wau, ego wo gor ende sig ebeterei. Qenu wonou maribig sarau eng eb qamara ebeterei. Ebet ne Qenu wonou nob qamar:
Ne yonou wau, see yonou nedibesiaum. End Ye nonou Tain igoum.
Ende qamb ne qob tau ger bo maragansiau end qamar:
Ne qenen igo munon wurimaragansi igoan, Melkisedek gas ende qenen igoan.
Qoan Yisas munangit ag e der qib igoar qen end Qenu nob qamb igoai. Wo uma wogub Qenu bo mot iriner qen end Qenu simot ab eab igoai. Wonou git bumai wogub simot eab igama Qenu toubet musiarei. Yisas wo git Qenu wau, ego wo git goan uter war end ne Qenu wonou qob toat ebeter end dibenara imbigorei. Qomon eng ebeter end ne wo munon gigit Qenu qob toau tari. Ne wo munon gugum wonou qob igetet igour eng wurimusub ne wuriqubeiamor end qenen uber igorubour. 10 End Yisas qomon eng ebet igama gab wo mian yab bigau tari, Melkisedek gas ende maribigorei.
5:11-14 In wau qamaaman gas ende me igorun
11 Unum Melkisedek eng qanam irou igo eng animbig qomoruboun eng anmusub me imbigunanei eng gab wogoun. 12 See an imbigau munon burunon qen eng. Ego an misir ue gas ende igamari munon ger bo Qenu qob qanam bigor eng bo animbiga iguboumon. An mani gagam aninou naret me nunanei, inau qas nub igoumon. 13 In mom imbig igoun eng, munon gugum inaut igo eng unor inau qas nub igour. Igo qomon qoregen eng wuri me imbig igour. 14 Ego munon barai wuri mani gagam wurinou uyes gotoroumi naret nub igour. Munon ende gas eng mi gugum wurinou imbig igour. Qomon qoregen ne qomon boru eng gugum qerei imbig igour.