4
Honi Os Kristusnindoa Vivm.
Seh, kava und vewol vev yemba, wo nongalkalm vev yemba. Yimba kana topimsna hohlolohv kurava Sesoanamini, noinda kava indk vethav, wo kava ambo eisil avna noindava. Wohengiwuvm osangas mendeklimoa, os ten pevm kav seilm ishunnam. Kava ishunv ungevlirini samblam, Yuotaim eva Sintikim, os yeoa mongawundna ahamno mendeklimoa, osm pevm mongawulm mongawundnam ahalm.
Ka Pol yem kavna sehelm ishomnav Vilipainindrinim, yimba mongawundna andra evena kamongova. Noinda kava yemba os omnav, yeoa kolvrowolo no ungevlirini samblamoa, Yuotaimoa eva Sintikimoa, honam osm evelm. Himba andra evena kamongo, eva numhowol vewuvmona velmba besal nemelmonamba indhanamba. Himba honi englamokol vivna, vena, Klemen eva mongla, noi ten kav wonandra vevnam. Henamba nihilva lopo veluhunv di no tombaira, ten noinda kilihavm, beswonam yunalm wohalm.
Yeoa elsus losnamona amnavm mendeklimoa. Kava ata os ovav henga, yeoa indlothopro. Osm viu, indhanamba indkumbiva yemba nungeilvrava, uvra, manam eva indhana windel hevm av. Manara, doa murapeta mendekliva prolmba vev. Mana vemamba manam mindnamba yimba ningvra. Heva os sembayang vinivm Sesoam nomba mana vemamba, yimba ningvrava pevmba. Wo nonamba yimba sembayangmba vivrava, elsus osoa umnivm, Sesoa yimba lehra. Memba Sesoava yemba undwonamba wonvaomana vevpa, noita si yena undna nowolnamba isinvav Yesus Kristusinda. Nomba undwonamba, temba Sesoava daswolvpa, hevm mendeklikumbi, nomba owai, es eva pimba levrapivolvav.
Seh, kava yemba eunillam ishunv. Manam manam nomoa besalmoa wohnengewuvmona vevm, wohkevru yunalm, temba mendekli. Vivm, osm indhanamba yemba nungeilvrava, uvra, manam eva hevm lehra viv. Ningvm nom, ovra, memba tanamolnam manam manam, wo elsus vewuvmona vevm wevsa besalangas mana vema kethahui. Wo vivm, noi ten pevm kav nona numhowol vevnam, wo osoa eva pev ten kanamini dumbvnam. Noi vivm, pevm ten kav ishunnam, eva ten pev kam nunglivnam, kav ten vevnam. Wo Sesoava nomba, memba wonvevpa undwonamba almba, si yemba nihra wonvevra.
Polva Vilipaikotanindm Unna, Yimba Manimani Doa Kamba Novoa Vinina, Lehrangas.
10 Kava mindnam wohindk vethamnav mendeklimba, noinda yimba henga nengvhuei, kamba nesmos vrelmba. Yimba doara undva vrina, kamba nesmos vrelmba, wo heva os owai, monahui, henashara eva ata yimba ambara vithita. 11 Kava ishunv yemba honam, heva os kava novtotholmba ishovmoa, noindava kava manam manam nom nengvm. Kava doa nonglomana vena, osmba doata manam manam memba kava iavpa, temba kamba yimba wulkusomnanamba diva. 12 Memba osm, kamba doa kepel vovhoana, nismba almba, nonamba mana vemahuiva kava avnamba. Wo eva kam vei, doa kanandhana, nonam manimani esvema kava iavm, manam eva kava sahvra. Kamba doa kepel vovhoana, poaitamba indk vethalmba, osva nonam nonam kamba nonglaphovpa. Kamba doa kepel vovhoana, indk vethalmba, nonamba innemba esvema kanamba nalohvna nelmba, eva osoa nonam kava innehui avna nonamba. Kamba doa kepel vovhoana, undwonamba almba, nonamba manimani kava ambo nosra avna, eva osoa nonam kav nis ambo avnam mana emahui. 13 Wo honamba manimani memba kava vevnamba, kava vevna Kristusnapopol, manara he kamba luthua wulavna.
14 Heva os memba eva besalta, yimba memba kamba kolvrinamba, nonamba kava osva vevnamba, an si kamba kolvravav? 15 Yimba Vilipainindva mendah wohnengewuv, nom ten seilm kava yem ishunnam besalnemelmom. Nonamba kava Masetonia provinsriniva phovnamba, yengas Kristusnindva ye kamba kolvrina. Yimba kamba nomba diva wulkusomnanamba, kava nona mendeklina andrava vaomana vena. 16 Nonam nonam yimba os kamba dembhemb vewuvmonana manimani, nonamba kolvralmba, nonamba kava avnamba diva Tesalonaikakotarava. 17 Tanamta, memba honamba osmba owai, kava ambo dembewuinvra manimani yenamba. Heva os kava yemba osm vinv, honanata wohao, memba wevsava besal moang velliniva phov.
18 Wo doa daipotava kava eva manam sahvav, doa esvema kelvhoana. Kava noi iav, nom kav nengvnam, noinda osra manimani yimba nomba kamba vininamba, Epavrotitus kamba ipromnana. Yenamba diva snal maim ona, tinen teteihnungna besal, nona ten sembayang vewol vinivm Sesoam, wo kamba yunam wohkanandhana. 19 Pina Sesoava manimani besalangas iav, pim daswolalm Kristus Yesusnanamba. Noinda himba yemba si yunalm lundthoavav, nomba manam manam yimba ningvrava.
20 Pioa okuluwuvmona velohra pivna aram Sesoam osangas osangas yunalm.
21 Sehmoa prunv yem Sesoatindim Kristusnam. Sesoatindi he noi men hui, he kamongo vivm mongawulm, yemba piembinv sehmomba. 22 Indkumbi Sesoatindiva yemba sehmomba piembinv. Wo nomba Kristusnindva yemba sehmomba piembinnata, temba nomba andra velvohvpa Sisa King Kuwulna deuvrava. 23 Yesus Kristus pina mendeklioa, heoa yemoa wavra vovhueinvra. Doata.