105
Kaem kilek bibiya duap duap te ko kariimet Israel nunga bataguru tam
1 Yawe amilmil tual ale noko nup biyala patawuralko!
Noko munan beteram wore sor suen la ko kariimet nunga maonal se ikimonko.
2 Wur iluwal ale nup patawuralko;
mel bibiya beteram mu ko balalko.
3 Nina noko kariimet ko bagasan,
se noko ninguru amilmilaral ale ko nup laili patawuralko.
4 Yawe ninga sangukko kote namaral ale
nu te la ira sanami se lagaralko.
5 O Israel, nina Kaem kilek bibiya ningo
ningo beteram mu ko ningamin tugumal ale
nu kuring kuluka ko kariimet alo memek nungaram mu ko ago ikialko.
6 Nina noko kariimet,
ko ura kari Abraham tuagu te, kapa Jacob tuagu te ko kariimet.
7 Nu Yawe, anananga Kaem;
nu ali lilim la iramuram ale bitaruwoso.
8-9 Noko den Abraham ilak kaolam mu tom suen biya anirukko,
Isaac ilak kaolam mu betela nu me ko kuamili saparukko, mena.
Mu den mu am tom suen biya anirukko.
10 Akingtala nu Jacob ilak den mu kaolam, ale den mu
Israel ko kuriang imas nongote tom suen biya anirukko mam.
11 Ale balam, “Ani ali sor Canaan mu
ni se ka kuriang gue arungu ningarikko,” mam.
12 Tom mu te gue me pagakaso, se nuna
ilagalata, se kariimet iwareng iwita
Canaan kariimet nunga ningi bagakasan.
13 Bare sor suanta te me bagakasan;
king bo ko bilik te baga barasu nama bo kote, uwuta uwuta geraga bagakasan.
14 Bare Yawe me nunga bitakaso ewere te
se, kariimet bo me ta nunga bita maguwukaso;
nononga ningo ko nu king alo den sail ago nunga maonam ale mam,
15 “Nina kariimet motam gotek aninga
ma balem imi me ta nunga kau talko;
ale aga prophet alo memek bo nungumik te me beteralko,” mam.
16 Udagi te nu balam se karak biya nunga
sor te kaparam, ale nunga inang mel suen la mena saparam.
17 Bare nu maingkala ikia bo giram
beteram, mu Joseph ura dungan kari iwita ko diaman ale ilak
Egypt namaman se bagakaso.
18 Se ko sowek sen te kaloman,
ale ain biya mu dogotak tuguman, se yaman kua se baga,
19 den suen la nu kuring te aratam mu nunguning kaparam;
se mu te Yawe ko den Joseph ko balam mu nunguning aram.
20 Se Egypt ko king mu balam se Joseph talipara ningi mu beteman se aratam;
nu kariimet nunga king biya se balam se uwutata aratam.
21 Nu Joseph nu bowa ningi kari dom ko
beteram se ko mel suen biya bitarukaso.
22 Joseph king ko ura kari bibiya se king
ikia sinar kari alo suen la nunga bitaru se nunga kiti gurugukaso.
23 Asele Jacob ko kariimet karogo Egypt namaram ale tom sang ko,
Ham ko ali umu te bagakaso.
24 Se Yawe balam se noko kariimet gue
mu pagam, ale suen biya
nunguningkiri se Egypt alo kariimet umu arigiman ale nguangakasan.
25 Ale nunga nongomang magakaso,
se kawel kiwem te ninguru nunga bita maguwukasan.
26 Bare Yawe nu ko ura kari Moses se Aaron ilak ura nungaram
27 se nuna Ham ko ali Egypt ningi
kiwem duap duap sokel ago bitakasan se aratukaso.
28 Nu tiromorom beteram se ali iramuram,
mu awuk, nuna noko kuring me karo tuman.
29 Nu balam se yu suen la gue ko geragam,
se wal suen la kua muruwuman.
30 Se nunga ali lilim mu gorogoro ago terong ma saparam;
se king ko bagara kuwim ningi mu koma suanta.
31 Se aking balam se kuwuling kasim
karogo la nunga sor umu ira saparam.
32 Nu balam se sor lilim la te tuwik yu mu
geragam ais muguri ko kapakaso,
se pure biliwilik makaso ale sor irakaso;
33 se nunga tam waen se nunga tam fig mu maga saparam,
se tam suen la mu kilikilik ma saparam.
34 Nu balam se locust sor lilim la iram
ale kaura tutera ko moke mena;
35 nuna tam gawa, sirsir, se na na gia mel suen la mu no sapaman.
36 Asele nu balam se Egypt nunga kuriang
kari gira bilangara mu kua parangaman.
37 Se nu Israel alo nunga giam ale arungu
aratam; nuna bala ko mel duap duap
silver se gold te nunga mu ago lilim aolak taman;
nunga kariimet gue 12 mu ningi bo ta me memek arigam.
38 Se tom nuna aolak iluman mu Egypt
kariimet nususuru dirmam, mu awuk,
nuna Israel nungumik te ikup ninguru arigiman ale nguangakasan.
39 Nu taiti nuwi te nunga bitarukaso,
ale tirom tama nikinang te nikim nungarukaso.
40 Nuna na inang ko nu isarman,
se nu inangnang duap bo mu suen biya nungaru se,
duruk wonong ko inang manna mu karogo nungaram.
41 Nu manga moram se yu palengam
aratukaso ale sor garagarayam te yu biya bo iwita nagu namakaso.
42 Nu uwuta nunga bitarukaso, mu awuk,
nu ko den ko ura kari Abraham ilak kaolam owore karo tuikaso.
43 Nu ko kariimet nunga giam ale arungu namakaso,
se amilmil kelaga se namakasan.
44 Nu kariimet iwareng nunga ali sor umu bataguru ko kariimet nungaram,
ale nunga ura kowar bita lagaman mu
nu ko kariimet nungaram se kotam awuman.
45 Nu uwuta ko kariimet nungumik te beteram mu ko duap mu,
nu nuna ko kuring karo se ko den iki karo tumonko beteram.
Se ana Yawe nup patawunakko!