132
Yawe Zion pempem baga lagarukko
(Ilu se temple te nama tarigira ko wur)
1 O Yawe, nika ura kari David ura ko ikup
yaman gi lagaram mu ko kamili me saparukko.
2 Nu den bo Yawe ilak kaolam,
Jacob ko Kaem Sokel Garagar mu ilak ikia bo iwita kaolam:
3 “Ani,” mam, “aga kawam ningi
me ta kasu nagurek, agi aga anira kuwim te me ta taga anirek,
4 ale amotam kuagi ningi anira me ta tairuk,
se amotam kui me ta ira kulukekkowo,
5 yam kaeyawirik ale Yawe ko bagara kuwim bo arigek bare asele kowo,
ani Jacob ko Kaem Sokel Garagar wore ko kuwim bo ningi bagarukko wore kalikko.”
6 Ana Ephrathah baga se Kaem ko Kunup Laili mu ko den ikiman,
ale nama Jearim wonong te arigiman.
7 “Ana noko bagara kuwim te namanak ale
noko suwik duap ningi nabugura kulukurnak ale ko nup patawunak, ale balnak,
8 ‘O Yawe, bares ale nika kuwim te tairko,
ni se ka Kunup Laili nika sokel aora karogo mu agotala.
9 Se nika priest alo mu munan ningo dirkiriyam mu guang tuguma iwita te bala betemon,
se nika kariimet mu amilmil wur ilumonko.’ ”
10 Nika ura kari David ko kamin ares
mauk se nika kari marak sokel tuem mu me ari daleluwurko.
11 Yawe David ilak den bo kaolam,
se den mu aora biya aniso se nu me maguwurokko. Se den mu iwita:
“Ani nika gue te bo bitirik se nika kiwim te king ko bagarukko.
12 Ikiko. Nika kuriang gue aninga den
kalem mu karo tumon, ale aninga
munan nunga kausem mu karo tumon,
mu nononga gue te pempem butata king ko baga lagamonko.”
13 Nunguningta, Yawe nu Zion
atumukiram, se mu noko wonong ko aratam.
14 Nu balam, “Imi aninga wonong pempem la anirukko,” mam.
“Ani imi te daigek ale baga se kariimet nunga bituekko,
mu awuk, ani angamang tuem.
15 Ani Zion na inang mel suen la mu waru tuek se udagi me ko tatopurukko;
ani ko kariimet nungumik mel mena mu na inang nungarikko.
16 Ani noko priest alo mu kariimet te
nunga gia ko marak sokel mu nungarikko,
se noko kariimet amilmil wur ilumonko.
17 “Se ani David ko gue te king bo nup biya sokel garagar Zion bitirikko;
se nu mu galep bo iwita kani se lagarukko.
18 Ani noko kager kari memek mu dolara nungarikko;
bare nu mu king nup biya sokel ago bagarukko.”