83
Israel alo Kaem nunga kager kari memek nunga karo parusuwu warukko sail ago arusan
(Asaph wur imi batogam)
1 O Kaem, kiring me kaloko;
kutek me ale kiring me sisirokko!
2 Arikko! nika kager kari memek kager ko kirimi karame mawasan,
nuna ni me ka kuesan ale ni kerak barimasan.
3 Nuna yumura la nika kariimet nunga
maguwumonko ikia memek bitawasan;
ale kariimet ni nunga kuesam wore nunga
maguwumonko karogo kaeyawasan.
4 Ale “Tairalko,” masan, “nunga wonong sor likilim la menawunak se
Israel ko nup eng am mena namarukko,” ma balsan.
5 Nuna nunga ikia yumura mu ko nongomang suanta awuman;
ale tai ilu biguwuman, ale ni kerak barimamonko negawasan.
6 Biguwura motam umu Edom ko kariimet, se Ishmael ko,
se Moab ko, se Hagrites ko kariimet;
7 se Gebal ko kariimet, se Ammon ko, se Amalek ko, se Philistia ko,
se Tyre ko kariimet.
8 Sor Assyria mu ago tala nongorak sanamaram, mu awuk,
nuna Lot ko gue Moab se Ammon nongorak numi kuting iluwam.
9 O Kaem, ni munan Midian ko kariimet
nungumik te beterem, ale aking
yu Kishon te ni king Jabin, se ko kager
supuling Sisera nungumik te beterem, uwutatala nungumik te bitarko.
10 Ni Endor wonong te nunga menawurem,
ale ali te nunga warem se iwiman.
11 Ni nunga kari supuling alo Oreb se
Zeeb nunga maguwurem uwutatala nunga bitarko;
ale nunga bitua kari mu, Zebah se
Zalmunna nunga beterem uwutatala nunga bitarko.
12 Mu awuk, nuna balman, “Ana Kaem
ko ali welang mu ana tanak se anananga arukko,” ma balsan.
13 O aga Kaem, kupkup iwita nunga parusuwurko,
se sua ko wakala marir karogo namoso iwita namamonko.
14 Ale tama giarum kaiso se kaniso,
ale sua duruk motongar te mu kaniso iwita,
15 yar daula te nunga karo se nagumon,
ale ka marir daula samamer biya te nguangara nungaruko!
16 O Yawe, dolara nungaru, nunga maguwur,
ale nika sokel aora garagar mu nunga kasuru se arigimonko.
17 Ale nunga maguwur, se eng am butata nguanga dola se lagamonko,
nuna nguanga dola laga eng am kua namamonko.
18 Yawe, ni uwuta bitar se nuna ko ikimon, ni keta suanta ni Kaem Kalel Biya,
se ali sor lilim la bitarsam.