9
Romhâ 'manharĩ na 'ri wasu'u
1 'Re ĩhâimana u'âsi mono hã duréihã tinhimiropisutu 'rada hã te te dama sõmri wamhã, ma tô dama pisutu za'ra, ãma 're ĩdawata za'ra mono zéb da hã. Zâmorĩ za'ra ré, danhimizahâri sidâpâsi, romhâ 'manharĩ na 'ri hã da te dasiwi ĩsimizusi mono zéb da hã, ma tô duré dama pisutu, ãma 're ĩdawata za'ra mono zéb da hã, duré ĩwa 're ĩsãmra mono zéb da zama.
2 Duréihã romhâ 'manharĩ na 'ri hã danhimizahâri sidâpâsi, 'Re ĩhâimana u'âsi mono ma, da te dasiwi 're ĩsimizusi mono hã maparane te 'ri 're wa'wa hã 're hâimana zahuré. 'Ri 're wa'wa ĩmorĩ'rata ãma, te rob'uiwẽzé sima'warazé hã 're sa. Wedeza hã te duré ĩwa 're sa, ĩ'u'ẽne hã 'Re ĩhâimana u'âsi mono ma, ĩwa da te 're ĩsa'ra mono zéb da hã. 'Re ĩhâimana u'âsi mono te, 'ri 're wa'wa hã ĩwẽ uptabi na ĩsisi hã.
3 Duré zazahâ ĩhâpa na 'ri 're wa'wa nhitobzé babarã niwĩ, 're ĩhâimana mono hã maparane ãma 'ri 're wa'wa hâiba amo nhisi hã, 'Re ĩhâimana u'âsi mono te, danhipai u ĩwẽ uptabi hã, ĩwa 're ĩsãmra mono zém na taha nhisi hã.
4 Tame te ẽtẽ'ubuzi pré oru 'manharĩ na wedeza ne hã 're sa, 'Re ĩhâimana u'âsi mono ma, wedewa'u zadaze zatazéb da hã. Wedehâ're hã te duré 'ri para 're sa. Wedehâ're mana wawimhã, oru 'manharĩ. Duréihã rob'ui'éré na 'Re ĩhâimana u'âsi mono te te dama ĩropisutuzém na, wedehâ're nhisi hã. Wedehâ're 're, te oru 'manharĩ hã simhi ne hã 're sa, mana na dasa nhisi hã ĩ're 're ĩsa'wari mono hã. Arãhã nhiwedehu zama te duré wedehâ're wa 're sa'wari, duréihã 'Re ĩhâimana u'âsi mono nhimipawaptobzéb zarina, wedehu na ĩsuire 're ĩwairébé mono hã. Rob'ui'éré hã te duré ĩwa 're sa'wari zahuré, 'Re ĩhâimana u'âsi mono hã te te tinhib'a'uwẽ norĩ ma ĩropisutuzém na rob'ui'éré hã, ẽtẽ tõmo baihâ na.
5 Wedehâ're nhisiwi te duré ropodo hã 're sima'wara zahuré, rob'manharĩ hã ropoto hâiba hã ĩsaripi ré hã. 'Re ĩhâimana u'âsi mono, tame 're ĩsãmra mono zé, te ta norĩ hã wasu'u zahuré. Wedehâ're nhisiwi, te ta norĩ hã 're papo zahuré. Wedehâ're nhitobzé nhisi hã 'Re ĩhâimana u'âsi mono, dawasédé te te dama 're ĩ'apari mono zém na ĩsisi hã. Ãne duréihã romhâ 'manharĩ na 'ri wasu'u hã. Tane nherẽ, ãhãna hã te ãma aima rowasu'u uptabi za'ra wa'aba õ di. Syry na wa tô ãma aima rowasu'u za'ra wa'wa.
6 Ãne ma tô danhimizahâri sidâpâsi 'ri paramhã marĩ hã sipu'u pese na ĩwa da te 're sa'ra. Tawamhã sasedoti norĩ hã 'Re ĩhâimana u'âsi mono ma da'ãma romhuri'wa norĩ hã awẽ sidâpâsi ma tô 're sisisi, 'ri 're wa'wa ĩmorĩ'rata u hã, tame ĩwa tinhimiromhuri mono bâ marĩ na te te 're romhuri za'ra mono da.
7 Tane nherẽ, sasedoti norĩ nhib'apito, tisiré norĩ ma ĩpire uptabi si ma tô maparane ãma 'ri 're wa'wa u 're zasi, 'Re ĩhâimana u'âsi mono te hã, danhipai u ĩwẽ uptabi hã ĩwa 're ĩsãmra mono zéb u hã. Wahub sidâpâsi ma tô misi haré 're zasi. Tamomo 're zasi mono wamhã, danhimizama waprui ré, te 're zasi, dawasété parizéb da hã, 'Re ĩhâimana u'âsi mono ma, te te tãma 're sõmri mono da, si'udâna, duré da'udâna zama, duré da te dasina 're waihu'u za'ra mono õ nherẽ, dawasédé da te 're ĩ'manharĩ za'ra mono zé parizéb da hã.
8 E marĩ te tawamhã wama wasu'u za'ra ãne hã, duréihã sasedoti norĩ hã 'Re ĩhâimana u'âsi mono ma, te te da'ãma 're ĩromhuri za'ra mono zé hã. 'Re ĩhâimana u'âsi mono pẽ'ẽzani hã ma tô ãne hã wama waihu'u za'ra. Duréihã romhâ 'manharĩ na 'ri ãma hã, 'ri 're wa'wa ĩmorĩ'rata u danhimizama hã dawasété parizéb da, 'Re ĩhâimana u'âsi mono ma, da te 're ĩsimroi mono zé hã, zahadu 're hâimana mono ré, te 'ri 're wa'wa hâiba amoi u da hã sitom haré 're sa dawi, zahadu. Taha wa, 'Re ĩhâimana u'âsi mono, ĩwa 're ĩsãmra mono zéb u hã, zahadu ĩtẽme 're danhisisi waihu'u mono õ di. Ãhã wasu'u, te ã hã wama wasu'u za'ra.
9 E marĩ te duré wama wasu'u za'ra, 'ri 're wa'wa ĩmorĩ'rata ãma danhimizama ĩwa da te 're ĩzata za'ra mono zé hã. Danhimizama hã dawasété parizéb da, da te tãma 're ĩsõmri za'ra mono zém na, dapẽ'ẽ 're dadâ'â u'âsi ne 're ĩdanomro mono zéb zarina, dawasété si da te 're 'manharĩ za'ra mono wa, 'râwi 're ĩdasiwẽ'õ u'âsi za'ra mono zé hã da te dasima ãma 're pari waihu'u za'ra mono õ di, dasi'uihâ na hã.
Duré, 'Re ĩhâimana u'âsi mono ma danhoprubzé hã, ãma 're dawata za'ra mono da, da te tãma 're ĩsõmri za'ra mono zém na hã da te dasima 're pari waihu'u za'ra mono õ di, dapẽ'ẽ 're dadâ'â u'âsi ne 're ĩdanomro mono zéb zarina, dawasété si da te 're 'manharĩ za'ra mono wa, 're ĩdasiwẽ'õ u'âsi za'ra mono zé hã. Ãne, wa te oto ãma 're ĩwaihu'u za'ra mono zé hã, ã hã ĩpire wasu'u na hã.
10 'Re ĩhâimana u'âsi mono ma, danhoprubzé, da te 're ĩsõmri za'ra mono zé hã dapẽ'ẽ 're, da te dasima 're ĩrosa'rata za'ra mono zém na te te wama rowasu'u õ di. Taré dasa hã marĩ, da te 're ĩhuri mono zém na roti te wasu'u, duré marĩ wa'u, da te 're ĩ'âhuri mono zém na rowasu'u zama, duré 're dasihâiba wasété za'ra mono tõ da, 're ĩdasi'upsõi pese za'ra mono zém na zama roti. Ã norĩ na roti hã taré sõ'awi dahâiba na roti, ma tô dama 're hâimana za'ra. Tane nherẽ, 'Re ĩhâimana u'âsi mono hã 're ĩdanomro mono zép té hã, te te dama ĩpisutuzép tép ãma, ma tô oto dawi ai'utõ, ã norĩ na roti 'rada hã.
11 Cristu hã ma tô oto sisasedoti tô, sasedoti ĩpire uptabi na dama 're hâimana mono da, 're ĩdanomro mono zép té hã ĩwẽ uptabi hã te te dama 're ab'madâ'â mono da oto. Tawamhã, hâiwa ãma 'ri hã, 'Re ĩhâimana u'âsi mono hã ĩwa 're ĩsãmra mono zéb u, ma tô oto ãzé Cristu hã, danhib'rata na da te dasiwi ĩ'ri õ u, ropoto wazari ti'ai ãma 're ĩsa mono õ u. Ti'ai ãma romhâ 'manharĩ na 'ri nhipai u, wẽ uptabi di 'ri hã, hâiwa ãma hã. Pire uptabi na te ta hã 're sab u'âsi.
12 Tawamhã Cristu hã hâiwa ãma 'ri 're wa'wa u sébré wamhã, misi haré ma tô wanhowab za'ra ãzé, 'ri 're wa'wa ĩwẽ uptabi u hã, 'Re ĩhâimana u'âsi mono, ĩwa 're ĩsãmra mono zéb u hã. Tamomo ĩtẽme sébré wamhã, e pone'ẽrebâi waprui ré ma tô ãzé. E powawẽ 'ra waprui ré zama, ma duré ãzé, te te tãma ĩsõmri da hã, duréihã sasedoti norĩ te te tãma 're ĩsõmri za'ra mono ne hã. Mare di. Tiwaprui ré si ma tô ĩtẽme ãzé Timama u hã, te te tãma sõmri da, taha na si wawasété hawi te te 're wa'anho'reptui mono da, misi haré.
13 Sasedoti norĩ hã 'Re ĩhâimana u'âsi mono nhimiroti 'rata na Mozési te te ãma ĩrob'ui'éré zarina, te za pone'ẽrebâi wapru hã syry na dahâiba nhisiwi te te 're sa'wari za'ra, niha wamhã, powawẽ ĩba'õmo wapru hã, marĩ na dahâiba mana wawip si 're dasihâiba wasété za'ra mono wa, apâ te te ãma 're dahâiba wẽ za'ra mono da, taha zarina pibu pese na 'Re ĩhâimana u'âsi mono ãma 're dawata za'ra mono da. Niha wamhã, powawẽ 'ra sipi'õ hã da te 're 'wa'a pese za'ra mono wa, taha pro hã 're ĩsi'ru'a za'ra mono hã te za duré ta norĩ hã te te dahâiba nhisiwi 're sa'wari za'ra, te te ãma 're dahâiba wẽ za'ra mono da, duré taha na hã.
14 Ãne hã duréihã danhimizama wapru na dahâiba mana wawi marĩ na 're ĩdasihâiba wasété za'ra mono parizéb da hã, wẽ nherẽ, taha nhipai u, Cristuhu wapru si siptete uptabi di, dawasété parizéb da hã. E marĩ wa. Taha si wasété ãna 're hâimana u'âsi mono wa. Taha wa, 'Re ĩhâimana u'âsi mono pẽ'ẽzani waihu'u pese zarina ma tô wazada sisõmri za'ra 'Re ĩhâimana u'âsi mono ma, wazada dâ'â da, tiwapru na te te 're wa'a'upsõi mono da, wapẽ'ẽ 're wadâ'â u'âsi ne 're ĩwanomro mono zéb zarina, wawasété si wa te 're 'manharĩ za'ra mono wa, 'râwi 're ĩwasiwẽ'õ u'âsi za'ra mono zé hã te te oto wama 're apari mono da. Taha zarina, wa za oto 'Re ĩhâimana u'âsi mono ma si, wa te 're romhuri za'ra, wawẽ na si wahâimanazém na wa te 're upa za'ra mono ãna.
'Re ĩhâimana u'âsi mono te te dama ĩropisutuzép té wasu'u
15 Taha wa, te oto Cristuhu si te te da'ãma 're ab'madâ'â, 'Re ĩhâimana u'âsi mono te te dama ĩropisutuzép té hã. Tidâ'âzém na ma tô da'awa'â Cristu hã, dawasété na 're ĩdanomro mono zém hawi te te 're da'anho'reptui mono da, zahadu 'Re ĩhâimana u'âsi mono te te dama ĩropisutuzéb 'rada hã dama 're hâimana mono ré. Taha zarina te za oto 'Re ĩhâimana u'âsi mono hã tinhib'a'uwẽ da, te te 're ĩ'apisutu mono norĩ hã te te sima 're awaibu, ĩwẽ uptabi na te te tãma 're ĩ'aropisutu mono zéb ré si, 're hâimana u'âsi za'ra mono da ĩré, ta norĩ hã.
16-17 Ni'wa hã dâ'â õ ré, te za tinhibrom na sisa'u dama roti, ĩ'uirĩ na si da te niha dasima ĩpo'o mono da hã. Sisõ'a ré, te za ãne na hã ãma rob'ui'éré ĩbaihâ na hã, pibu pese na ĩsibro hã ĩ'uirĩ na da te dasima ĩpo'o mono zéb da hã. Tawamhã, e zahadu dâ'â õ ré, te za te te sima po'o, ĩsimi'ui'éré zarina, te te tãma ĩroti za'ra zéb zarina. Mare di. Ĩ'uirĩ na si te za tô ta norĩ hã ĩsibro hã te te sima po'o, ĩdâ'âzém na te te waihu'u za'ra wapsi. Tane duré, 'Re ĩhâimana u'âsi mono te te dama ĩropisutuzé hã.
18 Duréihã sasedoti norĩ hã danhimizama te te 're ĩsimroi mono wapru na te te da'ãma 're romhuri za'ra mono õ 'wa'âhã, 'Re ĩhâimana u'âsi mono te te dama ĩropisutuzéb 'rada hã pire na aré dama 're hâimana mono õ di. Taré te aré dama 're hâimana.
19 Duréihã Mozési hã ĩmorĩ'rata na ma tô uburé 'Re ĩhâimana u'âsi mono nhimiroti na dama rowasu'u. Taha pari, ma tô powawẽ wapru hã â na waza, pone'ẽrebâi wapru zama. Tawamhã wesuirã suiro panhipti hã ma tô sada si'ẽ za'ra. Taha pari, simisutu ma tô pone'ẽrebâ zéré na wasisi, da te ĩséré pré na. Tawamhã danhimizama wapru na ma tô ãma di'i, â wazari powawẽ wapru na hã. Tawamhã ĩbaihâ nhisiwi ma tô wesuirã suiro panhipti wasi hã sãsã'ã, danhimizama wapru na te te ãma di'i da, 'Re ĩhâimana u'âsi mono nhimiroti na rob'ui'éré ré nhisiwi. Dahâiba nhisiwi zama ma tô duré te te sãsã'ã, te te ãma da'ahâiba di'i mono da, danhimizama wapru na.
20 Tawamhã Mozési hã ãne na te duré dama roti:
“Ã danhimizama wapru hã 'Re ĩhâimana u'âsi mono te te aima ĩropisutu za'ra wa'aba zé hã, pire na oto aima 're ĩhâimana za'ra wa'aba mono da hã, te aima wasu'u za'ra wa'wa. Taha wa, te te aima ãma ĩroti za'ra wa'aba zéb zarina, te za oto 're ĩ'madâ'â pese za'ra wa'aba mo, tãma ãma 're uwaimrami za'ra wa'aba mono da.”
Ãne te Mozési hã dama ãma roti.
21 Tawamhã romhâ 'manharĩ na 'ri nhisiwib zama, ma tô duré wesuirã suiro panhipti wasi hã sãsã'ã, danhimizama wapru na te te ãma di'i da. Uburé marĩ hã 'Re ĩhâimana u'âsi mono ãma 're ĩdawata za'ra mono zéb da, 'ri para 're ĩsimasa mono nhisiwib zama ma duré sãsã'ã, te te ãma adi'i mono da.
22 Tane tô. 'Re ĩhâimana u'âsi mono nhimiroti 'rata na Mozési te te ãma ĩrob'ui'éré zarina, ma tô danhimizama wapru na marĩ hã da te ãma 're di'i za'ra, 'ri para 're ĩsimasa mono hã, wasété ãna 're simasa mono da, 'Re ĩhâimana u'âsi mono ma hã. Dahâiba wib zama, ma tô duré ãma 're dasihâiba di'i za'ra, 'Re ĩhâimana u'âsi mono ma, dahâiba wasété ãna oto 're dahâimana za'ra mono da. Danhimizama hã da te 're simroi mono wa, ĩwapru hã tiwi 're ĩsisa'wari za'ra mono na si, te za ãma 're dasihâiba wẽ za'ra dahâiba mana wawip si, marĩ na 're dasihâiba wasété za'ra mono wamhã.
Cristu hã Timama ma dazada ĩsisõmrizé wasu'u
23 Ã norĩ hã ti'ai ãma romhâ 'manharĩ na 'ri hã, duré uburé marĩ hã ĩwa 're ĩsimasa mono hã, hâiwa ãma 're ĩhâimana za'ra mono ne, te 're hâimana za'ra. Tane nherẽ, aiwab uptabi õ di, marĩ ĩpire da, 're hâimana za'ra mono õ nherẽ, 'ri hã ti'ai ãma hã, duré uburé ĩwa 're ĩropsimasa mono hã. Ta hã ma tô sasedoti norĩ hã danhimizama wapru na te te 're di'i za'ra, taha zarina si 'Re ĩhâimana u'âsi mono ma, wasété ãna 're hâimana za'ra mono da. Tane nherẽ, hâiwa ãma marĩ hã sena 're ĩhâimana za'ra mono hã ĩwẽ na si, 'Re ĩhâimana u'âsi mono ma, 're hâimana za'ra mono da, ma tô ĩwẽ uptabi hã sada dârâ.
24 Ãne wa, Cristu hã dâ'â pari hâiwa'utu wa, ti'ai ãma danhib'rata na 'ri 're, sébré õ di, 'Re ĩhâimana u'âsi mono hã ĩwa 're ĩsãmra mono zéb u hã. E marĩ wa. Ta hã ti'ai ãma 'ri hã, taré hâiwa ãma 'ri ĩ'uptabi ne si 're hâimana mono wa, ĩ'uptabi õ wa. Hâiwa ãma 'Re ĩhâimana u'âsi mono hã ĩwa 're ĩsãmra mono zéb u si ma tô ãzé Cristu hã, tame te te oto wa'ãma 're romhuri u'âsi mono da, Timama nho'a.
25 'Re ĩhâimana u'âsi mono ma, da'ãma romhuri'wa ĩpire uptabi hã ma tô duréihã siwaprosi ĩtẽme 're zasi, 'Re ĩhâimana u'âsi mono te, 'ri 're wa'wa ĩwẽ uptabi u hã, sasedoti ĩpire uptabi hã. Wahub sidâpâsi ma tô ĩtẽme 're zasi misi haré, danhimizama wapru hã te te tãma 're sõmri mono da, da'udâna. Tane nherẽ, Cristu hã wahub sidâpâsi hâiwa ãma 'Re ĩhâimana u'âsi mono hã ĩwa 're ĩsãmra mono zéb u hã, ĩtẽme 're zasi u'âsi mono õ di. Misi haré ma tô ĩtẽme ãzé, Timama u hã, õhõ haré dazada tãma sisõmri wa, Timama ma hã.
26 Cristu hã wahub sidâpâsi 'Re ĩhâimana u'âsi mono ma, dazada 're sisõmri u'âsi mono 'wa'âhã, te aré ropoto na'rata hawim haré dazada 're dâ'â u'âsi. Tawamhã robzépata za'ẽtẽ na te aré tô te te 're robzépata u'âsi. Tane nherẽ, za rob'rãsutu u ĩrob'umhutuzéb u si ma tô misi haré tãma sisõ, 'Re ĩhâimana u'âsi mono ma hã, dazada dâ'â da, taha zarina dawasédé hã te te dama 're apari mono da oto, 'Re ĩhâimana u'âsi mono hã.
27 Misi haré te za aihĩni 're dadâ'â za'ra. Taha parip si te za 'Re ĩhâimana u'âsi mono hã niwapsi da'awaihu'u, dawẽ na dawasété na zama, taha zarina te te dama arowairébé mono da oto.
28 Tane ma tô duré Cristu hã misi haré dazada dârâ, dawasédé hã da'ahâ na te te oto dama ãma 're ĩ'apari mono zéb da hã. Tawamhã ti'ai u apâ wei morĩ zahu wamhã, dazada dâ'â da, wei morĩ õ di za oto, taha zarina dawasédé hã te te duré dama 're ĩ'apari mono da hã. Mare di. Sô 're ĩsimipari za'ra mono norĩ si, te te oto ĩsõ'reptu pese za'ra da si, te za wei mo apâ Cristu hã, ta norĩ zô si.