20
Zezusi hã ab're hawi apâ ĩhâiwa'utuzé wasu'u
Mateusi 28.1-8; Marcusi 16.1-8; Rucasi 24.1-12
1 Tawamhã pi'õ hã robza'rã ré te ab're u mo, Mariza Madarena hã, dumidu na. Ab're u morĩ wamhã, ab're nhitobzé hã ẽne hã, baba di. Ni'wa ma tô ĩwana ĩsiti sa'ré.
2 Taha wa, te apâ wara, Sima Pedruhu u. Ĩ̱tẽmeb zama ma duré wi, Zezusi te te ĩ̱zawi pese u hã. Ãne te wama rowasu'u:
— Wanhib'apito hã ma tô dasiwi wazere ni, ab're hawi. Da te dasiwi ĩhirizé hã wa te wasiwi waihu'u za'ra õ di. — Ãne te wama rowasu'u.
3 Tawamhã te te wama rowasu'u pari, wa tô awa'awi wanem ni, ab're u, Pedruhu me.
4 Wa oto asamro ni. Te rẽme wamhã, ĩwana wa wi, ab're u.
5 Ĩ̱wisi wi, wa ab're u sô aiwẽ'ẽ, te sô rob'madâ'â da. Ĩ̱zébré õ di. Ĩ'ubuzéb si wa tô 'madâ'â za'ra, ĩhâirã hã. Ĩ'ubuzéb si te daba'wara.
6 Sima Pedru hã ma tô we ĩ̱zarina wi. Wisi wi, ma taha si ab're u ãzé. Sébré wamhã, ma duré ĩ'ubuzéb si 'madâ'â za'ra.
7 Romhâ na te ĩ'ubuzém nhiti ĩ'rã ubuzé hã nomro. Hâ nhinhai haré te nomro.
8 Tawamhã ab're u ĩ̱wisi 'rada hã wa tô duré ĩsarina ãzé. Ĩ'ubuzé hã wa tô duré 'madâ'â za'ra. Ĩ'rã ubuzé hã ĩsiti ĩnomro hã wa duré 'madâ, hâ nhinhai haré. Te 'madâ'â wamhã, wa tô saze Zezusi hã, ĩhâiwa'utuzém na.
9 Duréihã ma tô ĩhâiwa'utuzém na rob'ui'éré sirõmo za'ra ĩbaihâ na hã, 'Re ĩhâimana u'âsi mono zadawa wasu'u'wa norĩ hã. Tane nherẽ, ĩhâiwa'utuzém na rob'ui'éré hã zahadu wama waihu'u pese õ di.
10 Tawamhã ab're, wa te sabui pari, wa oto apâ wanem ni, wanhorõwa u.
Zezusi hã Mariza Madarenahã u ĩsihâi'rézé wasu'u
Mateusi 28.9-10; Marcusi 16.9-11
11 Tawamhã Mariza Madarenahã si te waza'u za ab're 'rata, wawa sina. Wawa sina ma ab're u aiwẽ'ẽ, te te duré sô rob'madâ'â da.
12 Siwẽ'ẽi wa, ma tô aibâ hã sãmri zahuré, 'Re ĩhâimana u'âsi mono ma romhuri'wa norĩ hã, hâiwa hawi we ĩne hã. Zazahâ ĩhâirã ré te aimasisi zahuré, siwanhizari. Zezusihi 'rã nomrozéb ãma te ĩhâiba amo hã nhamra. Ĩhâiba amo hã ĩte nomrozéb ãma te duré nhamra.
13 Tawamhã hâiwa hawi romhuri'wa norĩ hã te Mariza Madarena sadanharĩ zahuré, ãne:
— Pi'õ. E marĩ wa, te aiwawa.
— Wanhib'apito, da te dasiwi wazere wa, da te dasiwi ĩhirizé hã te waihu'u õ wa, wa ĩ̱wawa. — Ãne te tãma siwasu'u zahuré.
14 Tawamhã tãma siwasu'u zahuré pari, ma aipi'ra. Sipi'rai wi, ma tô aibâ hã tisã, Mariza Madarena hã. Tane nherẽ, Zezusi te te waihu'u õ di, ni'wa newa.
15 Tawamhã Zezusi te tãma tinha:
— Pi'õ, e marĩ wa, te aiwawa. E 'wa sô, te ĩrob'madâ.
Tawamhã Mariza te asa tãma tinha:
— A hã wazere wamhã, ĩ̱ma wasu'u na ĩhirizé hã te waihu'u da, nimomo sô ĩ̱morĩ da, apâ te we âri da. — Ãne te tãma tinha. Rob'rere wede 'madâ'â'wa newa, te te waihu'u õ di, Zezusi hã.
16 Tawamhã Zezusi te tãma tinha:
— Mariza.
Tawamhã tinhisi te te wapari wamhã, ma ĩtẽme aipi'ra, Mariza hã. Tawamhã wasimremezém na ebreusi mreme na te tãma tinha, ãne:
— Raboni. (Ã hã damreme hã ãma ĩsaprĩ na hã “Rowahutu'wa.”)
17 Tawamhã Zezusi te tãma tinha:
— Ĩ̱tété õ di za. Zahadu apâ ĩ̱morĩ õ di, Ĩ̱mama u hã. Mo oto aimorĩ, ĩ̱sisãnawã norĩ u tãma ĩ̱zadawa wasu'u za'ra da. Ĩ̱mama u, wa za oto mo apâ hâiwa u, Aimama aba u. Ĩ̱nhib'apito u, wa za oto mo, Asib'apito za'ra wa'aba u. — Ãne tãma ĩ̱zadawa wasu'u za'ra na za.
18 Tawamhã Mariza Madarena te oto watẽme mo, Zezusihi siré 're ĩwanomro mono norĩ u, te te wama sadawa wasu'u za'ra da. Watẽme wisi wamhã, te wama rowasu'u za'ra, ãne:
— Wanhib'apito, wa tô sabu. Timama u te za, u, oto mo, hâiwa u Wamama u. Tinhib'apito u te za, u, oto mo, Wanhib'apito u. — Ãne te wama sadawa wasu'u za'ra, Mariza Madarena hã.
Zezusi hã tisiré norĩ u ĩsihâi'rézé wasu'u
Mateusi 28.16-20; Marcusi 16.14-18; Rucasi 24.36-49
19 Tawamhã tô taha bâtâ na dumidu na bâdâ sébré wi, wa tô wasi'rã'õtõ ni, Zezusihi siré 're ĩwanomro mono norĩ si. Dama ĩpire norĩ pipa te, wa tô wasiré 'rinhitop tete za'ra ni. Tame wasi'rã'õtõ ré, ma tô Zezusi hã wama sihâi'ré za'ra wawa'wa. Wawa'wa te tizab za'ra. Tawamhã te ãne wama nharĩ za'ra:
— Rowẽ na 're aihâimana za'ra wa'aba mono.
20 Tawamhã tinhib'rada, ma tô wama wẽ za'ra, wa te 'madâ'â za'ra da. Ti'a're ãma ti'wa're hã ma duré wama urĩrĩ za'ra. Tawamhã Wanhib'apito, wa te sabu za'ra wamhã, wa 're wato za'ra.
21 Tawamhã Zezusi te duré wama nharĩ za'ra:
— Rowẽ na 're aihâimana za'ra wa'aba mono. Ĩ̱mama we te te datẽme ĩ̱zatõrĩ ne, wa za duré datẽme asatõrĩ za'ra wa'wa.
22 Tawamhã tizadawa wa'u'u na ma tô waza'uri za'ra. Ãne te wama nharĩ za'ra:
— Wa za oto Ĩ̱pẽ'ẽzani hã aima sõmri za'ra wa'wa. Wẽ uptabi di, ta hã.
23 Taha zarina te za ĩ̱zadawa para dama 're ĩwaihu'u za'ra wa'aba mo, 'Re ĩhâimana u'âsi mono hã dawasédé hã te te da'ãma 're ĩ'ab'madâ'â mono õ zém na hã. Tawamhã dama 're ĩwaihu'u za'ra wa'aba mono zéb zarina, te za te te dama 're apari, dawasédé hã. Ãne na dama 're waihu'u za'ra wa'aba mono õ wamhã, dawasédé hã te te dama 're apari mono õ di za, 'Re ĩhâimana u'âsi mono hã. — Ãne ma tô wama waihu'u za'ra.
Tome hã Zezusi te te ĩwawãzé wasu'u
24-25 Tawamhã wasi'rã'õtõ wamhã, Tome hã wame sãmra õ di, ĩsi'ubza na da te 're ĩsisi za'ra mono hã. Taha wa, wa tô tãma rowasu'u za'ra ni:
— Wanhib'apito, wa tô sabu za'ra ni.
Tawamhã Tome te wama nharĩ za'ra, ãne:
— Wa hã ĩsib'rata zapu'uzé, te 'madâ'â õ wamhã, duré ĩsib'rata zapu'uzéb 're, ĩ̱nhipto te sẽrẽ õ wamhã, duré ĩ'a're wa'ré 're, ĩ̱nhib'rada te sẽrẽ õ wamhã, ĩhâiwa'utuzém na te sazei õ di za, wa hã. — Ãne te Tome hã wama nharĩ za'ra.
26 Tawamhã romhuri hã misi wa'ãma si'utõrĩ pari, wa duré wasi'rã'õtõ ni, dumidu na. Tome hã te oto wame tinhamra za'ra. Tawamhã 'ri nhitop tete nherẽ, ma tô duré wei watẽme tizébré za'ra, Zezusi hã. Wawa'wa te duré tizab za'ra. Ãne te wazawi za'ra:
— Rowẽ na 're aihâimana za'ra wa'aba mono.
27 Tawamhã Zezusi te Tomehẽ ma tinha:
— We ĩ̱tẽme aimorĩ, ĩ̱nhib'rada 'madâ'â da. Ĩ̱nhib'rata zapu'uzéb 're, asipto hã sẽrẽ. Duré ĩ̱'a're 'wa're 're, asib'rada hã sẽrẽ. Ĩ̱hâiwa'utuzém na ĩ̱wasu'u na, ĩ̱wawã tõ. Te za oto ĩ̱zaze, ĩ̱hâiwa'utuzém na hã. — Ãne te tãma tinha.
28 Tawamhã Tome te asa tãma tinha:
— A hã, Ĩ̱nhib'apito uptabi. A hã, 'Re ĩhâimana u'âsi mono. Ai'ãma si, wa za 're ĩ̱wata u'âsi.
29 Tawamhã Zezusi te asa tãma tinha:
— Ĩ̱zabui wapsi, ma tô oto ĩ̱zaze, ĩ̱hâiwa'utuzém na. Ni'wam norĩ hã te te 're ĩ̱zabu za'ra mono õ nherẽ, te te 're ĩ̱zaze za'ra mono wamhã, tãma 're rowẽ za'ra mono di za. — Ãne ma Tomehẽ ma waihu'u, Zezusi hã.
Rowasu'u 'rãsutuzém na rowasu'u
30 Zezusi hã dâ'â õ ré, ma tô tiwaihu'u pese na marĩ dama ĩ'manharĩ waihu'u'õ hã te te dama 're ab'manharĩ wẽ u'âsi, wanho'a. Ĩsimipawaptobzé hã ahâ di. Wa hã wa tô ãma rob'ui'éré, uburé te ãma rob'ui'éré õ nherẽ, ĩsimipawaptobzém na hã.
31 E marĩ da, wa tô ãma rob'ui'éré. Danho'reptui'wa da, 'Re ĩhâimana u'âsi mono te te ĩpisutu na, Zezusihi si 're saze za'ra wa'aba mono da, duré 'Re ĩhâimana u'âsi mono 'ra na 're saze za'ra wa'aba mono da. E marĩ da, te za Zezusihi si asina 're ĩ'umnhasi za'ra wa'aba mo. Rowẽ u'âsi ãma 're anomro aba mono da, duré 're atâ'â za'ra wa'aba mono ãna 're aihâimana u'âsi za'ra wa'aba mono da, 'Re ĩhâimana u'âsi mono 'rata, hâiwa ãma. Taha da, te za Zezusihi si asina 're ĩ'umnhasi za'ra wa'aba mo.