Tɔnɔ kʋlʋ ba na pʋpʋnɩ ba pa
EBRU TIINƎ tɩn
Tɔnɔ kʋlʋ ba na pʋpʋnɩ ba pa Ebru tiinǝ tɩn na brɩ dɩbam kʋlʋ tɩn mʋ tɩntʋ
Ebru tiinǝ yɩ Zwifǝ bam yɩrɩ dɩdoŋ mʋ. Dɩ́ yǝri wʋlʋ na pʋpʋnɩ tɔnɔ kʋntʋ tɩn. O nan pʋpʋnɩ o pa Zezi nɔɔna balʋ na nɛ yaara zanzan tɩn mʋ. O ma pʋpʋnɩ sɩ ba yɩ yagɩ Wɛ cwǝŋǝ tɔgɩm. O ma pa ba na baarɩ sɩ ba taa zɩgɩ kǝŋkǝŋ, dɩ ba na lwarɩ nɩ dɩ́ Yuutu Zezi na kɩ kʋlʋ tɩn na dwe woŋo maama te tɩn ŋwaanɩ.
Tɔnɔ kʋm dɛ yigǝ kʋ brɩ nɩ Wɛ tɔgɩ DƖ Bu Zezi ŋwaanɩ mʋ DƖ brɩ DƖ tɩtɩ dɩ nabiinǝ, yɩ Wɛ daa bá wǝli kʋlʋkʋlʋ kʋntʋ baŋa nɩ. Zezi nan dwe Wɛ nijoŋnǝ balʋ dɛɛn na wʋra tɩn, o dwe Wɛ malɛsɩ sɩm, o dwe Moyisi dɩ Zozwe dɩ (pɔɔrɩm 1-3).
Zezi dwe Wɛ kaanɩm tiinǝ balʋ dɛɛn na wʋra tɩn, o yɩ Wɛ kaanɩm tu wʋlʋ na wʋra maŋa maama tɩn mʋ. Zezi na dwe Wɛ kaanɩm tiinǝ bam maama tɩn mʋ paɩ nɔɔna naɩ vrɩm cɩga cɩga lwarɩm dɩ tʋʋnɩ wʋnɩ. Yisɩrayɛlɩ tiinǝ dɛɛn na yǝni ba ma varɩm ba kaanɩ ba pa Wɛ tɩn, kʋ yɩ Zezi Krisi tʋʋnɩ dɩm nyɩnyʋgʋ mʋ (pɔɔrɩm 4-10).
Tɔnɔ kʋm tiim jǝgǝ nɩ kʋ pɛ nɔɔna bam baarɩ mʋ, sɩ ba taa ve yigǝ Wɛ cwǝŋǝ kam wʋnɩ. Kʋ brɩ faŋa faŋa Wɛ nɔɔna bam na kɩ ba wʋ-dɩdʋa dɩ Wɛ te tɩn, yɩ kʋ kwe balʋ na wʋ́ karɩmɩ-kʋ tɩn sɩ ba tɩɩgɩ Zezi yɩranɩ, sɩ ba taa nii Zezi sɩ ba taa tɔg-o dɩ ba wʋ maama, sɩ ba sɛ cam dɩ yaara, sɩ ba zɩgɩ kǝŋkǝŋ sɩ kʋ vu kʋ yi kweelim dɛ (pɔɔrɩm 10-13).
1
Wɛ tɔgɩ DƖ Bu Zezi ŋwaanɩ mʋ DƖ ŋɔɔnɩ dɩ dɩbam
1 Faŋa faŋa tɩn, Wɛ dɛɛn ŋɔɔnɩ dɩ dɩbam nabaara bam kuni zanzan mʋ. DƖ dɛɛn yǝni DƖ pa DƖ nijoŋnǝ bam mʋ ŋɔɔnɩ wǝǝnu dwi tǝri tǝri dɩ ba.
2 Kʋ daarɩ lele kʋntʋ na yɩ lʋgʋ baŋa kweelim maŋa tɩn, Wɛ laan pɛ DƖ Bu mʋ ba o ŋɔɔnɩ DƖ taanɩ dɩ dɩbam. Wɛ dɛ wʋntʋ ŋwaanɩ mʋ DƖ kɩ lʋgʋ baŋa dɩ wɛyuu wǝǝnu maama, yɩ DƖ pa-o ni sɩ o ba o taa te wǝǝnu maama.
3 Wɛ Bu wʋm mʋ jɩgɩ pooni dɩlʋ na brɩ Wɛ paarɩ-zulǝ yam na yɩ te tɩn. O maa jɩgɩ o Ko Wɛ nyɩnyʋgʋ fasɩ. O ni-taanɩ maa jɩgɩ dam yɩ dɩ paɩ wǝǝnu maama fɔgɩ tɩ zɩga.
O ma ba o saarɩ nɔɔna lwarɩm o fɔgɩ-ba o pa ba ji lanyɩranɩ, yɩ o laan joori o di Baŋa-Wɛ te o vu o jǝni DƖ jazɩm nɩ.
4 Kʋntʋ tɩn, Baŋa-Wɛ Bu dwe Wɛ malɛsɩ sɩm, dɩ Wɛ na pɛ-o yɩrɩ dɩlʋ na daga dɩ dwe sɩntʋ na jɩgɩ yɩra yalʋ tɩn ŋwaanɩ.
Zezi Krisi dwe Wɛ malɛsɩ sɩm maama
5 Kʋ na yɩ malɛsɩ sɩm, Wɛ wʋ fɔgɩ DƖ ta dɩ malɛka DƖ wɩ:
«Nmʋ mʋ yɩ amʋ Bu,
yɩ zɩm amʋ dɩ jigi nmʋ Ko.»
Wɛ nan wʋ tagɩ malɛka kalʋkalʋ taanɩ DƖ wɩ:
«Amʋ wʋ́ ta yɩ ka Ko,
sɩ ka dɩ taa yɩ amʋ bu.»
6 Kʋ daarɩ maŋa kalʋ Wɛ na lagɩ DƖ tʋŋɩ DƖ Bu-dʋa kam sɩ o ba lʋgʋ baŋa tɩn, DƖ tagɩ DƖ wɩ:
«Malɛsɩ sɩm maama maŋɩ sɩ sɩ kuni doonǝ mʋ sɩ zul-o.»
7 Kʋ nan na yɩ malɛsɩ sɩm, Wɛ tagɩ sɩ taanɩ DƖ wɩ:
Sɩ yɩ dɩntʋ tɩntʋŋna mʋ,
yɩ DƖ pa sɩ nyɩ nɩ viu dɩ min-vwɩ te,
sɩ sɩ taa tʋŋɩ sɩ pa-DƖ.
8 Kʋ daarɩ kʋ na yɩ Wɛ Bu wʋm, DƖ tagɩ o taanɩ DƖ wɩ:
«Nmʋ yɩ Wɛ mʋ, n paarɩ dɩm wʋ́ ta wʋra
sɩ kʋ taa ve maŋa kalʋ na ba ti tɩn.
Nmʋ wʋ́ ta n te n nɔɔna bam dɩ cɩga.
9 Nmʋ soe cɩga cwǝŋǝ,
yɩ n daarɩ n culi balɔrɔ.
Kʋntʋ ŋwaanɩ mʋ n Ko Baŋa-Wɛ pɛ nmʋ na wʋpolo lanyɩranɩ dɩ zulǝ n dwǝni balʋ maama na wʋra dɩ nmʋ tɩn.»
10 Wɛ ta tagɩ DƖ wɩ:
«Nmʋ wʋlʋ na yɩ wǝǝnu maama Yuutu tɩn mʋ kɩ lʋgʋ baŋa pulim nɩ,
yɩ n ta kwǝri n ma n jɩa n kɩ wɛyuu wǝǝnu maama.
11 Wǝǝnu tɩm kʋntʋ maama wʋ́ ba tɩ cɔgɩ,
kʋ daarɩ nmʋ nan wʋra mʋ maŋa maama.
Wǝǝnu tɩm kʋntʋ maama wʋ́ ba tɩ doori nɩ gɔrɔ na yǝni kʋ doori te tɩn.
12 Tɩ wʋ́ ba tɩ lɩɩrɩ, yɩ n kukuli-tɩ n tiŋi nɩ n na kukuli gwar-doŋo n tiŋi yɩ n daarɩ n lǝni gwar-dʋŋʋ n zʋ te tɩn.
Nmʋ nan ta wʋ́ ta n yɩ nɩ n na maŋɩ n yɩ te tɩn mʋ.
N ŋwɩa bá fɔgɩ ka ti.»
13 Wɛ dɛɛn wʋ fɔgɩ DƖ ta dɩ DƖ malɛsɩ sɩm kalʋkalʋ DƖ wɩ:
«Ba n jǝni a jazɩm nɩ,
sɩ a kɩ n dʋna maama n nɛ kuri nɩ sɩ n nɔ-ba nɩ tɩga te.»
Kʋ yɩ DƖ Bu wʋm yɩranɩ mʋ DƖ tagɩ kʋntʋ.
14 Malɛsɩ sɩm laŋa nan yɩ ta mʋ? Sɩ nyɩ nɩ jwǝǝru mʋ te, sɩ ba jɩgɩ yɩra nɩ nabiinǝ te. Sɩntʋ yɩ sɩlʋ na tʋŋɩ sɩ pa Wɛ tɩn mʋ. Wɛ maa yǝni DƖ tʋŋɩ-sɩ, yɩ sɩ ve sɩ zǝni balʋ na wʋ́ na vrɩm tɩn.