9
लोमा छ्येतिवी ओङ
1 ङ ख्यिराङला सिरिन, काङ ङला काङ साङ कितुप मेङ्येवी रो? काङ ङ ति लोमा छ्ये मिन रो? काङ ङे चोवो येशूला माथोङ वे रो? काङ ङे ख्यिराङला ख्याप्टाक क्यावु सुङ थ्वोनी ख्यिरा ति सुङला तेपा क्यावु मिन रो?
2 मी यम्बी ङला लोमा छ्ये मिन सिक्यासिनाङ ख्यिरा थोक्ला ति ङ लोमा छ्ये यिन, च्यिलासिसिन ङे ख्यिराङला चोवो येशूकी कोर्ला लेन ल्यामु ख्याप्टाक क्यासिमा ख्यिरा खोला तेपा क्यावु तप्की ख्यिरा ङला लोमा छ्ये यिन सिनी पङ्बु तेर्किवी।
3 ङे तेन्दोकला लङ्गुप मीतिवाला ङे सि गोवु ताम्ङे ति दी राङ यिन।
4 काङ ङ्यिराङला साप थुङ्गुप ओङ मे रो?
5 काङ ङ्यिराङला साङ यम्बा लोमा छ्येतिवा ताङ चोवो येशूकी नुपतिवा ताङ पत्रुसकी दोके तेपा कितुप पेर्मी टिनी युकुप ओङ मे रो?
6 काङ ङ ताङ बारनाबासकी तिराङ मिजी क्योङ्गुपला लाका कि गोकिवी रो?
7 चुका मी तीकी रङगी डोसुमला मक्मीकी लाका किवी रो? चुका मी तीकी गुन्डुम तप्सिमा गुन्डुम डेलु मासावी रो? चुका मी तीकी छ्युङ्मा सोसिमा छ्युङ्मी वोमा मुथुङ्गिवी रो?
8 ङे सिक्यावु ताम्ङे ति मी सिक्यावु ताम्ङे तिराङ मिन, कोन्छ्योककी सुङगी नाङ्ला साङ वे।
9 मोशाकी ठिम नाङ्ला दुक सिनी टि वे, “स्वा ङ्यिलुप पेला लाङगी खला खप्चिल माग्यक।” तुक सिक्यावु ति लाङतिवी कोर्ला कोन्छ्योककी पप क्यानी सुङ्गुप मिन,
10 ती सुङ ति कोन्छ्योककी दाक्पी थोक्ला राङ सुङ्गुप मिन रो? दी तेरी ताम्ङे ति दाक्पी थोक्ला टिवु यिन। च्यिलासिसिन शिङ मोतुप ताङ स्वा ङ्यिलुप तीकी काङ रे च्यिक रे ङ्येतुप रेवा क्यानी लाका किवी।
11 दोजो ख्यिरा पर्ला सेन तपुप दोके ङ्यिरा ख्यिराङला कोन्छ्योककी सुङ ख्याप्टाक क्यासिमा ख्यिरा ङ्यिराङला साप थुङ्गुपला गोवु च्यालक ताङ कोन्ज्ये लङ्सिन ख्यिराङला कले च्युङ्सुङ रो?
12 यम्बा कोन्छ्योककी थोक्ला शब्ज्यी कितुपतिवी ख्यिराङला तुक राङ साङ लोङ्गिवी सिसिन, ङ्यिरा याङ ख्यिराङला ती सिनाङ मङ लोङ्गुप ओङ वे। यिन्सिनाङ ङ्यिरा ख्यिराङला काङ साङ मालाङ। बोरु चोवो येशू ख्रीष्टकी लेन ल्यामु ख्याप्टाक कितुपला दुक्पा मेङ्शी सिनी चुका दुक्पा ख्येल्सिनाङ हम क्यानी देतिन।
13 काङ ख्यिराङला छ्या मे? कोन्छ्योककी ल्हङाङ नाङ्ला लाका कितुपतिवी ल्हङाङ नेमा राङ समा सेवी। ल्हङाङकी छोटीला शब्ज्यी कितुपतिवी जिन्बा पुलुप नेमा राङ थोप गोवु ति थोप्किवी।
14 तुक राङ क्यानी लेन ल्यामु ख्याप्टाक कितुपतिवा लेन ल्यामु ख्याप्टाक कितुप नेसुर राङ मिजी क्योङ्शी सिनी कोन्छ्योककी क नङ वे।
15 यिने ङला थोप गोवु ओङ ति ङे नाम्साङ माछाल। ङला थोप गोवुतिवा तेरी गोकिवी सिनी दी यिकी टिवु साङ मिन। ङे तेके क्यावु ताम्ङेला सी साङ ग्येकिवी सिसिन बोरु ङ शेप राङ गा यिन।
16 दोजो ङे लेन ल्यामु ख्याप्टाक क्यासिनाङ काङ अम्बारङ्शिङ कितुप ताम्ङे मे, च्यिलासिसिन ङे लेन ल्यामु ख्याप्टाक माक्यावाला माक्यावी मेवी। ख्याप्टाक माक्यासिन ङला कोन्छ्योककी पर्च्या फोकिवी।
17 ती सुङ ख्याप्टाक कितुप लाका ति ङरा राङ क्यावु यिन्सियाङ ङला काङ रे च्यिक रे छ्यक्तक थोपुप ति यिन्जा, यिने दी लाका ति कोन्छ्योककी ङला चेक तेन नङ्गुप तप्की ङे क्यावु यिन।
18 सुङ ख्याप्टाक क्यानी ङला काङ छ्यक्तक थोप्किवी सिसिन ङे लेन ल्यामु ख्याप्टाक क्यासिमा थोपुप ओङ ति मोछोलुप ताङ ङराङला थोप गोवु टङ्गा मालावा क्यानी ख्याप्टाक कितुप ति ङला थोप गोवु छ्यक्तक यिन।
19 ङ ति सी योक्पु साङ मिन, यिने मी बङीला ख्रीष्टकी लेन ल्यामु ख्याप्टाक क्यानी खोला तेपा कि ज्यितुपला मी तेरीकी योक्पु दोके च्युङ्यिन।
20 यहूदीतिवाला सुङ ख्याप्टाक कितुप सिनी ङ यहूदी दोके च्युङ्यिन। कोन्छ्योककी ठिमकी ओङला देतुपतिवाला सुङ ख्याप्टाक कितुप सिनी ङ ठिमकी ओङला मेसिनाङ वोतुप दोके च्युङ्यिन।
21 तमा ठिमकी ओङला मेतुपतिवाला ख्रीष्टकी ओङला टि वुङ्गुपला ङ ति ठिमकी ओङला मेतुप दोके राङ च्युङ्यिन। ङे तुक क्यावु ति ङ ति कोन्छ्योककी ठिमला मेतेन सिक्यावु ति मिन, ख्रीष्टकी सुङला ङ्येन्दुप यिन।
22 तमा तेपा रम्बु मेतुपतिवाला ख्रीष्टला तेपा कि ज्यितुपला ङ साङ तेपा मेतुपतिवा दोके राङ च्युङ्यिन। मी ललाइ ललाइला ख्रीष्टला तेपा कि ज्यितुपला ङ ति नम्बा तेरीकी मीतिवा दोके राङ च्युङ्यिन।
23 ती दोके क्यानी ङे लेन ल्यामु ख्याप्टाक कितुप लाकातिवा तेरी क्यावु तेन्दोक ति मीतिवी येशूला तेपा कितुप मोलाम थोप्शी, तमा ती मोलाम ति ङला साङ थोप्शी सिनी यिन।
24 काङ ख्यिराङला छ्या मे, छ्योङ्बाल ग्यकुप चिर्मुला मीतिवा तेरी छ्योङ्बाल ग्यकिवी, यिने छ्यक्तक ति मिरा च्यिकला तिराङ थोप्किवी। तुक क्यानी ख्यिराङ साङ छ्यक्तक थोपुप थोक्ला छ्योङ्बाल ग्योप।
25 चिर्मु चेपला वुङ्गुप मीतिवा तेरी छ्यक्तक थोपुपला डेकला देनी तालिम किवी। तिवा ना डोप छ्यक्तक थोपुपला तुक किवी, यिने दाक्पु ति नाम्साङ ना मोडोवु छ्यक्तक थोपुपला डेकला देनी तालिम किवी।
26 तुक क्यानी ङ साङ छ्यक्तक थोपुपला छ्योङ्बाल ग्यकुप चिर्मु चेप मीतिवा दोके क्यानी छ्योङ्बाल ग्यकिवी। ङ ति वोक्तुम ग्यकुप चिर्मु चेप मी तीकी तेर्मेला वुर्तुकला वोक्तुम माग्यकुप दोके क्यानी तेन्दोक मेतुप लाका मिकिवी।
27 ङ ङे जुला छासे दुक्पा वोसिनाङ चिर्मु चेपला तालिम कितुप मी दोके क्यानी डेकला देतिन। मिसियाङ मी यम्बाला लेन ल्यामु ख्याप्टाक क्यासिमा ङ ति छ्यक्तक थोपुपला फम्बुप मी दोके च्युङ्गिवी।