14
बप्तिस्मा तेरुप यूहन्नाला सेतुप
(मर्कूस ६:१४-२९; लूका ९:७-९)
1 ती पेला गालीलला ग्येला कितुप हेरोदकी येशूकी कोर्ला ताम्ङे थोनोक।
2 तमा हेरोदकी खुरुङला शब्ज्यी कितुपतिवाला “ती मी ति बप्तिस्मा तेरुप यूहन्ना यिन। ती ति शेप ने सेन्बु लानोक। तुक क्यानी तीकी मुला दुका हलेवु लाकातिवा कितुप ओङ वे।” सिनी सिक्यासुङ।
3 गोमाला हेरोदकी खोरो नुप फिलिपकी पेर्मी हेरोदियासकी थोक्ला यूहन्नाला जिम्नी चोन्खाङला उप्नोक।
4 च्यिलासिसिन यूहन्नाकी हेरोदला “ख्योरो छाम ति खोरो पेर्मीला ज्योकुप मेङ्गिवी।” सिनी सिक्यानोक।
5 ती तप्की हेरोदकी यूहन्नाला सेतुप नो क्यानोक। यिने ती ति मीतिवाला ज्यिवा क्यानोक, च्यिलासिसिन तिवी यूहन्ना ति कोन्छ्योककी लुङ्तेम्बा यिन सिनी नो किनोक।
6 तमा हेरोद क्येवु तुछ्येनला हेरोदियासकी पुम तीकी डेन्बुतिवी दोङ्ला छ्यम्नी हेरोदला छासे गा लाङ्नोक।
7 ती तप्की हेरोदकी ती पुम्पेजाला “ख्योरो ङला काङ लङ्सिनाङ ङ ख्युरुङला तेरिन।” सिनी न क्यल्नी थाक्छ्येसुङ।
8 तमा तीकी खोरो आमी लापुप दोके “बप्तिस्मा तेरुप यूहन्नाकी गो ति देर्माङ नाङ्ला ज्याक्नी दे राङ ङला नङ।” सिनी सिक्यासुङ।
9 तमा ग्येल्वुला सेम्दुक लासुङ, यिन्सिनाङ गोमाला के न क्यल्नी थाक्छ्येतुप ताङ डेन्बुतिवी मिङ्गाला वोतुप तप्की तीकी ती पुम्पेजाकी गोङ्बा शुवु दोके की सिनी क बिन्सुङ।
10 तमा तीकी मीतिवा चोन्खाङला ताङ्नी यूहन्नाकी गो ति च्ये च्यिसुङ।
11 च्येसिमा ती गो ति देर्माङ नाङ्ला ज्याक्नी ती पुम्पेजा तीला बिन्सुङ। तमा तीकी ती गो ति खोरो आमी चाला खुर्नी गाल्सुङ।
12 ती ज्युक्ला यूहन्नाकी लोमातिवा वानी यूहन्नाकी फुङ्बु ति खुर्नी कल्दोक क्यासुङ। तमा तिवा येशूकी चाला गल्नी ते च्युङ्गुप ताम्ङेतिवा खोला लाप्सुङ।
येशूकी मी तोङ्डा ङला समा नङ्गुप
(मर्कूस ६:३०-४४; लूका ९:१०-१७; यूहन्ना ६:१-१४)
13 ती थोसिमा येशू टुला जेनी तेसुर दासा कुसुमीला फेप्सुङ। खो ते फेवु थोसिमा मी माङ्छ्योक ग्येसा ग्येसा नेसुर युनी खोकी तिङ्ला तिङ्यासुङ।
14 येशू ग्येम्छो गारीला लेप्नी टु नेसुर थेन्सुङ। तमा मी माङ्छ्योकला थोङ्नी खोकी सेमला छासे च्यम्बा लानी तिवी पर्ला वोतुप नेर्पुतिवाला टेक च्यिसुङ।
15 तमा सोर्हिप गल्सिमा लोमातिवा खोकी चाला वानी, “दी ति काङ मेङ्येवु दासा पाङ्थेरी यिन, नाम साङ ल्होसुङ। तुक क्यानी दी मी माङ्छ्योकला युल युलला गल्नी खोप्रे थोक्ला साप समा ङ्योपला डो च्यी।” सिनी सिक्यासुङ।
16 यिने येशूकी लोमातिवाला “तिवा डो मोगोवी। ख्यिरा राङ तिवाला साप समा बिन।” सिनी सुङ्सुङ।
17 तमा लोमातिवी खोला “ङ्यिरा मुला याङ शुब्ज्याङ ङ ताङ ङ्या ङ्यी तिराङ वे।” सिनी सिक्यासुङ।
18 तमा येशूकी “तिवा ङे चाला खुर्नी शोक।” सिनी सुङ्सुङ।
19 तमा खोकी मी माङ्छ्योकला च वोतुप दिङ्माला दे च्यिसिमा ती शुब्ज्याङ ङ ताङ ङ्या ङ्यी ति लानी देवाच्येन ने केला ल्हानी कोन्छ्योकला थुचिछे पुल्नी तिवा च्याक्नी लोमातिवाला नाङ्सुङ, तमा लोमातिवी ती ति मीतिवाला गोनी बिन्सुङ।
20 तमा तेरी मीतिवी डाता सेक सोसिमा साङ ल्हकुप पुर्मातिवा रुनी शोम च्यिङ्ङी नाङ्ला क्येङ्सुङ।
21 ती पेला ते सापतिवा ति पुम्पेजा ताङ पेजा टिक्पेतिवा पेसिनाङ ख्योक्पेजा नाज्युङतिवा तिराङ तोङ्डा ङ चोयी नोक।
येशू ग्येम्छो खला युवु
(मर्कूस ६:४५-५६; यूहन्ना ६:१५-२१)
22 ती ज्युक्ला येशूकी मी माङ्छ्योकला तेसुर तोङ्गुप पेला खोकी लोमातिवाला शार्क्येक टुला जेनी खो सिनाङ गोमाला ग्येम्छो फर्केन ग्युक सिनी ताङ्सुङ।
23 मी माङ्छ्योकला ताङ्सिमा खो च्यिक राङ मोपोर कितुपला पम्दोकला फेप्सुङ। तमा नाम ल्होसिमा खो च्यिक राङ ते ज्युसुङ।
24 तोजो पेला लोमातिवा जेवु टु ति ग्येम्छो गारी नेवा थाक्रिङ्बु लेप्नी सिन्नोक। तमा वुर्तुक ठेक्योक्पा ग्यपुप तप्की टु ति छ्यी बालापकी पर्ला ख्येल्नी तिवाला छासे दुक्पा च्युङ्सुङ।
25 नुपला छ्युजी सुम चोयीला येशू ग्येम्छो खला युकिन सिरा लोमातिवी चाला फेप्सुङ।
26 खो ग्येम्छो खला फेपुप थोङ्सिमा लोमातिवी दी याङ र्हेन्डी के यिन्दे सिनी ज्यिवा कियी सिरा च्यार ग्यप्सुङ।
27 येशूकी शार्क्येक तिवाला “ङ्यिङ रम्बु की, ङ राङ यिन। ज्यिवा माकी।” सिनी सुङ्सुङ।
28 तमा पत्रुसकी येशूला “ओ चोवो, ख्युरुङ चोवो राङ यिन्सिन ङला छ्यी खला युनी चोवोकी चाला वुङ्गुपला क नाङ्डे की।” सिनी सिक्यासुङ।
29 खोकी पत्रुसला “शोक!” सिनी सुङ्सुङ। तमा पत्रुस टु नेसुर पाप्नी छ्यी खला युनी येशूकी चिप्ला गाल्सुङ।
30 यिने लुङ कशेन ग्यपुप थोङ्नी पत्रुस ज्यिवा लानी छ्यी नाङ्ला नुम डोप छाल्सुङ, ती पेला तीकी “ओ चोवो, ङला र्होक्टे की!” सिनी च्यार ग्यप्सुङ।
31 तमा येशूकी शार्क्येक छ्याक क्याङ्नी पत्रुसला जिम्नी, “ओ तेपा मेतुप, ख्युरुङ च्यिला तेपा माक्यानी यिन्दे मिन्दे नो किवी?” सिनी सुङ्सुङ।
32 तमा तिवा मुला राङ टी नाङ्ला शुसिमा लुङ ति कुसुमी देसुङ।
33 ती थोङ्सिमा टुला वोतुप लोमातिवी खोला शावा कियी सिरा “वुतुङ के गेकेन याङ कोन्छ्योककी सेवु राङ यिनोक।” सिनी सिक्यासुङ।
गनेसरेतकी नेर्पुतिवाला टेक च्यितुप
34 ती ज्युक्ला येशूतिवा ग्येम्छो शानी फर्केन गनेसरेत युलला लेप्सुङ।
35 खो ते फेप्सिमा ती दासाकी मीतिवी खो येशू यिन सिनी ङो शेनी गारी गुरीला वोतुप दासा तेरीला मीतिवा ताङ्नी नेर्पुतिवा तेरीला खोकी चाला टिनी लेसुङ।
36 तिवी येशूकी नम्साकी गारीला तिराङ यिन्सिनाङ रेकुप ङ्ये च्यी सिनी खोला गोङ्बा शुसुङ। तमा सी खोकी नम्साला रेक्वे, तिवा तेरी टेक्सुङ।