25
जेन्दी माक्यावु पुम्पेजा मिरा च्यिथम्बाकी पे
1 येलुङ येशूकी सुङ्सुङ, “देवाच्येनकी ग्येल्खाप ति दाक दाक्पी लकला दिप्ली खुर्नी माक्पा ठे गलुप जेन्दी माक्यावु पुम्पेजा मिरा च्यिथम्बाकी पे दोके यिन।
2 तिवी पर्ला मिरा ङ ति रिक्पा मेतुप नोक, मिरा ङ ति रिक्पा वोतुप नोक।
3 ती रिक्पा मेतुपतिवी दिप्ली ति खुर्सिनाङ नुम माखुर्नोक।
4 यिने रिक्पा वोतुपतिवी दिप्ली मुला राङ नुम खुर्नोक।
5 तमा माक्पा फिमु वावु तप्की तिवा तेरी ङि्यसोक ग्यप्नी ङ्यी गाल्नोक।
6 तमा नुप फेकाला ‘ल्होसा, माक्पा वासुङ। खोला ठेतुपला ख्यिराङ पाङ्ला शोक!’ सिरुप वोर यी ग्यप्सुङ।
7 ती वोर थोसिमा तिवा तेरी ङ्यी छेनी खोप्राङ लोला खुरुप दिप्लीतिवा नाप टुलुप छाल्सुङ।
8 ती पेला रिक्पा मेतुपतिवी रिक्पा वोतुपतिवाला ‘ख्यिरा नुम ति ङ्यिराङला च्येयी नङ्नी, च्यिलासिसिन ङ्यिरा दिप्ली याङ शेप छाल्सुङ।’ सिनी सिक्यासुङ।
9 यिने रिक्पा वोतुपतिवी ‘मेवी, तुक क्यासिन ख्यिराङ ताङ ङ्यिराङ तेरीला मलङ्गिवी। बोरु छोङ्खाङला गल्नी ख्यिराङला गोवु नुम ति ङ्योनी शोक।’ सिनी सिक्यासुङ।
10 तमा ती रिक्पा मेतुपतिवा नुम ङ्योपला गलुप पेला माक्पा वासुङ। तमा ती माक्पा ति नुम टडिक क्यान देतुप रिक्पा वोतुपतिवी मुला जेन्दीकी डेनकी खाङ्बाला शुसुङ, तमा ती खाङ्बी गो च्येसुङ।
11 ती ज्युक्ला रिक्पा मेतुपतिवा लोक्नी वानी डेनकी खाङ्बी गे चाला लानी ‘ओ चोवो, ओ चोवो, ङ्यिराङला गो पेनी।’ सिनी च्यार ग्यप्सुङ।
12 यिने माक्पा तीकी तिवाला ‘वुतुङ के ङ ख्यिराङला सिरिन, ङ ख्यिराङला ङो राङ माशे।’ सिनी सिक्यासुङ।
13 तुक क्यानी ख्यिराङ च्याङ्से देता, च्यिलासिसिन ती ङ्यिमा ताङ ती तुजे ति ख्यिराङला छ्या मे।”
सेरकी डप्बुकी पे
(लूका १९:११-२७)
14 “येलुङ देवाच्येनकी ग्येल्खाप ति मी लुङ्बा डोप पेला खोरो लावातिवाला कताङ्नी खोरो नोर टोङ्बा ति चेक तेतुप मी मिरा च्यिककी पे दोके यिन।
15 तीकी लावातिवा रे रेला दाक दाक्पी काङ अछ्योवु चोयी च्यिकला ति सेरकी डप्बु ङ, च्यिकला ति सेरकी डप्बु ङ्यी, तमा च्यिकला ति सेरकी डप्बु च्यिक तेनी खोरुङ ति मी लुङ्बा गाल्सुङ।
16 तमा सेरकी डप्बु ङ ङ्येतुप लावा ति शार्क्येक गल्नी ती टङ्गा ति छोङ क्यानी यम्बा सेरकी डप्बु ङ ल्हक्पा शम्सुङ।
17 सेरकी डप्बु ङ्यी ङ्येतुप लावा तीकी साङ तुक राङ क्यानी यम्बा सेरकी डप्बु ङ्यी ल्हक्पा शम्सुङ।
18 यिने सेरकी डप्बु च्यिक ङ्येतुप लावा ति गल्नी सला मुक्तुम टुनी ती सेरकी डप्बु ति बानी ज्याक्सुङ।
19 लो अलायी ज्युक्ला ती लावातिवी ज्यिन्दाक ति लोक्नी वासिमा खोरो लावातिवी मुला खोरो टङ्गी ची लासुङ।
20 ची लङ्गुप पेला सेरकी डप्बु ङ ङ्येतुप लावा तीकी यम्बा सेरकी डप्बु ङ साङ खुन वानी, ‘ज्यिन्दाक, ज्यिन्दाककी ङला सेरकी डप्बु ङ तेन ज्याक्सुङ। ल्हो ताङ, ङे यम्बा सेरकी डप्बु ङ ल्हक्पा शमिन।’ सिनी सिक्यासुङ।
21 तमा ज्यिन्दाक ति गा कियी सिरा ‘को छ्येसुङ, ख्युरुङ खोङ्तेर्मु ताङ लावा ल्यामु! ख्युरुङ ताम्ङे चेयीला खोङ्तेर्मु च्युङ्सुङ, तुक क्यानी ङ ख्युरुङला ताम्ङे बङी चेक तेतिन। ख्युरुङ वानी ङ ताङ मुला गा की।’ सिनी सिक्यासुङ।
22 ती ज्युक्ला सेरकी डप्बु ङ्यी ङ्येतुप लावा ति साङ वानी, ‘ज्यिन्दाक, ज्यिन्दाककी ङला सेरकी डप्बु ङ्यी तेन ज्याक्सुङ। ल्हो ताङ, ङे यम्बा सेरकी डप्बु ङ्यी ल्हक्पा शमिन।’ सिनी सिक्यासुङ।
23 तमा ज्यिन्दाक तीकी तीला ‘को छ्येसुङ, खोङ्तेर्मु ताङ लावा ल्यामु! ख्युरुङ ताम्ङे चेयीला खोङ्तेर्मु च्युङ्सुङ, तुक क्यानी ङ ख्युरुङला ताम्ङे बङी चेक तेतिन। ख्युरुङ साङ वानी ङ ताङ मुला गा की।’ सिनी सिक्यासुङ।
24 यिने सेरकी डप्बु च्यिक ङ्येतुप लावा तिङ वानी, ‘ज्यिन्दाक, ज्यिन्दाक याङ माचुवु दासा नेसुर ङकुप ताङ मातपुप दासा नेसुर रुकुप मी च्युर्वु यिन सिरुप ति ङला छ्या वे।
25 तुक क्यानी ङला ज्यिवा लासुङ, तमा गल्नी ज्यिन्दाककी ङला चेक तेतुप सेरकी डप्बु ति थली वोक्ला बानी ज्यकिन। ल्हो ताङ, ज्यिन्दाककी टङ्गा ति दे राङ वे।’ सिनी सिक्यासुङ।
26 तुक सिक्यासिमा ज्यिन्दाक तीकी तीला सिक्यासुङ, ‘ख्यो दुक्टा ताङ छेर्शिक्पा वोतुप लावा, ख्युरुङ ङला माचुवु दासा नेसुर ङकुप ताङ मातपुप दासा नेसुर रुकुप मी यिन सिनी छ्या वोतुप यिन्सिन
27 ख्योरो ङे टङ्गा पेला तङ ज्यकुप यिन्सिन ङ वासिमा ङला पे छोवु ति यिन्जा।
28 तुक क्यानी तीकी लोला वोतुप सेरकी डप्बु च्यिक तिङ ठोनी सेरकी डप्बु च्यिथम्बा वोतुप तीला बिन।
29 च्यिलासिसिन सी लोला नोके, तीला मङ तेर्किवी, तमा तीला छाछिङी डिवी। यिने सी लोला मेवे, तीकी लोला वोतुप तिङ ठोकिवी।
30 तमा दी फेन मोथोवु लावा दुक्टा तीला पाङ्ला नक्तोमीला क्युर, ते ती ङुयी सिरा स मुर्किवी।’ ”
तिङ्मी ठिम
31 “ङ मी पुज्युङ तेरी देवाच्येनकी लेन क्योलुप थुतिवी मुला खोरो मोवाला वुङ्गुप पेला ङ ति खोरो ग्येल्ठिकला देकितो।
32 तमा तेरी मिरिककी मीतिवा ङे चिप्ला जोम्गितो, ती पेला लुक गोठालाकी रा ताङ लुकला पेतुप दोके क्यानी
33 ङ रतिवाला ति यावी थाकाला ताङ लुकतिवाला ति येन्बी थाकाला पेनी ज्योकितो।
34 तमा ङे यावी थाकाकी मीतिवाला ‘ङे पपा नेमा मोलाम थोपुपतिवा! वानी जम्बुलिङ ज्येङ्गुप पे नेज्युनी ख्यिरा थोक्ला टडिक क्या ज्यकुप ग्येल्खापला ओङ्ज्येन की।
35 च्यिलासिसिन ङ ल्होवा लावु पेला ख्यिरा ङला साप समा बिन्सुङ, कोम्बा लावु पेला थुङ्गुप छ्यु बिन्सुङ, थाक्रिङ्बुकी मी यिन्दुप पेला ख्यिरा खाङ्बाला ङला गासो शुसुङ।
36 ङ पेर्तुङ्बा वोतुप पेला ख्यिरा ङला मज्या कोन बिन्सुङ, नान वोतुप पेला ङला ल्हटे क्यासुङ, चोन्खाङला शोरुप पेला ङला ठेतुपला वासुङ।’
37 तमा यावी थाकाला वोतुप कोन्छ्योककी थोङ्दाङला टेङ्बु वोतुपतिवी ङला दुक सिवी, ‘ओ चोवो, नम ङ्यिरा चोवोला ल्होवा लावु थोङ्नी समा बिन्सुङ? कोम्बा लावु थोङ्नी थुङ्गुप छ्यु बिन्सुङ?
38 तमा थाक्रिङ्बुकी मी यिन्दुप पेला गासो शुसुङ? पेर्तुङ्बा वोतुप थोङ्नी मज्या कोन बिन्सुङ?
39 तमा नम नान वोतुप याङ्ना चोन्खाङला शोरुप थोङ्नी ल्हा वासुङ?’
40 तमा ङे तिवाला दुक सिवी, ‘वुतुङ के ङ ख्यिराङला सिरिन, ख्यिरा दे वोतुपतिवी पर्ला तेरी सिनाङ छ्युङा मिरा च्यिकला काङ क्यावे, ती ति ङला राङ क्यावु यिन।’
41 ती ज्युक्ला ङे येन्बी थाकाला वोतुपतिवाला दुक सिवी, ‘ख्यिराङ मोताप सुकुप मीतिवा! ङे चा नेमा थेन गल्नी शैतान ताङ तीकी डेतिवी थोक्ला टडिक क्यावु नाम्साङ मिशिवु मे नाङ्ला ग्युक।
42 च्यिलासिसिन ङ ल्होवा लावु पेला ख्यिरा ङला साप समा माबिन, कोम्बा लावु पेला ङला थुङ्गुप छ्यु माबिन,
43 थाक्रिङ्बुकी मी यिन्दुप पेला ख्यिरा खाङ्बाला ङला गासो माशु, पेर्तुङ्बा वोतुप पेला मज्या कोन माबिन, तमा नान वोतुप याङ्ना चोन्खाङला शोरुप पेला ङला ठेतुपला माङु।’
44 तमा तिवी ङला दुक सिवी, ‘ओ चोवो, नम ङ्यिरा चोवोला ल्होवा लावु ताङ कोम्बा लावु ताङ थाक्रिङ्बुकी मी यिन्दुप पेला ताङ पेर्तुङ्बा वोतुप ताङ नान वोतुप ताङ चोन्खाङला शोरुप थोङ्नी ख्युरुङला शब्ज्यी माक्या वे?’
45 ती पेला ङे तिवाला दुक सिवी, ‘वुतुङ के ङ ख्यिराङला सिरिन, ख्यिरा दे वोतुपतिवी पर्ला तेरी सिनाङ छ्युङा मिरा च्यिकला काङ माक्यावे, ती ति ङला राङ माक्यावु यिन।’
46 तुक क्यानी तिवा नाम्साङ मिसिन्दुप ङ्येलाला लुम्गिवी, तमा कोन्छ्योककी थोङ्दाङला टेङ्बु वोतुपतिवाला ति नाम्साङ मिशिवु मिजी थोप्किवी।”