7
Ñani Jesús, ñatu n‑ka jandixa‑s‑ia
Na n‑yaꞌa xaꞌa, te n‑xikonuu Jesús distrito Galilea. Ña n‑juini‑ia xa kuikonuu‑ia distrito Judea, xaxeꞌe xa ka juini se Israel xa kaꞌni ñaꞌa‑s. Te vax kuyatni viko ñayiu Israel, viko nani Viko Veꞌe Yutnu Vixi. N‑ka jaꞌan ñani Jesús nuu‑ia:
—Maxku ndoo ka‑n yaꞌa. Juan naꞌi Judea, na jini koio se dakuaꞌa‑n milagru kida‑n. Ɨɨn seyɨɨ, nux juini‑s xa jini ñaꞌa koio ñayiu, ma kada‑s tniu xa naꞌi. Nux kida‑n milagru, dandeꞌa mee‑n ntdaa ñayiu.
Duꞌa n‑ka jaꞌan ñani‑ia, chi xaxeꞌe xa ña n‑ka jandixa‑s‑ia. N‑jaꞌan Jesús:
—Ta xee ka hora‑r. Ko hora mee‑n, davaꞌa nga hora io vaꞌa. Ma kuaꞌa xa jini uꞌu ñaꞌa ñayiu ñuñayiu mee‑n. Mee‑r, ka xini uꞌu ñaꞌa‑i, chi jaꞌan ndaa‑r xaxeꞌe‑i xa ka kida‑i xa uꞌu. Juan naꞌi koio mee‑n viko. Ma jɨꞌɨn‑r viko yaꞌa vitna, chi ta xee ka hora‑r.
Duꞌa n‑jaꞌan‑ia, te n‑ndoo‑ia Galilea.
N‑xo tuu Jesús Viko Veꞌe Yutnu Vixi
10 Ko na n‑yaꞌa xa ka xeꞌen ñani‑ia viko, te n‑kee mee‑ia juaꞌan‑ia tuku. Ña juaꞌan‑ia xiꞌin kueꞌe ñayiu, chi naꞌi ni juaꞌan‑ia. 11 Te ka nanduku se Israel mee‑ia viko ijan. N‑ka jaꞌan‑s:
—¿Nde io se ijan?
12 Te ijan xyuku kueꞌe xa kueꞌe ñayiu. Ka ndatnuꞌu‑i xa ka kakuneꞌe‑i Jesús, ko naꞌi ni. Dava‑i n‑ka jaꞌan: “Se vaꞌa kuu‑s”, ko dava‑i n‑ka jaꞌan: “Ña ndaa, chi dandaꞌu‑s ñayiu yaꞌa.”
13 Ko ni ɨɨn ñayiu ña n‑jaꞌan xee, chi n‑ka yuꞌu‑i nuu se Israel.
14 Na ñudava viko, te n‑xe xee Jesús nde veñuꞌu Jerusalén, te n‑kixeꞌe‑ia xa dakuaꞌa‑ia ñayiu. 15 Ña n‑ka kutnuni ini se Israel janda kuu xa dakuaꞌa‑ia ñayiu. N‑ka jaꞌan‑s:
—¿Janda kuu xa tuꞌa vaꞌa se yaꞌa? Mee‑s ña n‑kaꞌu‑s kueꞌe kuia.
16 N‑jaꞌan Jesús:
—Xa dakuaꞌa‑r ñayiu, ñatu kuu xa xani ini mee‑r. Xa dakuaꞌa‑r‑yɨ, kuu xa xani ini Ia n‑tundaꞌa ñaꞌa mee‑r. 17 Nux juini ɨɨn ñayiu xa kada‑i xa juini Ianyuux, kutnuni ini‑i nux tnuꞌu jaꞌan‑r kuu tnuꞌu Ianyuux a tnuꞌu mee‑r. 18 Ɨɨn seyɨɨ, nux jaꞌan‑s xa xani ini mee‑s, juini‑s xa koo koio ñayiu xañuꞌu nuu mee‑s. Ko ɨɨn seyɨɨ, nux juini‑s xa ndadakaꞌnu ñayiu Ia n‑tundaꞌa ñaꞌa vaxi‑s, se ijan, se ndaa kuu‑s. Kada‑s xavaꞌa, te ma kada‑s ni ɨɨn xa uꞌu.
19 ʼ¿Ña ndaa xa n‑taxi Moisés tnuꞌu taꞌu tniu mee‑n a? Ko ñayo‑n ka kida ná jaꞌan tnuꞌu taꞌu tniu. ¿Nakuenda juini‑n xa kaꞌni ñaꞌa koio‑n?
20 N‑ka jaꞌan ñayiu jan:
—¡N‑nduloko‑n! ¿Jundu juini xa kaꞌni ñaꞌa‑i?
21 N‑jaꞌan Jesús:
—Idini tniu n‑kida‑r kɨu ndetatu‑ro, te ñatu ka kutnuni ini‑n. 22 N‑jaꞌan Moisés xa io xa kaꞌnde‑n ñɨɨ nuu ii ntdaa seyɨɨ Israel. (Te kueꞌe kuia antecas xa jaꞌan Moisés, te n‑ka xaꞌnde taxaꞌnu tnetnu‑n ñɨɨ nuu ii seyɨɨ.) Kɨu ndetatu‑ro ka xaꞌnde koio mee‑n ñɨɨ nuu ii seyɨjɨn. 23 Ka xaꞌnde‑s ñɨɨ nuu ii ɨɨn seyɨjɨn, juini kɨu ndetatu‑ro kuu, xa kada koio‑n xa jaꞌan tnuꞌu n‑chidotnuni Moisés. ¿Nax kuu xa ka kiti ini‑n nuu mee‑r xaxeꞌe xa n‑ndadavaꞌa‑r ɨɨn se kuꞌu kɨu ndetatu‑ro? 24 Maxku kada uꞌu koio‑n ɨɨn seyɨɨ antecas xa kutnuni ini koio‑n nax n‑kida‑s. Io xa vaꞌa ndadandaa koio‑n ntdaa ñayiu.
Jesús jaꞌan ndexu vaxi‑ia
25 Te n‑ka jaꞌan dava ñayiu Jerusalén:
—Se yaꞌa, ¿ña dɨu se yaꞌa ka juini se ñuu‑ro xa kaꞌni koio‑s a? 26 Jira, jaꞌan‑s nuu ntdaa ñayiu, te se ñuu‑ro, ni ɨɨn tnuꞌu ña ka jaꞌan‑s nuu‑s. ¿Ka jandixa sexaꞌnu ñuu‑ro xa ndaa xa kuu‑s Cristu, Ia tundaꞌa Ianyuux a? 27 Ko se yaꞌa, xini‑ro nde n‑kixi‑s. Na kixi Cristu, te ma jini ni ɨɨn ñayiu nde kixi‑s.
28 Xijan kuu xa xee n‑jaꞌan Jesús veñuꞌu nuu dakuaꞌa‑ia ñayiu:
—Ka jaꞌan‑n xa ka xini ñaꞌa‑n mee‑r. Ka jaꞌan‑n xa ka xini‑n ndexu vaxi‑r. Xaxeꞌe mee‑r, ñatu vaxi‑r. Ia ndaa kuu Ia n‑tundaꞌa ñaꞌa mee‑r vaxi. Mee‑ia, ñatu ka xini‑n. 29 Mee‑r, joon, xini‑r‑ia, chi vaa‑r nde nuu tuu‑ia, te mee‑ia n‑tundaꞌa ñaꞌa vaa‑r.
30 Te n‑ka juini‑s xa tnɨɨ presu koio‑s‑ia. Ko ni ɨɨn‑s ña n‑ka tnɨɨ‑s‑ia, chi ta xee ka hora‑ia. 31 Ko kueꞌe ñayiu jan n‑ka jandixa‑ia. N‑ka jaꞌan‑i:
—Cristu, Ia tundaꞌa Ianyuux, na kixi mee‑ia, ¿kada‑ia kueꞌe ka milagru dada xa n‑kida se yaꞌa u?
Se fariseu, n‑ka tundaꞌa‑s ausiliu xa jɨn tnɨɨ presu koio‑s Jesús
32 Te n‑ka tekutnuꞌu se fariseu xa duꞌa ka kakuneꞌe kueꞌe ñayiu jan Jesús. Mee‑s, xiꞌin se ka taxnuni nuu ñayiu Israel, n‑ka tundaꞌa‑s ausiliu, xa jɨn tnɨɨ presu koio‑s Jesús. 33 Te n‑jaꞌan Jesús:
—Xaku nga kɨu kutuu‑r xiꞌin‑n, te dada nuꞌu‑r nuu tuu Ia n‑tundaꞌa ñaꞌa. 34 Nanduku ñaꞌa koio‑n, ko ma naniꞌi ñaꞌa‑n. Chi mayo‑n kuaꞌa xa jɨꞌɨn‑n nuu kutuu mee‑r.
35 Te n‑ka kixeꞌe se Israel xa ka xijan tnuꞌu tnaꞌa‑s:
—¿Ndexu jɨꞌɨn se yaꞌa, xa ma naniꞌi‑ro‑s? ¿Jɨꞌɨn‑s nde ñuu setoꞌo, nuu tuu ñayiu Israel meꞌñu ñayiu ka jaꞌan tnuꞌu griegu a? ¿Ijan dakuaꞌa‑s ñayiu toꞌo, ñayiu ñatu jandixa Ianyuux a? 36 ¿Nax juini kachi xa jaꞌan‑s: “Nanduku ñaꞌa koio‑n, ko ma naniꞌi ñaꞌa‑n, chi mayo‑n kuaꞌa xa jɨꞌɨn‑n nuu kutuu mee‑r”?
Ñayiu ka jandixa Cristu, nde anu‑i kane ndute ndito kida xa kutuu vaꞌa koio‑i
37 Kɨu xinokava viko, kɨu kaꞌnu ka viko kuu, daa n‑xo nujuiin Jesús, te n‑jaꞌan‑ia:
—Nux yichi ɨɨn ñayiu, na kunduu‑i xiꞌin mee‑r, te koꞌo‑i. 38 Ná jaꞌan tnuꞌu Ianyuux, duꞌa koo. Ñayiu ka jandixa ñaꞌa mee‑r, nde anu‑i kane ndute ndito kida xa kutuu vaꞌa koio‑i.
39 Ko duꞌa n‑kakuneꞌe‑ia Espíritu Ianyuux tnɨɨ koio ñayiu jandixa Jesús. Chi ta kixi ka Espíritu Ianyuux, xaxeꞌe xa ta ndadakaꞌnu ka Ianyuux Jesús.
Dava ñayiu, n‑ka jandixa‑i Cristu, ko dava‑i, ñaꞌa
40 Dava ñayiu jan, na n‑ka teku‑i tnuꞌu yaꞌa, n‑ka jaꞌan‑i:
—Se yaꞌa, xandaa kuu xa kuu‑s se xian tnuꞌu tnuꞌu Ianyuux nuu ñayiu.
41 Dava‑i n‑ka jaꞌan:
—Se yaꞌa kuu Cristu, Ia tundaꞌa Ianyuux.
Ko dava‑i n‑ka jaꞌan:
—¿Ñuu Galilea ni kixi Cristu a? Ña ndaa. 42 Jaꞌan tnuꞌu Ianyuux xa Cristu ku kuu ɨɨn daꞌya dana David. Jaꞌan xa kixi‑ia nde ñuu nani Belén, ñuu David.
43 Xijan kuu xa xaxeꞌe mee‑ia, ñatu n‑kuu ɨɨn nuu ñayiu xyuku ijan. 44 Te dava‑i n‑ka juini xa tnɨɨ presu koio‑i‑ia, ko ni ɨɨn‑i ña n‑kuyɨɨ xa tnɨɨ‑i‑ia.
Sexaꞌnu ka taxnuni nuu ñayiu Israel, ña n‑ka jandixa‑s Jesús
45 Ijan n‑ka naxee ausiliu, nuu xtuu se fariseu xiꞌin dutu ka taxnuni. N‑ka jaꞌan se fariseu xiꞌin dutu:
—¿Nakuenda ña n‑ka ndeka‑n‑sɨ kixi?
46 N‑ka jaꞌan ausiliu:
—Nuncas ña n‑jaꞌan ɨɨn seyɨɨ ná jaꞌan se yaꞌa.
47 Te n‑ka jaꞌan se fariseu:
—¿Ndɨꞌɨ ndoꞌo, n‑dandaꞌu ñaꞌa‑s tuku a? 48 Sexaꞌnu ka taxnuni nuu ñayiu Israel, xiꞌin se fariseu, ¿mee‑s n‑ka jandixa se yaꞌa u? ¡Ñaꞌa! 49 ¡Ñayiu lilu ka kuu ñayiu! Ña ka xini‑i tnuꞌu n‑chidotnuni Moisés. ¡Na kada uꞌu Ianyuux mee‑i, ntdaa‑i!
50 Te dada n‑jaꞌan ɨɨn se nani Nicodemo. Nicodemo kuu se n‑xe kotoniꞌni Jesús ɨɨn xakuaa. Se fariseu kuu‑s, ná ka kuu seyɨɨ xyuku ijan. N‑jaꞌan‑s nuu‑s:
51 —¿Nax jaꞌan tnuꞌu n‑chidotnuni Moisés? ¿Vatuka xa kada uꞌu‑ro ɨɨn seyɨɨ, antecas xa kunini‑ro xa jaꞌan‑s xaxeꞌe mee‑s a? ¿Vatuka xa kada uꞌu‑ro‑s, antecas xa kutnuni ini‑ro nax n‑kida‑s a?
52 N‑ka jaꞌan‑s:
—¿Ndoꞌo tuku, se Galilea kuu‑n a? Kaꞌu ka tnuꞌu Ianyuux, te jini‑n xa nde Galilea, nuncas ña n‑kixi se xian tnuꞌu tnuꞌu Ianyuux nuu ñayiu.
53 Te nuu dɨɨn ka nuꞌu‑s veꞌe‑s.