10
Maxku kada ni ɨɨn ñayiu xa dandoo tnaꞌa ɨɨn seyɨɨ xiꞌin ñadɨꞌɨ‑s
(Mt. 19:1‑12; Lc. 16:18)
1 Ijan n‑kee Jesús, te n‑xee‑ia distrito Judea nde ɨnka lado deꞌva Jordán. N‑ka taka kueꞌe xa kueꞌe ñayiu ijan, te ɨnka vuelta n‑kixeꞌe Jesús xa dakuaꞌa‑ia‑i.
2 N‑ka kuyatni se fariseu, xa kototnuni‑s‑ia, te n‑xijan tnuꞌu‑s‑ia:
—¿Vatuka xa dandoo ɨɨn seyɨɨ ñadɨꞌɨ‑s, a ñaꞌa u?
3 N‑xiaꞌan‑ia:
—¿Nax n‑taꞌu tniu Moisés?
4 N‑ka xiaꞌan‑s:
—N‑xejoon Moisés xa kadavaꞌa ɨɨn seyɨɨ ɨɨn tutu xa dandoo‑s ñadɨꞌɨ‑s.
5 N‑xiaꞌan Jesús:
—Xaxeꞌe xa unu xee ini‑n n‑kidavaꞌa Moisés tnuꞌu taꞌu tniu yaꞌa.
6 Ko kiꞌna nuu, na n‑kidavaꞌa Ianyuux ntdaa xa io, “n‑kidavaꞌa‑ia seyɨɨ xiꞌin ñadɨꞌɨ”.
7 “Xijan kuu xa dandoo seyɨɨ taa‑s, dɨꞌɨ‑s, xa kutuu‑s xiꞌin ñadɨꞌɨ n‑tnundaꞌa xiꞌin‑s.
8 Te mee‑s xiꞌin ñadɨꞌɨ‑s, nduu‑s xiꞌin‑ña, kuu idini ñayiu. Ñatuka kuu‑s uu ñayiu, chi idini ñayiu n‑nduu‑s.”
9 N‑kida Ianyuux xa idini ñayiu ka kuu‑s, te xijan kuu xa maxku kada ni ɨɨn ñayiu xa dandoo tnaꞌa‑s.
10 Ɨnka vuelta xiti veꞌe, n‑ka xijan tnuꞌu se dakuaꞌa Jesús nax juini kachi tnuꞌu n‑jaꞌan‑ia.
11 N‑xiaꞌan‑ia:
—Nux dandoo ɨɨn seyɨɨ ñadɨꞌɨ‑s, te natnundaꞌa‑s xiꞌin ɨnka ñadɨꞌɨ, kida‑s kuechi nuu ñadɨꞌɨ kiꞌna nuu.
12 Te nux dandoo ɨɨn ñadɨꞌɨ yɨɨ‑ña, te natnundaꞌa‑ña xiꞌin ɨnka seyɨɨ, dɨuni kida‑ña kuechi tuku.
N‑jaꞌan Jesús: “Juejoon koio‑n xa kix koio sekuechi, dichi kuechi nuu mee‑r”
(Mt. 19:13‑15; Lc. 18:15‑17)
13 Te ijan xndeka ñayiu sekuechi xiꞌin dichi kuechi nuu Jesús, xa kajan ndodo‑ia ndaꞌa‑ia dɨkɨ‑s. Ko se dakuaꞌa‑ia n‑ka kudeen nuu ñayiu jan.
14 Na n‑xini Jesús nax ka kida se dakuaꞌa‑ia, n‑kiti ini‑ia. N‑xiaꞌan‑ia:
—Juejoon xa na kix naꞌi sekuechi, dichi kuechi nuu mee‑r, maxku kudeen ka‑n nuu ñayiu de. Chi ná kuu sekuechi, dichi kuechi yaꞌa, da kuu ñayiu kutuu vaꞌa nuu taxnuni Ianyuux.
15 Xandaa kuu xa jaꞌan‑r. Io xa ku kuu koio ñayiu ná kuu sekuechi, dichi kuechi yaꞌa. Ndeda ɨɨn ñayiu ma juejoon xa taxnuni Ianyuux anu‑i, nuncas ma kuaꞌa‑i xa kutuu vaꞌa‑i xiꞌin Ianyuux.
16 N‑nundee‑ia sekuechi xiꞌin dichi kuechi jan, te n‑xajan ndodo ndaꞌa‑ia dɨkɨ‑s, te n‑xiaꞌan‑ia:
—Na kada Ianyuux xa kutuu vaꞌa koio‑n ntdaa‑n.
N‑ndatnuꞌu Jesús xiꞌin ɨɨn se kuika
(Mt. 19:16‑30; Lc. 18:18‑30)
17 Na n‑kee Jesús xa jɨꞌɨn‑ia, te xino ɨɨn seyɨɨ vaxi ichi ijan. N‑xe juiin xiti‑s nuu Jesús, te n‑xijan tnuꞌu‑s:
—Maestru vaꞌa, ¿nax kada‑da xa niꞌi‑da xa kutuu‑da xiꞌin Ianyuux kuia ma jɨn ndɨꞌɨ?
18 N‑xiaꞌan Jesús:
—¿Nakuenda jaꞌan‑n xa vaꞌa mee‑r? Ni ɨɨn ñayiu ña vaꞌa. Idini Ianyuux vaꞌa.
19 Vaꞌa xini‑n tnuꞌu n‑taꞌu tniu Moisés: “Maxku kaꞌni‑n ndɨyɨ. Maxku dandoo‑n ñadɨꞌɨ‑n xa kidi‑n xiꞌin ɨnka ñadɨꞌɨ. Maxku duꞌu‑n. Maxku tekuechi‑n ñayiu tnuꞌu ña ndaa. Maxku dandaꞌu‑n ñayiu. Koo xañuꞌu nuu taa‑n, nuu dɨꞌɨ‑n.”
20 N‑xiaꞌan‑s:
—Maestru, ntdaa xaꞌa kida‑da nde na luchi‑da.
21 Ndeꞌa Jesús se ijan, te n‑xemani‑ia‑s, te n‑jaꞌan‑ia:
—Idinga xa io xa kada‑n. Juaꞌan, te diko‑n ntdaa xaxii‑n, te juñaꞌa‑n nuu ñayiu kundaꞌu. Te niꞌi‑n xa vaꞌa ka andɨu. Neꞌe, te doko‑n curuxi, ná doko ɨɨn seyɨɨ curuxi‑s xa kuitakaa‑s, te kunduu‑n xiꞌin mee‑r.
22 Ko se ijan, na n‑teku‑s tnuꞌu Jesús, te yo n‑kukoꞌyo ini‑s. Tnau ini‑s juaꞌan‑s, chi kueꞌe xaxii‑s io.
23 Ndeꞌa Jesús nuu ntdaa se dakuaꞌa‑ia xtuu ijan, te n‑xiaꞌan‑ia:
—Naka uꞌu kuaꞌa se kuika xa xee‑s nuu taxnuni Ianyuux.
24 Te n‑ka yuꞌu se dakuaꞌa‑ia xaxeꞌe tnuꞌu‑ia. Ɨnka vuelta n‑jaꞌan‑ia:
—Daꞌya‑r, naka uꞌu kuaꞌa ñayiu nevaꞌa kueꞌe xaxii‑i, xa kɨu‑i nde nuu taxnuni Ianyuux.
25 Yo uꞌu xa yaꞌa kɨtɨ nani camello yau yɨkɨ kiku, ko uꞌu ka xa kɨu ɨɨn se kuika nde nuu taxnuni Ianyuux.
26 Loko n‑ka yuꞌu se dakuaꞌa‑ia. N‑ka xijan tnuꞌu tnaꞌa‑s:
—Xijan kuu xa, ¿jundu kuaꞌa xa dakaku‑i mee‑i, xa ma jɨꞌɨn‑i andea?
27 N‑nukondeꞌa Jesús se ijan, te n‑xiaꞌan‑ia:
—Meni mee ñayiu, ña kuaꞌa‑i xa dakaku‑i mee‑i, ko Ianyuux, joon, kuaꞌa‑ia xa dakaku‑ia‑i. Chi ntdaa xa kuaꞌa Ianyuux xa kada‑ia.
28 N‑kixeꞌe Spedru xa jaꞌan‑s nuu‑ia:
—Mee‑da, n‑ka dandoo‑da ntdaa, xa kunduu‑da xiꞌin mee‑n.
29 N‑xiaꞌan Jesús:
—Xandaa kuu xa jaꞌan‑r. Ɨɨn seyɨɨ, nux n‑dandoo‑s veꞌe‑s a ñani‑s a kuꞌa‑s a dɨꞌɨ‑s a taa‑s a ñadɨꞌɨ‑s a daꞌya‑s a xaxii‑s, xaxeꞌe mee‑r xiꞌin xaxeꞌe tnuꞌu Ianyuux, te kueꞌe ka natnɨɨ‑s.
30 Nde ɨɨn cientu ka veꞌe, ñani‑s, kuꞌa‑s, dɨꞌɨ‑s, daꞌya‑s, xaxii‑s natnɨɨ‑s, juini ka kida uꞌu ñaꞌa ñayiu mee‑s. Antecas xa ndixi mee‑r, natnɨɨ‑s ntdaa xijan, te na ndixi‑r, kutuu vaꞌa‑s xiꞌin Ianyuux kuia ma jɨn ndɨꞌɨ.
31 Kueꞌe ñayiu xndodo nuu vitna, ko kɨu ijan dɨu‑i nukuitandijun koio. Te ñayiu xndijun koio vitna, dɨu‑i nujuindodo nuu koio kɨu ijan.
Vuelta kuu uni n‑jaꞌan Jesús xa io xa kuú‑s
(Mt. 20:17‑19; Lc. 18:31‑34)
32 Te ka xika Jesús xiꞌin se dakuaꞌa‑ia juaꞌan ichi xe xee nde ñuu Jerusalén. Ndodo nuu Jesús, te n‑ka yuꞌu se dakuaꞌa‑ia. Xndijun‑s‑ia, te n‑ka yuꞌu‑s. Ɨnka vuelta ndeka dɨɨn‑ia n‑uxi uu se dakuaꞌa‑ia juaꞌan, te n‑kixeꞌe‑ia xa jaꞌan‑ia nuu‑s nax yaꞌa‑ia.
33 N‑xiaꞌan‑ia:
—Vitna, jɨn xee‑ro Jerusalén, te diko ɨɨn seyɨɨ Se kuu ñani tnaꞌa ñayiu, nuu dutu ka taxnuni, xiꞌin se ka tuꞌa vaꞌa tnuꞌu n‑chidotnuni Moisés. Taꞌu tniu koio‑s xa kuú Se kuu ñani tnaꞌa ñayiu, te kandeka ñaꞌa‑s jɨꞌɨn nuu ñayiu ña ka kuu ñayiu Israel.
34 Kada koio ñayiu ña ka kuu ñayiu Israel xa januu, te tudɨɨ ñaꞌa koio‑i. Chirrión ñɨɨ janñaꞌa‑i, te kaꞌni ñaꞌa‑i. Ko nuu uni kɨu, nandoto‑s.
Jacobo xiꞌin Sua, n‑xijan‑s xamani Jesús
(Mt. 20:20‑28)
35 Ijan dada, n‑ka kuyatni Jacobo xiꞌin Sua nuu Jesús. Daꞌya yɨɨ Zebedeo ka kuu‑s. Te n‑ka jaꞌan‑s:
—Maestru, ka juini‑da xa kada ñaꞌa‑n davaꞌa nga xa kajan‑da nuu‑n.
36 N‑xiaꞌan‑ia:
—¿Nax ka juini‑n xa kada‑r xaxeꞌe‑n?
37 N‑ka jaꞌan‑s:
—Juejoon‑n xa ɨɨn‑da nkoo ndaꞌa kuaꞌa‑n, te ɨnka‑da nkoo ndaꞌa datni‑n, hora na taxnuni‑n.
38 N‑xiaꞌan‑ia:
—Ña ka kutnuni ini‑n nax ka xijan‑n. ¿Kuaꞌa‑n xa kueꞌe vida yaꞌa koio mee‑n, ná kueꞌe vida yaꞌa mee‑r a? Xa kueꞌe vida yaꞌa mee‑r, kuu ná kuu xa koꞌo‑r ɨɨn taxa ñuꞌu ɨɨn xa yo ndeꞌe ua. Kuu ná kuu xa dajuendute ñaꞌa se diko ñaꞌa. ¿Kuaꞌa‑n xa kundee ini mee‑n, nux duꞌa koo a?
39 N‑ka xiaꞌan‑s:
—Joon, kuaꞌa‑da.
N‑xiaꞌan Jesús nuu‑s:
—Xandaa kuu xa kueꞌe vida yaꞌa koio mee‑n, ná kueꞌe vida yaꞌa mee‑r. Nani kada ñaꞌa koio‑s mee‑r, dani kada ñaꞌa koio‑s mee‑n. Kuu ná kuu xa kada koio‑s xa koꞌo‑n ɨɨn xa ua, te kuu ná kuu xa dajuendute ñaꞌa koio‑s mee‑n tuku.
40 Ko ma jaꞌan mee‑r jundu nkoo ndaꞌa kuaꞌa‑r, te jundu nkoo ndaꞌa datni‑r. Ntdaa xá io tuꞌa, te mee Taa‑r jaꞌan jundu nkoo ijan.
41 Na n‑ka teku uxi ka‑s nax n‑ka xijan Jacobo xiꞌin Sua nuu Jesús, te n‑ka kixeꞌe‑s xa kiti ini‑s nuu‑s.
42 N‑kana Jesús uxi ka se ijan xa xee koio‑s nuu‑ia, te n‑xiaꞌan‑ia:
—Xini‑n nax ka kida se taxnuni nuu ñayiu ña ka kuu ñayiu Israel. Io xa koo koio ntdaa ñayiu xañuꞌu nuu‑s. Ka kunuu‑s nuu ñayiu. Se kunxaꞌnu ka ñayiu ña ka kuu ñayiu Israel, yo ndeꞌe ka taꞌu tniu‑s nuu ñayiu.
43 Ko mee‑n, maxku duꞌa kada koio‑n. Ndeda ɨɨn‑n juini xa kunxaꞌnu ka‑n, io xa junukuechi‑n nuu ntdaa‑n.
44 Ndeda ɨɨn‑n juini xa juindodo nuu‑n nuu ntdaa‑n, io xa kadatniu duꞌa‑n nuu dava ka‑n.
45 Nde Se kuu ñani tnaꞌa ñayiu, ña n‑kixee‑s xa junukuechi ñayiu nuu mee‑s. Chi n‑kixee‑s xa junukuechi mee‑s nuu ñayiu. N‑kixee‑s xa chiyaꞌu‑s kuechi ñayiu. Kuú mee‑s, xa maxku kuú koio ñayiu xiꞌin kuechi‑i.
N‑ndadavaꞌa Jesús se kuaa nani Bartimeo
(Mt. 20:29‑34; Lc. 18:35‑43)
46 Ijan n‑kee‑ia, te n‑xee‑ia xiꞌin se dakuaꞌa‑ia ñuu nani Jericó. Ijan n‑ndee‑ia xiꞌin se dakuaꞌa‑ia, te kueꞌe xa kueꞌe ñayiu. Ɨɨn xio ichi ijan nukoo ɨɨn seyɨɨ nani Bartimeo. Daꞌya yɨɨ Timoteo kuu‑s. Se kuaa kuu‑s, te xijan ndaꞌu‑s ñayiu ka yaꞌa ichi ijan.
47 Na n‑teku‑s xa yaꞌa Jesús, se Nazaret, ichi ijan, n‑kixeꞌe‑s xa kana xee‑s. N‑jaꞌan‑s:
—¡Jesús, daꞌya dana se kunxaꞌnu ka David, kundau ini ñaꞌa‑n!
48 N‑ka kudeen kueꞌe ñayiu jan nuu‑s, xa maxku kana ka‑s, ko niꞌi ka n‑kana xee‑s:
—¡Daꞌya dana se kunxaꞌnu ka David, kundau ini ñaꞌa‑n!
49 Nujuiin Jesús, n‑xiaꞌan‑ia:
—Kana‑s, na kixi‑s.
N‑ka kana‑s se kuaa. N‑ka jaꞌan‑s:
—Koo kaꞌnu anu‑n. Chi kana ñaꞌa‑ia mee‑n.
50 N‑dajane‑s doo‑s, te tunga n‑ndojuiin‑s, xa xee‑s nuu Jesús.
51 N‑jaꞌan Jesús nuu‑s:
—¿Nax juini‑n xa kada‑r xaxeꞌe‑n?
N‑xiaꞌan se kuaa:
—Maestru, juini‑da xa nukondeꞌa‑da.
52 N‑xiaꞌan Jesús nuu‑s:
—Juan nuꞌu veꞌe‑n. Xaxeꞌe xa jandixa ñaꞌa‑n, n‑ndvaꞌa‑n vitna.
Hora ijan ni n‑nukondeꞌa‑s, te n‑xe kuitandijun‑s Jesús juaꞌan ichi.