12
N‑jaꞌan Jesús xa se ka taxnuni nuu ñayiu Israel, n‑ka kida‑s xa uꞌu
(Mt. 21:33‑46; Lc. 20:9‑19)
Te ijan n‑kixeꞌe Jesús xa jaꞌan‑ia ɨɨn tnuꞌu, xa dakuaꞌa‑ia ñayiu ijan:
—Ɨɨn seyɨɨ n‑dakeé kueꞌe yutnu uva. N‑kidavaꞌa‑s yuꞌa yuú. N‑chixaku‑s yutnu uva. N‑kidavaꞌa‑s ɨɨn pozo kaꞌnu, nuu kiꞌni‑s ndudi uva. Te n‑kidavaꞌa‑s ɨɨn veꞌe yuú, ɨɨn veꞌe dujun, xa junuu‑s yutnu uva ijan.
ʼN‑xajan ndee‑s ñuꞌu yutnu uva nuu uni koon seyɨɨ, xa kadatniu koio‑s nuu ñuꞌu‑s, te mee‑s n‑kee‑s. Juaꞌan‑s ɨɨn ñuu xika. Na n‑xee yoo xichi uva, n‑tundaꞌa‑s ɨɨn se xinokuechi nuu‑s juaꞌan‑s nuu se ka kidatniu nuu ñuꞌu‑s, xa tnɨɨ‑s uva xa kaneꞌe‑s nuꞌu nuu‑s. Ko se ka kidatniu nuu ñuꞌu‑s, n‑ka tnɨɨ‑s se xinokuechi jan. N‑ka janñaꞌa‑s, te n‑ka nakuijun ñaꞌa‑s. Ni ɨɨn xavidi yutnu uva, ña n‑tnɨɨ xtoꞌo‑tnu. Ɨnka vuelta, n‑tundaꞌa xtoꞌo‑tnu ɨnka se xinokuechi nuu‑s nuu se ñunuu yutnu uva‑s. N‑ka janñaꞌa‑s, te n‑ka taꞌu‑s dɨkɨ‑s. Kuiꞌa n‑ka jaꞌan‑s nuu‑s. Ɨnka ntuku se xinokuechi nuu‑s, n‑tundaꞌa ntuku‑s. Se ijan, n‑ka xaꞌni‑s. Te kueꞌe ɨnka‑s. Dava‑s n‑ka janñaꞌa‑s, te dava‑s n‑ka xaꞌni ñaꞌa‑s.
ʼIdinga seyɨɨ n‑ndoo xiꞌin‑s. Daꞌya mani‑s kuu‑s. N‑tundaꞌa‑s daꞌya‑s, ndijun nga‑s juaꞌan, nuu se ka kidatniu nuu ñuꞌu‑s. N‑jaꞌan‑s: “Koo koio‑s xañuꞌu nuu daꞌya‑r.” Ko se ka kidatniu nuu ñuꞌu‑s, n‑ka jaꞌan nuu tnaꞌa mee‑s: “Se yaꞌa vaxi xa tnɨɨ‑s ntdaa xaxii xtoꞌo‑ro. ¡Na jɨꞌɨn‑ro! Kaꞌni‑ro‑s, te ndoo mee‑ro xiꞌin ntdaa xaxii‑s.” N‑ka tnɨɨ ñaꞌa‑s, te n‑ka xaꞌni ñaꞌa‑s. N‑ka dajane‑s ndɨyɨ yata yuꞌa yuú yutnu uva.
Te n‑xijan tnuꞌu Jesús:
—Xijan kuu xa, ¿nax kada xtoꞌo ñuꞌu yutnu uva? Jɨꞌɨn‑s, te danaa‑s se ka kidatniu nuu ñuꞌu‑s. Juñaꞌa‑s ñuꞌu yutnu uva nuu ɨnka ñayiu.
10 ʼ¿Ña n‑ka kaꞌu‑n tnuꞌu Ianyuux a? Yodotnuni tnuꞌu Ianyuux:
N‑ka kidavaꞌa seyɨɨ ɨɨn veꞌe.
Ɨɨn yuú n‑ka dajane‑s ɨɨn xio.
Ña n‑ka kutnuni ini‑s xa yuú jan
xá n‑kaxí Ianyuux xa kuu yuú kiꞌna nuu.
11 Duꞌa n‑kida Ianyuux,
te kuu ná kuu xa ndeꞌa‑ro ɨɨn xa vii ɨɨn xa vaꞌa ka.
12 Te se n‑ka teku nax n‑jaꞌan Jesús, n‑ka juini‑s xa tnɨɨ‑s‑ia, ko n‑ka yuꞌu‑s nuu kueꞌe xa kueꞌe ñayiu xyuku ijan. Chi vaꞌa n‑ka kutnuni ini‑s xa n‑jaꞌan‑ia tnuꞌu yaꞌa xaxeꞌe mee‑s. N‑ka dandoo‑s‑ia, te juaꞌan‑s.
¿Vatuka xa chiyaꞌu‑ro tvini impuestu?
(Mt. 22:15‑22; Lc. 20:20‑26)
13 Ijan n‑ka tundaꞌa‑s dava se fariseu xiꞌin se partido Herodes nuu tuu Jesús, xa kunini‑s tnuꞌu‑ia, xa tekuechi‑s‑ia. 14 N‑ka xee‑s nuu nujuiin‑ia, te n‑ka jaꞌan‑s:
—Maestru, ka xini‑r xa se ndaa anu kuu‑n, ña yuꞌu‑n ni ɨɨn nuu ñayiu. Idini tnuꞌu jaꞌan‑n nuu ntdaa ñayiu. Tnuꞌu ndaa dakuaꞌa‑n ñayiu ichi Ianyuux. ¿Vatuka xa chiyaꞌu‑ro tvini impuestu xijan se kuu emperador, se nani César, a ñaꞌa u? ¿Juñaꞌa‑ro, a ñaꞌa u?
15 Ko xini Jesús xa ɨɨn xa jaꞌan‑s te ɨnka xa kida‑s. N‑jaꞌan‑ia:
—¿Nax kuu xa xitotnuni ñaꞌa‑n? Kaneꞌe ɨɨn tvini neꞌe, na kundeꞌa‑r.
16 Xneꞌe‑s ɨɨn tvini n‑xee nuu‑ia. N‑xiaꞌan‑ia:
—¿Jundu nuu ndenee nuu tvini yaꞌa? ¿Jundu dɨu yodotnuni nuu tvini yaꞌa?
N‑ka jaꞌan‑s:
—Se kuu emperador, se nani César.
17 N‑jaꞌan Jesús:
—Najuñaꞌa koio xa kuu xaxii César nuu César, te najuñaꞌa koio xa kuu xaxii Ianyuux nuu Ianyuux.
Te n‑ka yuꞌu‑s‑ia.
Xandaa xa nandoto koio ndɨyɨ
(Mt. 22:23‑33; Lc. 20:27‑40)
18 Te n‑ka xee se saduceu nuu nujuiin Jesús. Ka jaꞌan mee‑s xa ma nandoto ndɨyɨ. N‑ka xijan tnuꞌu‑s‑ia:
19 —Maestru, n‑chidotnuni Moisés xa ɨɨn seyɨɨ, nux kuú‑s te ndoo ñadɨꞌɨ‑s te ñayo daꞌya‑s io xiꞌin‑ña, io xa natnundaꞌa ñani‑s xiꞌin viuda, xa koo daꞌya‑s xiꞌin‑ña xaxeꞌe ndɨyɨ. 20 Uxa seyɨɨ n‑xio. Se kiꞌna nuu n‑tnundaꞌa xiꞌin ñadɨꞌɨ‑s. N‑xiꞌí‑s, te ñayo daꞌya‑s xiꞌin‑ña n‑xio. 21 N‑natnundaꞌa ñani‑s xiꞌin‑ña, te n‑xiꞌí‑s, te dɨuni ñayo daꞌya‑s xiꞌin‑ña n‑xio. Dani ñani kuu uni‑s. 22 N‑uxa‑s n‑ka tnundaꞌa xiꞌin ñadɨꞌɨ jan, te ni ɨɨn‑s ña n‑xio daꞌya‑s xiꞌin‑ña. Te dada n‑xiꞌí mee‑ña tuku. 23 Xijan kuu xa kɨu na nandoto ndɨyɨ, ¿ndeda‑s ñadɨꞌɨ kuu‑ña? Chi n‑tnundaꞌa‑ña xiꞌin n‑uxa‑s.
24 N‑xiaꞌan Jesús:
—Ka dandaꞌu‑n mee‑n. Ñatu ka kutnuni ini‑n nax jaꞌan tnuꞌu Ianyuux. Dani ñatu ka kutnuni ini‑n nanda kuu xa taxnuni Ianyuux. 25 Na nandoto koio ñayiu, ma tnundaꞌa seyɨɨ ni ñadɨꞌɨ. Nani xtuu ángel, ia ka xinokuechi nuu Ianyuux tuu andɨu, dani kutuu koio ñayiu nandoto. 26 Ko xandaa xakuiti kuu xa nandoto koio ndɨyɨ. ¿Nuncas ña n‑ka kaꞌu‑n nax n‑chidotnuni Moisés a? N‑jaꞌan Ianyuux nuu Moisés, nuu nukoo ɨɨn yutnu koko te ña ndaꞌva‑tnu. N‑jaꞌan‑ia: “Mee‑r kuu Ianyuux jandixa Abraham, kuu‑r Ianyuux jandixa Isaac, kuu‑r Ianyuux jandixa Jacob.” 27 Ianyuux, ña kuu‑ia Ianyuux ndɨyɨ. Chi kuu‑ia Ianyuux ñayiu ndito. Yo kueꞌe ka dandaꞌu‑n mee‑n.
Tnuꞌu taꞌu tniu taxnuni ka
(Mt. 22:34‑40)
28 Te nuu Jesús, kuyatni ɨɨn se tuꞌa vaꞌa tnuꞌu n‑chidotnuni Moisés. N‑teku‑s xa ka jantnaꞌa tnuꞌu‑s xiꞌin‑ia, te n‑kutnuni ini‑s xa vaꞌa jaꞌan‑ia. N‑xijan tnuꞌu‑s‑ia:
—¿Ndeda tnuꞌu taꞌu tniu taxnuni ka?
29 N‑jaꞌan Jesús:
—Tnuꞌu taꞌu tniu taxnuni ka kuu: “Ñayiu Israel, kunini koio‑n. Taa‑ro Ianyuux, idini Ianyuux kuu‑ia. 30 Io xa juemani koio‑n Taa‑ro Ianyuux. Xiꞌin nde yɨkɨ‑n, nde tuchi‑n, nde xaxtnuni‑n, nde anu‑n, juemani koio‑n‑ia.” Xaꞌa kuu tnuꞌu taꞌu tniu taxnuni ka. 31 Te duꞌa jaꞌan tnuꞌu taꞌu tniu kuu uu: “Juemani koio‑n ñayiu, nani xemani‑n mee‑n.” Ña tuu ɨnka tnuꞌu taꞌu tniu taxnuni ka.
32 N‑xiaꞌan se tuꞌa vaꞌa tnuꞌu n‑chidotnuni Moisés:
—Io vaꞌa ni, Maestru. Ndaa jaꞌan‑n xa idini Ianyuux kuu‑ia te ñayo ɨnka Ianyuux io. 33 Ndaa jaꞌan‑n, xa xiꞌin nde yɨkɨ‑ro, nde tuchi‑ro, nde xaxtnuni‑ro, nde anu‑ro, io xa juemani‑ro‑ia, te io xa juemani‑ro ñayiu, nani xemani‑ro mee‑ro. Vaꞌa ka xa jandixa‑ro tnuꞌu yaꞌa dada xa teñuꞌu‑ro kɨtɨ doko‑ro nuu Ianyuux. Vaꞌa ka xa jandixa‑ro tnuꞌu yaꞌa dada ntdaa xa doko‑ro nuu‑ia.
34 Na n‑xini Jesús xa n‑kutnuni ini‑s tnuꞌu‑ia te vaꞌa n‑jaꞌan‑s, te n‑xiaꞌan‑ia:
—Vax kuyatni xa xee kɨu xa kɨu mee‑n nuu taxnuni Ianyuux.
Te n‑ka yuꞌu ñayiu xyuku ijan. Ni ɨɨn se ijan ña n‑xijan tnuꞌu ka‑ia.
¿Jundu daꞌya kuu Cristu?
(Mt. 22:41‑46; Lc. 20:41‑44)
35 Ijan n‑dakuaꞌa Jesús ñayiu xyuku veñuꞌu kaꞌnu. N‑jaꞌan‑ia:
—Se ka tuꞌa vaꞌa tnuꞌu n‑chidotnuni Moisés, ¿nanda kuu xa ka jaꞌan‑s xa Cristu, Ia n‑tundaꞌa Ianyuux, kuu daꞌya dana se kunxaꞌnu ka nani David? 36 N‑kida Espíritu Ii xa mee David n‑jaꞌan:
N‑jaꞌan Ianyuux nuu Xtoꞌo‑da:
“Nkoo yaꞌa, ndaꞌa kuaꞌa‑r,
nde na kada‑r xa taxnuni‑n nuu
se ka xini uꞌu ñaꞌa.”
37 N‑danani David se ijan Xtoꞌo‑s. ¿Nanda kuu xa ɨɨn daꞌya dana‑s kuu Xtoꞌo‑s?
Te kueꞌe xa kueꞌe ñayiu xyuku ijan. N‑ka kuvete‑i xa n‑ka kuvete‑i, hora n‑ka teku‑i tnuꞌu Jesús.
N‑jaꞌan Jesús: “Koo koio‑n cuedado nuu se ka tuꞌa vaꞌa tnuꞌu n‑chidotnuni Moisés”
(Mt. 23:1‑36; Lc. 11:37‑54; 20:45‑47)
38 Na n‑dakuaꞌa Jesús ñayiu ijan, n‑jaꞌan‑ia:
—Koo koio‑n cuedado nuu se ka tuꞌa vaꞌa tnuꞌu n‑chidotnuni Moisés. Ka tna ini‑s xa kuikonuu‑s juiꞌna‑s daꞌma nani, daꞌma niꞌno maestru. Nuyaꞌu ka juini‑s xa ntdaa ñayiu na jaꞌan xañuꞌu nuu‑s. 39 Ka tna ini‑s xa ku nukoo‑s silla nuu ka xko nukoo se taxnuni veñuꞌu kuechi. Te hora kaxi‑s dita ɨɨn viko, ka tna ini‑s xa ku nukoo‑s nuu vaꞌa ka. 40 Ka tnɨɨ nga‑s veꞌe ñadɨꞌɨ ka kuu viuda. Te hora ka xijan taꞌu‑s, te naꞌa ka xijan taꞌu‑s, xa kani ini koio ñayiu xa yo vaꞌa xemani‑s Ianyuux. Kueꞌe ka kada uꞌu Ianyuux mee‑s dada xa kada‑ia ɨnka ñayiu.
Viuda kundaꞌu
(Lc. 21:1‑4)
41 Xiti veñuꞌu jan nukoo Jesús yatni nuu katuu xatnu nuu ka dakeé ñayiu tvini ka doko‑i nuu Ianyuux. Ndeꞌa‑ia kueꞌe ñayiu ka yaꞌa ijan. Kueꞌe se kuika n‑ka dakeé kueꞌe tvini. 42 Ijan n‑xee ɨɨn viuda yo kundaꞌu. Mee‑ña n‑dakeé uu ni tvini kuechi ka. Yo itaꞌu tvini kuu. 43 N‑kana Jesús se dakuaꞌa‑ia, te n‑xiaꞌan‑ia:
—Xandaa kuu xa jaꞌan‑r. Kueꞌe ka dakeé viuda yaꞌa, viuda yo kundaꞌu, dada xa n‑ka dakeé ntdaa ñayiu kuika n‑ka dakeé kueꞌe tvini. 44 Mee‑i, kueꞌe tvini xnevaꞌa‑i, te tvini ndoo nga ka dakeé‑i. Ko ñadɨꞌɨ yaꞌa, ñadɨꞌɨ yo kundaꞌu, ñatuka nax nevaꞌa‑ña. Ntdaa xa n‑xo nevaꞌa‑ña n‑dakeé‑ña.