Mbeɗe sáka kuni fie Fe ká tina nun ha̰ Za̰a 1

Fe ká tina nun ha̰ Za̰a

Ɓay ká se tul feri ká ɗo ɓil mbeɗe ni key

Ká ɓil mbeɗe key na, Za̰a kḭi fal feri ká tḭi nun-ɛ ká Zezu Krisi ha̰ ni kɔ ká tukuɗu mbii ká Patmos. Ɓáy faa fekeri ku na, Za̰a ɓaa ɓay a hǔoke law nzoɓ mbika lawri ká i ɗaa nun-ri tuɔ síe. Mbeɗe key na ɓaa ta-taŋ ha ri mii, feri riw bele ká tḭi na, ɓa Ŋgɛrɛwṵru kḭ ze mgba ɗo nduo-ɛ. Ɔ́rɔ ɓie lɛ, kaʼa háw yṵm ká tul nzoɓ tul ŋga̰ni ɓeri riw bele ɓáy faa Ŋgɛrɛmbay Zezu Krisi. Satan kara ɗo ɓil nzoɓ tul ŋga̰nikeri na ku nda̰w ká Ŋgɛrɛwṵru a ɓíɛ ri kpukɗu kpukɗu. Nzoɓ Ŋgɛrɛwṵruri ká i ɗo tul ɓay ɓe ɓaŋguɔ na, i kɔ́kɔ nulue fie ɓáy tusiri fie. I káw nzaa fe sṵm suoriya ya̰aŋa kḭ Vu Baɗu a í ɗaa puo ká Zuruzalɛm fie na ɓaŋguɔ wṵ̌m.

Máa ɓayri ká ɗo ɓil-e

Titire fe ká tina nun ha̰ Za̰a: 1

Mbeɗe káʼa ɗaa ha̰ nzoɓ mbika lawri zaɗ tɔnɔ say: 2–3

Mbeɗe káake ká i rḭi zaɗ tɔnɔ say: 4.1–8.1

Tḭwri ká tɔnɔ say: 8.2–11.19

Nay saŋ ɓáy fe mgbamri ká siɗi: 12–13

Vu Baɗu ká ɗo tul kuo Sio̰n, ɓáy nam kúŋ sal ɓay: 14

Ɔ́rɔ ɓie huɗ duku mburuk: 15

Tuŋguo hɛrɛ Ŋgɛrɛwṵru ká tɔnɔ say: 16

Leɗi ŋgɛrɛpuo ká Babilo̰n: 17.1–19.4

Nam suoriya ya̰aŋa kḭ Vu Baɗu: 19.5-10

Ɓay ká i kuŋ zuɔ tul fe mgbamri ká siɗi, ɓáy leɗi Satan: 19.11–20.14

Nulue fie, tusiri fie, ɓáy Zuruzalɛm fie: 21.1–22.5

Zezu a vika: 22.6-21

Pola rɔɔ ɓay ríi ɓil mbeɗe key

1 Mbeɗe key na ɓaa ɓay se tul feri ká ɗo zaɗ muni ká Zezu *Krisi tina ha̰ nzoɓri kɔ. Ɓa fe ká Ŋgɛrɛwṵru ha̰ ni kɔ, ɓay haŋa ni ka kíɛ nzoɓ peɗ ɓeri fe káʼa ví vuku. Krisi na suo a pie leɗ nzaapeɗ ɓe se luo Za̰a ká ɓa nzoɓ peɗ ɓe. 2 A Za̰a na laa lɛ, feri riw bele káʼa kɔ na, ka ɓaa nasike mii, ɓa Ɓay Ŋgɛrɛwṵru nda̰w, a ɓa tusuɛ ɓay ká Zezu Krisi tina ha̰ ni nda̰w pi. 3 Suoriya ɓa taa nzoɓ ká kḭi mbeɗe ni key ká nun ruɔ nzoɓri, ɓáy ɓari ká i laa ɓayke ká uru saa nzaa Ŋgɛrɛwṵru a í ɗaa vu mbom ɓo ɗi, ɓay ḭi lɛ, nam ká fekeri a tḭ́i na tɔ̀ŋ ɗi mbǎa ro.

Soko ká Za̰a hii ha̰ nzoɓ mbika lawri ká i mbṵ tul kḭ ɓoɗ ɓoɗ zaɗ tɔnɔ say

4 Ɓi Za̰a, mì ɗaa mbeɗe key na ha rì ɓaarì nzoɓ mbika lawri ká i mbṵ tul kḭ ɓoɗ ɓoɗ zaɗ tɔnɔ say ká kuɗu zaɗ ká Azi. Ndaɗ ɓay haŋa Ŋgɛrɛwṵru, ɓe káʼa ɗo pola ɗɔɗ nda̰w rɔɔ tusiri ɗo ɓáy, ɓe ká ɗo timbɛɗɛ key, káʼa vika na, ka ha rì law huoke ɓáy ɗɛkɛkɛ. Ndaɗ ɓay haŋa Temri ká tɔnɔ say* ká i ɗo pol kariŋgaw mbay ɓe na, ka ha rì law huoke ɓáy ɗɛkɛkɛ. 5 Ndaɗ ɓay haŋa Zezu *Krisi, ɓe ká ɓa nzoɓ nasi ɓay Ŋgɛrɛwṵru ɓáy zaɗɛ, ɓe káʼa ɓa titire nzoɓ káʼa tḭi saa sakra nzoɓ huɗeri, a ɓa mbay ká kaw tul mbayri riw bele ká tusiri key na, ka ha rì law huoke ɓáy ɗɛkɛkɛ na nda̰w pi.

Ɓe Zezu na, ka hii naari. Ka tina naari saa ɓil hṵrusuo feya̰a naari ɓáy faa sím ɓe, 6 a ɗaa ha̰ náa víri ɓa *nzoɓ fe poy ɓeri ká puoruo ɓe ɓay ɗáa peɗ ha̰ Bi-ɛ Ŋgɛrɛwṵru. Riŋ ɗika ɓáy hṵrusuo ɓa taa ɓe mbiimbam ɓáy mbiimbam ɓaŋguɔ! Amɛm! Ndaɗ ɓay haŋa ni ka ɗo munu na kḭ!

7 Ì kɔ, ɓe na, a vika ɓáy síi mbam! Nun nzoɓri riw bele i kɔ́kɔ ni, ze ɓari ká i tuɗ ni í i ni na kara i kɔ́kɔ ni nda̰w. Sa̰w ka̰niri riw bele ká tusiri key na, i ndáka law-ri zaɗ zaɗ ɓay tul-e. Feke ku na, a ɗoko munu ɓa tusuɛ kḭ. Amɛm! Ndaɗ ɓay haŋa ni ka ɗo munu na kḭ!

8 Ŋgɛrɛmbay Ŋgɛrɛwṵru Nzoɓ Hṵrusuo Luye na ɓaa mii: «Ɓi na, mì ɓa *Alfa ɓáy Omega†, ɓe káʼa ɗo pola ɗɔɗ nda̰w rɔɔ tusiri ɗo ɓáy, ɓe ká ɗo timbɛɗɛ key, káʼa vika.»

Zezu tina nun ha̰ Za̰a

9 Ɓi Za̰a ká mì ɓa yṵ ɓaarì ká náa ɓári bǎw kɔ́kɔ sɛkɛ fe, ká náa ɓári nzoɓri ká Ŋgɛrɛwṵru re mbay ká tul naari, a náa sṵ́uri law naari mbḭw hɔy ɓáy faa zúɔ ziŋ Zezu na, i mgba mì í vǎa pɔŋ mì kaw tukuɗu mbii ká i ɗi ɓa Patmos ɓay tul Ɓay Ŋgɛrɛwṵru ká mì ɗo tul-e mí ka-káake, ɓáy tusuɛ ɓay ká Zezu tina ha̰ mì na‡. 10 Dimasi mbḭw munu ká ɓa nam Ŋgɛrɛmbay na, Tem Ŋgɛrɛwṵru mgba mì, lɛ, mì laa kusol nzoɓ mgba ɓeleŋ ká fal-i rìi tḭw ká nzoɓ ul kɔŋrɔŋ. 11 Kusol ká mgba na ɓaa mii: «Fe ká mù kɔ na, mu ɗaa ka ɗo mbeɗe a mú píeke ha̰ nzoɓ mbika lawri ká i mbṵ tul kḭ ɓoɗ ɓoɗ zaɗ tɔnɔ say key na: Efɛz nda̰w, Isimirne nda̰w, Pɛrgam nda̰w, Tiyatir nda̰w, Sardɛs nda̰w, Filadɛlfi nda̰w, rɔɔ Lawdise nda̰w pi.»

12 Báyḭi lɛ, mì fɛrɛ nun-i ɓay kɔ́kɔ nzoɓ ká ɓaa ɓay ziŋ mì na. Lɛɛ, mì kɔ huu ndele ká i ɗaa sìi say ká i ɗaa ɓáy lari ká ndṵy zḭriri zḭriri ɓa tɔnɔ say zuɔ. 13 Ká sikɗa huu ndelekeri ku na, nzoɓ mbḭw rìi vu nzoɓ ɗo ɗi. Ka nduo maagari ká pìe yul kpṵru mgba fal ɓal-ɛ, a ɗaa sal ɓil ká i ɗaa ɓáy lari ká ndṵy zḭriri zḭriri na tekre nzaa law-ɛ. 14 Sṵy tul-e puu tɛl tɛl munu ká gari pie, mase munu ká sa̰ri, a nun-ɛ sɛ huu kalu kalu munu ká rḭm huu. 15 Ɓal-ɛri ndṵy munu ká nzaw lari ká i ɗaa nduo huu ha̰ mḭ́irɛ tḭi rɔɔ í nzṵn ha̰ ni ndṵy, a kusol-e laa lɛ, mgba munu ká bawda maambiiri ká so gbuu gbuu. 16 Ka mgba mbaymawri ɓa tɔnɔ say ɗo nduo hoɗo ɓe, rɔɔ maamii ká nzi-ɛ uo pɛlɛm pɛlɛm fi siɗi bele ɗo tḭ́i saa nzi-ɛ. Nzaa pol-e ndṵy mbeɗera mbeɗera munu ká síe ká ɗo law tul káʼa kɛ hɛɗ hɛɗ.

17 Zaɗka mì kɔ ni na báyḭi lɛ, mì lie gbǎ̰y ɓo pol-e munu ɓa huɗ. Báyḭi lɛ, ka ɗaa nduo hoɗo ɓe ɓo tul-i a ɓaa mii: «Mu hḭ́ɛ ya! Ɓi na, mì ɓa Titire Nzoɓ ɓáy Ɔ́rɔ Ɓie Nzoɓ. 18 Mì ɓa Nzoɓ Káw Ɓáy Kumnun. Pola na mì hu, roo lɛ, timbɛɗɛ key na mì kaw ɓáy kumnun mbiimbam ɓáy mbiimbam ɓaŋguɔ. Mì ɗo ɓáy hṵrusuo ká tul huɗ, ɓáy nzoɓ huɗeri ká zaɗ baw. 19 Munu zu lɛ, fe ká mù kɔ key na, mu ɗaa ka ɗo mbeɗe; ɓa fe ká ɗo timbɛɗɛ key nda̰w, fe káʼa ɗoko vǎw nda̰w pi. 20 Sa̰w ɓay ká se tul mbaymawri ká tɔnɔ say ká mù kɔ ká nduo hoɗo ɓi, ɓáy huu ndele ká tɔnɔ say ká i ɗaa ɓáy lari ká ndṵy zḭriri zḭriri na ze ɗo key: mbaymawri ká tɔnɔ say na ɓa leɗ nzaapeɗ Ŋgɛrɛwṵruri ká i ɗo tul nzoɓ mbika lawri ká i mbṵ tul kḭ ɓoɗ ɓoɗ zaɗ tɔnɔ say na, a huu ndeleri ká tɔnɔ say na laa lɛ, ɓa nzoɓ mbika lawri ká i mbṵ tul kḭ ɓoɗ ɓoɗ zaɗ tɔnɔ say.»

* 1:4 Suy fe kḭiŋa ká tɔnɔ say ká ɗo ɓil mbeɗe key na, kiɛ fe ká ɗo ɓáy zaɗɛ nzɛɗɛm. Ɓe mini ze «Temri ká tɔnɔ say» na, kiɛ Tem Ŋgɛrɛwṵru ká mbḭw hɔy ká ɗo ɓáy zaɗɛ nzɛɗɛm bele. † 1:8 Alfa ɓa titire vu máa ɓay alfabe Gɛrɛk, a Omega laa lɛ, ɓa ɔ́rɔ ɓie vu máa ɓay alfabe. Zaɗka Ŋgɛrɛwṵru ɓa Alfa ɓáy Omega na, kiɛ mii ka re mbay ká tul feri riw bele, a ɓa nzoɓ tiika sa̰w fe ɓáy nzoɓ ɔ́rɔ ɓie fe. ‡ 1:9 Tukuɗu mbii ká i ɗi ɓa Patmos na, ɓa sal faa isɔɗ ɓáy Efɛz. Ɓa zaɗ ká ŋgɛrɛdɔma̰yri ká Rɔm fa̰a nzoɓri ká i hii ɓay ɓari mbǎa na, í vǎa pɔŋ ri zuɔ ɗi.