5
Cristoõnoax isharakãfe a mã ipaoni keskara chaka anã shinãkakima
1 Akka Cristo nokoõnoax nani a Moisés yoini keskara nõ anã nikanõma, nãskax anã ãto yonomati nõ inõma. Cristo fistiõnoax nõ isharatiro, nãskakẽ Cristo kachikiri fayamakãfe. Mã ipaoni keskara anã iyamakãfe, nõko xinifãfe yoinifo keskara afianã nikayamakãfe ãto yonomatifo ixikakĩma.
2 Ẽ mato yoinõ, ea nikasharakapo. Iskafakĩ shinãyamakãfe: “Ẽ foshki repa xatekema Epa Niospa ẽfe chaka ea soaxotiroma,” ixõ shinãyamakãfe. Anori mã shinãito Jesús mãto chaka mato soaxotiroma Epa Nios fe mã ipaxanõ.
3 Afianã xafakĩakõi ẽ mato yoipai. Fatora fẽtsa mã foshki repa xatepai Nios fe ipaikĩ, anori shinãfikĩ nã Moisés yoini keskara nikakõiamax, anorima shinãx Nios fe mã nipaxatiroma.
4 Moisés yoini keskara fisti mã nikaito mãto chaka mato soaxotiroma. Nãskax mã Cristo fe rafeima, akka Epa Niospa mato noifiaino mã Cristo fe rafeima, akka Epa Niospa mato noifiaino mã Cristo kachikirifai. Nãskafekẽ mato afeska fatiroma mãto chaka mato soaxona mã afe ipaxanõ.
5 Akka Niospa Yõshi Sharaõxõ mã nã tãpia, Cristoõxõ nõko chaka noko xoaxotiro Niospamãi noko noikõikĩ. Nãskakẽ nõ manasharai.
6 Nõ foshki repa xateano, askayamãkĩ nõ xateamano, afãfekai nõko chaka noko soaxotiroma. Akka nõ Jesucristo Ifofakõinaino fetsafo noko ato noimasharakõitiro nõ ato noisharakõinõ. Nã fisti nõ fichipai, chanĩmara fasharakõixii.
7 Mã Jesús Ifofasharayopaoni. Akka, ¿tsõa mato yoiamẽ, na meka sharakõi kachikirifayanã mã anã nikanõma?
8 Akka Niospakai anori mato yoiama. Ãfe Fake fisti mã chanĩmara fanõ mato yoia.
9 Akka mato mẽraxõ yora fistichi chaka shinãkĩ, nã fistichi keyokõi mato afara chaka shinãmatiro, aõxõ chakakõi mã shinãno.
10 Ẽ Nios kĩfiyanã nõko Ifo ẽ chanĩmara fakõini, ẽ akai keskafakĩ mãri chanĩmara fanõ. Akka nã mato fanĩrira chaka shinãmanaifo Niospa ato omiskõimaxii.
11 Efe yora mĩshtichi, akka eõnoa yoikĩ mã iskafamis: “Na Pablo yoimis nõ foshki repa xateamax nõ Nios ari katiroma ixõ yoimis,” mã ea famis. Maa, ẽkai anori yoimisma, ẽ anori yoiaito ea omiskõimakeranafo. Akka ẽ yoimis: “Jesucristo ifi cruz ikaki mastaifono noko nãxoni, nõko chaka noko soaxoxii Epa Nios fe nõ ipaxanõ,” ixõ ẽ yoimis. Nãnori ẽ yoiaito nikakĩ nã Jesúsnoa nikakaspamisfãfe ea omiskõimamisfo.
12 Akka fetsafãfe mato yoimisfo iskafakakĩ: “Mã foshki repa xatexoma mã Nios chanĩmara faima,” ixõ fanĩrira mato shinãmamisfo. Nãnori yoikakĩ mato fekaxtefamisfo, nãfo anã mato fe iyamapainõfo.
13 Efe yora mĩshtichi, Jesucristoõxõ iskaratĩa ãfe meka fisti nikakõikãfe. Afaa fetsa mato yonomayamafiaino chakafayamakãfe. Jesucristo mato imasharakĩ iskaratĩa nã nõ apaiyai keskara nõ atiro iyamakãfe. Akka fetsafo fe axõ faatanãkãfe noinãkõiyanã.
14 Akka Niospa Moisés yoini iskafakĩ: “Nã mã noimeai keskariakĩ fetsafori noisharakãfe,” ixõ yoini. Mã askafakĩ nã Niospa Moisés yoini keskara, keyokõi mã aki. Mã askafakĩ keyokõi a Niospa Moisés yoini keskara mã aki.
15 Akka mã chakafaatanax mã keyotiro, oa paxta rafe keyonãkanax retenãtirofo keskai. Nãskakẽ kexemesharakãfe askaxikakĩma, a mato feta Nios nikamisfo anã mato fe ichanãtirofomaki. Askatari Nios kachikiri fatirofoki.
Nõko shinã mẽraxõ nõ afara chakafapaimis keskara yafi a Niospa Yõshi Sharaõnoax nõ isharatiro Pablo ato yoini
16 Akka ẽ mato yoi Niospa Yõshi Shara nikasharakãfe aõnoax isharaxikaki. Nãato mato yoitiro mã afeskaimãkai. Nã nikakõixõ afianã a mã apaoni keskara mãto shinã mẽraxõ afara anã mã atiroma.
17 A nõko shinã mẽraxõ nõ afara chakafapaiyai keskarakai Niospa Yõshi Sharapa shinãima. Nãskaxõ ãfe Yõshi Sharapa noko amapaiyai keskara nõko shinã mẽraxõ nõ shinãfikĩ nõkai askafapaimisma. Nõko shinã mẽraxõ nõ shinãpaoni keskarakai Niospa Yõshi Sharapa anori shinãmisma. Akka nã nõ apaiyai keskafakĩ nõ atiroma. A nõ afara chakafapaoni keskara nõ anã ayamakĩ Niospa Yõshi Sharapa nõko shinã mẽraxõ noko yoiai keskara nõ nikakõitiro.
18 Nãskakẽ Niospa Yõshi Shara nofe rafeaino a Moisés yoini keskara anã nõko ifo itiroma noko yonomaxiki.
19 Fetsafãfe Nios nikakaspakakĩ afarafo chakafakani. Mã mã tãpia afe keskarafo ikafomãki. Nãskakẽ feronãfakefãfe ãto ãfimafo chotamisfo. Nãskakata afara fetsa fetsatapafo chakafamisfo.
20 Nãskakaxõ afara yora fakaxõ na nõko niosra ixõ kĩfimisfo. Askatari koshoiti tãpiafo, askatari ato noikaspamisfo, askatari isharakãtama õitifishkimisfo. Nãskakaxõ atonã fisti afara apaimisfo, askatari noikaspa faatanãmisfo nores fisti nõ tãpikõia a nõ tãpia keskara tsõa tãpiama ikanax.
21 Nãskaxõ fetsafo afara fĩapaimisfo, askatari pãemisfo, askatari pikĩfinapaikõimisfo. Nãskakaxõ afara fetsa fetsatapafo chakafamisfo. Ẽ mato yoimis a keskara chakafo Epa Niospa keyokõi ato ĩkinã ano tsoa katiroma afe ipaxakakĩ.
22 Akka Niospa Yõshi Sharapa noko ĩkinãno fetsafo nõ noikõitiro inimakõiyanã, askatari nõ isharakõita nõ fekaxtetiroma, askatari fena fenakima nõ manasharakõiyotiro, askatari nõ fetsafo chakafamisma itiro, askatari nã nõ yoimis keskara nõ atiro isharakõita.
23 Askatari isharakõita, fetsafo fe feratenãtama oi tsifaxõ ato yoimis ita, askatari a Niospa fichikaspai atama nõa nõ kexemetiro afaa chakafaxikima. Nãskaxõ Niospa ãfe Yõshi Sharaõxõ noko yoia keskara nõ atiro isharaxiki. Nãskakẽ anã meka fetsa nõ yoipaima Niospa Yõshi Sharaõnoax isharaxiki. Nãskakẽ anã noko tsõa yonomatiroma.
24 Nã Cristo chanĩmara faifo tii afe yorakõifo. Jesús cruznoax noko nãxoni nõko chaka noko soaxoxiki. Akka nõ naa keskaraxõ anã afaa nõ chakafatiroma a nõ apaoni keskara. Nãskakẽ nã noko Niospa amapaiyai keskara fisti nõ atiro.
25 Nãskakẽ Niospa Yõshi Shara fe nõ rafekĩ nã noko yoiai keskara nõ nikakõitiro. Nãskaxõ nã noko amapaiyai keskara nõ atiro.
26 Nãskakẽ Niospa Yõshi Shara fe nõ rafeax kakapaimis nõ itiroma, fetsafãfe nokoõnoa yoisharanõfora ixõ ẽ mato finõkõiara iyamakãfe. Mã askakĩ fetsafo mã shinãchakamatiroki. Mã askara chakafo shinãkĩ mã shinãsharatiroma, askara chakakõiki.