14
Mato fe yorafo a Nios Ifofaafo mekafakĩ chakafayamakãfe
1 Meka fetsa ẽ mato yoinõ. Fetsafãfe Jesús Ifofafiakaxõ ãfe meka tãpisharakanamax mato fe ichanãifono, “Aicho, nofe ichanãi fekãfe,” ato fakãfe. Mã shinãi keskara anori shinãyamaifono ato fe feratenãyamakãfe. Ato mekafakĩ chakafayamakãfe.
2 Mato mẽra ixõ fẽtsa yoitiro iskafakĩ: “Ẽ Jesús chanĩmara faxõ keyokõi ẽ pitiro,” ixõ yoitiro. Akka fẽtsa yoikĩ iskafatiro: “Ẽfi Jesús chanĩmara fakĩ ẽkai nami pitiroma. Ẽ fanafo fisti pitiro,” ixõ yoitiro Jesús meka tãpisharaxoma.
3 Fẽtsafãfe nami pikĩ a nami pimisfoma ato mekafakĩ chakafatiroma. Ato yoikĩ iskafatirofoma: “Mã afaa tãpiama. Nõ nami pia shara, noko chakafatiroma. Nami shara,” ato fatirofoma. Nãskarifiakĩ nã nami pimismato a nami pimisfo ato mekafakĩ chakafatiroma. Ato yoikĩ iskafatiroma: “Nafãfe nami pikakĩ chakafakani,” ixokai atoõnoa yoitirofoma. Akka Epa Niospa keyokõi nãskarafo noko ifi nõ ãfe fakefo inõ. Nãskakẽ fetsafo mekafakĩ chakafayamakãfe.
4 Jesús Ifofaafokai mãto inafoma. Akka afãfe Epa Nios yonoxomisfo. Nãskakẽ ato mekafakĩ chakafayamakãfe. Epa Niospa ato yoitiro. A chakafaifo ato iskafatiro: “Mã chakafai,” ixõ ato yoitiro. Askatari a sharafaifo, “Mã sharafai,” ato fatiro. Akka a chaka shinãifo Niospa ato tãpimatiro isharanõfo anã chaka shinãnõfoma.
5 Akka a Nios Ifofaafo fetsafãfe shinãkani iskafakakĩ: “A judeofãfe tenetitĩa nõ ichanãtiro Jesús shinãi,” ixõ anori shinãkani. Akka fetsafãferi shinãkani iskakakĩ: “Nã pena keyokõi shara nõ ichanãtiro Jesús shinãi,” ixõ shinãkani. Nãskaxõ nã ãto shinãmã shinãifo keskara shara. Nã shinãifo penata ichanãtirofo Jesús shinãkani. Akka mã shinãi keskara shinãyamaifono ato mekafakĩ chakafayamakãfe.
6 “Na judeofãfe tenetitĩa nõ ichanãtiro Jesús shinãi,” ixõ shinãifãfe, nãfãfe nõko Ifo Jesús Ifofasharapaikani. Akka a nã fatora penata nõ ichanãtiro Jesús shinãi ikaifãferi, nãfãfe nõko Ifo Jesús Ifofasharapaikani. Askatari fetsafãfe shinãkani: “Nõ nami pitiro. Aicho, Epa Niospa mĩ noko nami inã nõ pinõ,” ixõ shinãkani. Nãfãferi nõko Ifo Jesús Ifofasharapaikani. Akka fetsafãferi nã nami piyamaifãfe nãfãferi nõko Ifo Jesús, “Aicho,” fatirofo. Nãskaxõ nãfãfe Nios shinãsharapaikani.
7-8 Nõ niyoxõkai nõa nõ apaiyai keskara fisti nõ shinãtiroma. Epa Niospa noko amapaiyai keskara nõ shinãtiro. Nõfi ãfenãfoki. Nãfi nõko Ifokĩ. A nõ naitĩari nõko Ifo Jesús niyoxõ nõ Ifofasharapai nokoki inimanõ. A nõ naitĩari nõko Ifo nõ shinãtiro nõmãi ãfenãkõixõ.
9 Cristo noko nãxoni. Mã maifafono otokainixakĩ. Iskaratĩa mã nia. Nãskakẽ nõ nayoamax nõko Ifo iki. Mã nõ naaxri nõko Ifo ixii.
10 ¿Afeskafakĩ mato feta chanĩmara faafo mã mekafakĩ chakafaimẽ? ¿Afeskafakĩ mã fetsaõnoa mã shinãchakaimẽ? “Aakai afaamara,” ixõ mã shinãi. Shinãkapo, keyokõi nõ chipo Nios ikano nõ akiki nokoi kaikai. Askatari noko yoixii nõ afara sharafayamakẽ nõ chakafamiskẽ.
11 Isaías Niospa meka yoikĩ kirika keneni.
Niospa yoini iskafakĩ: “Chanĩmakõi ẽ nia. Chanĩmakõiri keyokõi maifo tii anoafo ekeki nokoxikani. Ekeki ratokonõ mai chachikaxõ yoixikani: ‘Epa Niospa, mĩ chanĩmakõi, mĩ Nioskõi,’ ixõ ea keyokõichi yoixikani.”
12 Akka keyokõichi Epa Niospa ferotaifi nõ amis keskara nõ yoixii. Nõ shinãmis keskarari nõ yoixii.
Fetsafo afara chakafamayamakãfe
13 Nãskakẽ a mato feta Jesús chanĩmara faafo mekafakĩ chakafayamakãfe. Iskafakĩ shinãkãfe: “Nõ afara chakafaito õikaxõ akairi chakafatirofo. Nãskakẽ nõ afaa chakafapaima akairi afaa chakafayamanõfo.”
14 Jesús ẽfe Ifokẽ ẽ mato yoisharapai. Keyokõi a nõ piaifo shara nõ pitiro. Nã ẽ chanĩmara fakõini. Nãskafiano fetsafãfe shinãkani iskafakakĩ: “Na piaifo nõ pixõ nõ chaka shinãtiro,” ixõ shinãkani. “Nõ nami pitiroma,” ixõ shinãfikakĩ mã nami pikani. Nãskaxõ chaka shinãkani.
15 Mato feta fẽtsa Jesús chanĩmara faito ãfe ferotaifi a nami pitiroma piyamakãfe ãfe shinã mẽraxõ shinãchakanõma. A noikõixõ mã ãfe ferotaifi pitiroma. Nõko Ifo Cristo aõnoaxri nani. Nãskakẽ a pitiroma pikĩ mã fetsa shinãchakamatiro. Nãskakẽ ãfe ferotaifi piyamakãfe Jesús kachikiri faax fenoyamanõ.
16 “A ẽ akai keskara chakama,” ixõ mã shinãfiaino fetsafãfe askara shinãkanima. Iskafakĩ shinãkani: “Na mã akai keskara chaka,” mato faifono mã xaterisafatiro matoxõ shinãchakayamanõfo.
17 A nõ piaito Niospa yora noko imatiroma. Askatari a nõ ayaito Niospa yora noko imatiroma. Akka Nios nõko xanĩfokõino ãfe Yõshi Sharaõnoax nõ sharakõi. Nõko õiti fekaxteima nõ inimakõitiro.
18 Nõko Ifo Cristo nõ nikasharaino Epa Nios nokoki inimasharatiro. Yorafãferi nokoõnoa shinãsharatirofo.
19 Nãskakẽ Jesús chanĩmara fai fetsafo fe isharakõikãfe. Jesúsnoa yoinõnãkãfe a keskara shara ixikakĩ.
20 Niospa yoini keyokõi a nõ piai shara. Nãskafekẽ fetsafãfe, a Nios tãpisharafãfema shinãkani iskafakakĩ: “Afara fetsa nõ pixõ nõ chakafai,” ixõ shinãifono ãto ferotaifi afara piyamakãfe. Akka mã ãto ferotaifi piaino mato õikakĩ ãto shinã mẽra shinãchakatirofo. Nãskaxõ anã Jesús Ifofasharatirofoma.
21 Mã nami piaito fetsafãfe mato õikĩ shinãchakatirofo. Nãskaxõ anã Jesús Ifofatirofoma. Nãskakẽ ãto ferotaifi afaa piyamakãfe. Askatari mã mãmã ayaito õikakĩ fetsafãfe shinãchakatirofo. Nãskaxõ anã Jesús Ifofatirofoma. Nãskakẽ anã ayayamakãfe. Afara fetsafori akĩ mã ato shinãchakamatiro, nãskakẽ xatekãfe Jesús Ifofanõfo.
22 Nãskaxõ mã shinãi keskara mares shinãkãfe. Epa Nios fisti mã yoitiro. Mã Nios chanĩmara faxõ mãto shinã mẽra shinãsharakĩ mã iskafatiro: “Chanĩma, ẽ akai keskara chakama,” ixõ shinãkĩ mãto shinã mẽra mã inimatiro.
23 Nãskaxõ fẽtsa Niospa meka tãpisharaxoma shinãtiro iskafakĩ: “Nafo pikĩ ẽ chakafairakaiti,” ixõ shinãfikĩ akairi pikĩ chakafatiro. Afara fetsafori shinãkĩ iskafakĩ: “Nafo akĩ ẽ chakafairakaiti,” ixõ shinãkĩ akairi akĩ chakafatiro.