3
1-2 ¿Nõ judeofoxõ nõko fakefo nõ foshki repa xatemiskẽ sharamẽ? Ẽje, shara itiro. Akka nõfi judeofo fake kãiniki. Moisés Niospa meka yoikĩ noko kirika kenexoni. Nãskakẽ nõ inimai nõ judeofo. Efe yora mĩshtichi, shinãkapo. Epa Niospa nã yorafo tii yoipaiyai keskara nõko kaifo taeyoi ato yoiyoni. Noko tãpimanai keskarari nõ yora fetsafori nõ ato tãpimanõ ãfe meka.
3 Akka nõko kaifãfe atirifãfe Niospa meka ifo shara fayamaifono akka Niospa a yoiai keskara amis.
4 Yorafo chanĩmisfo. Akka Nios ramashara chanĩmisma. Yorafãfe keyokõichi noko pãrafiaifono akka Niospa noko pãramisma. Nã David Niospa meka yoikĩ kirika keneni iskafakĩ:
Niospa ãfe meka mẽstesharakõi yorafãfe õinõfo. A shara shinãifo Niospa ato sharafaxõi. Akka a chaka shinãifo Niospa ato tãpimakĩ omiskõimaxii,
ixõ David yoikĩ kirika keneni.
5 Nios fistifi sharakõiki. Nõkai a keskarama. Nãskakẽ nõ chakafaito yorafãfe õikakĩ shinãtirofo iskafakakĩ: “Nios iskarama, Niosfi sharakõikĩ. Na yorafãfe afara chakafakani. Akka Niospa afaa chakafamisma,” ixõ shinãtirofo. Nãskaxõ Nios sharara fakani. Akka nãskaxõ ãa yora fẽtsa shinãtiro iskakĩ: “Ẽ afara chakafaito õikakĩ yorafãfe yoitirofo: ‘Akka Nios iskarama, Nios shara.’ Nãskakẽ ẽ chaka shinãi yorafãfe Nios sharakõi õinõfo ea keskarama. Nãskakẽ Niospa ea omiskõimatiroma ẽ chakafafiaito,” ixõ yora fẽtsa shara shinãima. Nãskara shinãkĩ yõra shinãi keskara shinãi, Niospa shinãi keskara shinãima.
6 Nios chakama. Nios mẽstekõi ika. Akka mẽstekõi iyamaxõ yorafo yoikeranama iskafakĩ: “Nafo sharakõifoki. Ẽ ato sharafaxõi. Akka nafori chakafo. Ẽ ato omiskõimani,” ixõ Niospa yoikeranama mẽstekõi iyamaxõ.
7 Yora fẽtsa ãa shinãi iskatiro: “Yorafãfe ea yoitirofo ẽ chanĩaito õikakĩ. Iskafakakĩ ea yoitirofo: ‘Mĩ Nios keskarama. Nios chanĩmisma. Nios mẽstekõi ika,’ ixõ ea yoitirofo. Akka ẽ chanĩaito õikakĩ fetsafãfe, ‘Nios sharakõi, mia keskarama,’ ea faxikani. Nãskakẽ ẽ shinãtiro iskafakĩ, Niospa ea yoitiro iskafakĩ: ‘Mĩ afara chakafafiaito ẽ mia omiskõimaxima,’ ea Niospa fatiro,” ixõ ãa yõra anori shinãi. Anori Niospa yoiyamafiano ãa shinãi askatiro.
8 Iskafakakĩ yoipaikani: “Nõ afara chakafanõkãfe. Nõ afara chakafaito õikakĩ yorafãfe, ‘Nios sharara,’ fanõfo,” ixõ yoipaikani. “Nã Pablori anori yoimiski nõ afara chakafanõ,” ixõ yoikani. Ãa chanĩmisfo. Ẽkai anori yoimisma. Epa Nios chanĩmisma. Nã keskara yorafo ato omiskõimaxii.
Nõ keyokõichi chakafamis
9 “Nõ judeofo sharakõifo. Akka nã judeofoma sharafoma,” ẽ faima. Askatamaroko ẽ iskafakĩ yoimis: “Nõfi nã judeofoma õitsa, nãskarafos nõ. Nõ keyokõichi afara chakafamis. Nãskakẽ Niospa ato yafi noko omiskõimaxii noko tãpimakĩ,” nãnori ẽ yoimis.
10 Niospa meka yoikakĩ kirika kenenifo iskafakakĩ:
Tsoa pishtakai nã Niospa yoia keskara famisma.
11 Tsoa pishtakai Nios shinãpaikanima. Tsõakai Nios tãpipaisharakanima.
12 Tsoa pishtakai anã Nios Ifofapaikanima. Afara chaka fisti fapaikani. Afara sharakai tãpiafoma. Tsõa pishtakai sharafamisma. Fato fistichikai shara Ifofaima.
13 Yora naax maiax fepekemeax pisi kãitiro. Nãskarifiakĩ nõko axfapa meka chaka fisti nõ yoimis. Mã nõ ato pãrakĩ feyafamis. Nã rono paekapato noko chachiano nõ paemetiro keskarari nõko meka chakaõnoax omiskõixikani.
14 Nõ ato fekaxtefapaikĩ meka mitsisipato fisti nõ mekamis. Nõ ato ĩchari famis.
15 Tsoa afayamafekẽ nõ ato retepaimis.
16 Nõa kafãsakĩ nõ ato omiskõimafofãsafamis. Nõa nõ ato fekaxtefaafofãsafaki.
17 Yora fetsafokai nõ ato raefapaimisma ato fe isharaxikima.
18 Nõko shinã mẽranoaxkai Nioski nõ rateima. Ãfe meka nõ nikapaima. Nõko chaka nõ xatepaima,
ixõ nãskara yoikĩ kirika kenenifo.
19 Mã nõ tãpia a Niospa yoia keskara Moisés noko kirika kenexoni. Akka tsõakai Niospa meka nikakõimisfoma. Nãskaxõ tsõa yoitiroma iskakĩ: “Ẽfi afaa chakafamismaki. Ẽ shara imis,” tsoa itiroma. Akka Niospa noko yoitiro iskafakĩ: “Mãri afara chakafamiski,” keyokõi noko fatiro.
20 Nãskakẽ Niospa meka a Moisés noko kenexoni nõ nikapaifiaito, Niospa noko yoikĩ iskafatiroma: “Mã shara imiski,” noko fatiroma. Akka tsõa ãfe meka nikasharakõima. Ãfe mekaoxõ nõ tãpitiro keyokõichi nõ chakafamisfo.
Jesucristo chanĩmara faax nõ Nios fe ipaxatiro
21-22 Iskaratĩa Niospa noko afara fetsa tãpimana. Noko xafakĩa õimana afeska faxõ noko imasharatiromãkĩ a keskara shara nõ inõ. Moisés kenenioxõ noko shara imaima. Akka nõ Jesucristo chanĩmara fakẽ Niospa noko shara imatiro Jesúsmãi noko nãxonikẽ nõko chaka noko soaxoxiki. Nãnori Niospa meka Moisés yoikĩ kirika keneni. Niospa meka yoimisfãferi nãnoriri kenenifo. Nã keyokõichi Jesucristo chanĩmara faifo Niospa ato shara imai. Judeofo, judeofomafori Niospa shara imatiro Jesús chanĩmara faifãfe.
23 Keyokõichi mã nõ chakafamis. Tsoa Nios keskarama. Nios sharakõi. Afaakai chakafamisma. A keskarakai tsoama.
24 Nãskakẽ Niospa noko noikĩ nõko chaka noko soaxotiro nõ Jesucristo chanĩmara faino. Akka Jesucristo nõko chakaõnoax noko nãxoni. Nãskaxõ nõko chaka noko soaxoni. Nõ afaa kopifatiroma Niospa noko shara imanõ.
25 Ãfe Fake Jesucristo nĩchini ãfe imi foax nõõnoax nanõ nõko chaka noko soaxoxiki. Nãskaxõ Niospa noko omiskõimanima. Nõ Jesús chanĩmara faino Niospa nõko chaka noko soaxoni nõ shara inõ. Nãskaxõ nõ õitiro Nios sharakõi. Jesús nayoamano chakafafiaifono Niospa teneyoni. Ato omiskõimayonima Niospamãi tãpixõ ãfe Fãkemãi chipo ato nãxoxiaino Niosmãi mẽstekõi ixõ.
26 Jesús nõko mai ano oax noko nãxoni. Nãskakẽ nõ chanĩmara faito Niospa nõko chaka noko soaxoni noko imasharai. Nãskaxõ Niospa noko õimasharai amãi mẽstekõi ixõ.
27 Nãskaxõ tsõa yoitiroma iskafakĩ: “Ẽfi sharaki, fetsafo keskarama. Nãskax ẽ Nios fe ipanaka,” ixõ tsõakai yoitiroma. Moisés kirika kenekĩ yoini keskara nikafixõ tsõa anori yoitiroma. Jesucristo noko nãxoni nõko chaka noko soaxoxiki nõ shinãsharanõ. Nãskakẽ nõ Jesús chanĩmara faino, “Jesús nõko chaka noko soaxoni nõ afe ĩpaxanõ,” ixõ nõ yoitiro.
28 Nãskakẽ anã nõ mato yoi. Jesucristo nõ chanĩmara fakẽma a Moisés kirika keneni keskara nõ ifofafiaito nõko chaka noko soaxonima. Akka nõ Moisés meka nikaito Niospa, “Mĩ afara sharafamiski,” noko fatiroma. Akka nõ Jesús chanĩmara faito, “Mĩ Jesúsnoax isharakõimis,” noko fatiro.
29 Nãskakẽri, ¿Niospa judeofo fisti ato ifitiromẽ afe yora inõfo? Maa, judeofomafori ato ifitiro Jesús chanĩmara faifono afe yora inõfo.
30 Niosfi fistiki. Judeofori, judeofomafãferi Jesús chanĩmara fakanax Nios fe nipanakafo ato chaka soaxonano.
31 ¿Nõ Jesús chanĩmara faxõ a Moisés kirika keneni nõ potatiromẽ? Maa, nõ potatiroma. Jesús chanĩmara faxõ a Moisés Niospa meka yoikĩ kirika keneni nikakĩ nõ chanĩmara fatiro.