6
Cristo nia keskara nõri afe nĩpatiro
1 Akka yorafãfe atirito shinãkakĩ iskakani: “Nõ afara mẽxotaima chakafafiaino Epa Niospa noko noikĩ nõko chaka noko soaxotiro. ¿Nãskakẽ nõ afara chakafa fafafãitiro,” ixõ anori shinãkani sharamẽ? Maa, sharama.
2 Nãskakẽ afara chaka shinãyamakãfe. Nõ Jesús chanĩmara faxõ mã nõko chaka nõ pota. A nõ ipaoni keskara nõ anã shinãpaima.
3-4 Mã mã tãpia noko maotisafani nõ fetsafo õimanõ. Nãskax nõ a Jesús fe naa keskara nõ chaka ipaoni keskara anã shinãima. Nãskakẽ nõko chaka soapaikĩ nõ Jesús chanĩmara faino noko maotisafani. Jesús nokoõnoax naano maifanifo. Nãskax nõ afe naa keskarax nõri maia keskara. Akka Jesús naax otoinãkafata Apa ari kani. Nõri nono mai anoax Jesúsnoax ari nõ katiro. Askaxõ Apa Niospa mã Jesús otofaxõ noko õimani nãatomãi afama mĩshti fatiroxakĩ. Nõko õiti noko fetsafaano a nõ ipaoni keskara nõ anã itiroma, a keskara sharakõi nõ ipai.
5 Cristo nõkoõnoax nani. Nã nõ chanĩmara faax nõ afe rafetiro. Nãskakẽ Jesucristo nakẽ Apa Niospa otofani keskafakĩri anã otofatiro, a keskara shara nõ inõ.
6 Jesús mastanifo nõko chaka noko soaxonõ. Nõri Jesús fe masta keskarakõi anã chakafapaima. Nãskarifiai nõ Jesús Ifofaax nõ afe naa keskara. Nãskaxõ nõ anã chaka shinãima. Afara chakafo nõko ifoma.
7 Akka yõra nãxokai anã chaka shinãtiroma. Nãskarifiai nõri chaka shinãtiroma afara chakakairoko nõko ifokẽ.
8 Nõ Cristo fe naa keskaraxõ nõ Jesús chanĩmara faax nõ afe isharapakenaka nãmãi nõ chanĩmara faax.
9 Mã nõ tãpia Cristo mã nafiano Niospa otofani. Nãskax anã natiroma. Anãkai afeskax Cristo natiroma.
10 Akka nai fistinixakĩ nõko chaka noko soaxoni anã afara chaka nõko ifo inõma. Nãskakẽ iskaratĩa Cristo mã nia. Nãskaxõ nã Niospa apaiyai keskafai.
11 Mãri Cristo fe naa keskara. Nãskakẽ iskaratĩa mã shinãtiro iskakĩ: “Ẽ chaka ipaoni keskara anã shinãpaima. Nãskax ẽ iskaratĩa Jesucristoõnoax Epa Nios fe rafe kakaini ea amapaiyai keskara axiki,” ixõ anori shinãkãfe.
12 Nãskaxõ afara chaka anã ifofayamakãfe afara chaka mato famapai kiki a keskara mã anõma.
13 Nãskax Niosnoax isharakãfe. Afara chaka mato famapaifiaito nikayamakãfe. Afara chakafamis iyamakãfe. Nios Ifofakãfe mato sharafanõ. Iskafakãfe: “Nios ẽfe Ifokõixõ ea amapaia keskara ẽ aki sharafakĩ.”
14 Akka anã afara chakapa mato afeska fatiroma. Afara chaka anã mãto Ifo itiroma mã mã Cristo chanĩmara faano. Epa Niospa mato noikĩ ares fisti mato ifitiro mã afe ĩpaxanõ. Akka nã Moisés kirika keneniõnoaxkai mã Nios fe ipaxatiroma.
Epa Niospa mato amapaiyai keskara mã nikakõiyanã mã yonoxokõitiro
15 Moisés yoini keskara nõ nikaito Epa Niospa noko nimasharaima. Akka Cristo nõ chanĩmara faito noko noikĩ noko nimasharatiro. Nã fisti nõko Ifo itiro noko chaka soaxonano. Nãskatari, ¿nõ afara chakafa fafafãitiromẽ Niospa noko noikĩ nõko chaka soaxonõ? Maa, nõ afaa chakafatiroma.
16 Mã tãpia ãfe yonomatixõ mãto ifo nikakõiyanã mã yonoxotiro. Nãskarifiakĩ mã katotiro fatomãkĩ mãto Ifo. Epa Nios mã nikakõitiro ãfe yonomati ixii, askayamai chaka mã katoax mã ãfe yonomati mã itiro. Chaka katoax mã naax mã omiskõixii, mã Nios fe nipanakama. Askatamaroko Epa Nios nikakõiax mã afe isharapakenaka.
17 Mã afara chaka ifofaax ãfe yonomati mã ipaoni. Akka iskaratĩa mã mã Epa Nios Ifofaa. Mato yoimis keskara mãto shinã mẽraxõ mã nikakõimis. ¡Aicho! Mã mã Epa Nios Ifofaano mato nimasharamis.
18 Nãskakẽkai afara chaka anã mãto ifo itiroma anã mato yonomatiroma. Akka iskaratĩa afara shara fisti mãto ifo itiro. Mãfi ãfe inakõifoki.
19 Ẽ mato meka fekax yoima, mãto ifoõnoa ẽ mato yoinõ mã tãpisharakõinõ. Chaka fetsa fetsatapafo mãto ifo ipaoni. Nãskaxõ mã afara chakafakĩ finakõipaoni. Akka iskaratĩa Epa Niospa ãfe inafo, mã. Anã afara chakafayamakãfe afara shara fisti mãto ifo inõ.
20 Taeyoi afara chaka mãto ifo ipaoni. Nãskakẽ afara shara mã shinãpaonima mãto ifo ipanã.
21 ¿Mã ipaoni keskara sharamẽ? ¿Mato imasharapaonimẽ? Maa, a nõ ipaoni keskarakai anã afokai nõ shinãpaima. Afo nõ shinãi nõ rãfitiro. Nã chakafo xateyamax nã nõ naitĩa nã omiskõipakenakafo mẽra nõ katiro.
22 Nãskakẽ iskaratĩa afara chaka anã mãto ifoma. Epa Nios mãto Ifo. Mãfi ãfe yonomatifoki. Mã ãfe yonomatifokẽ mato sharafa fafafãini a keskara shara mã inõ mã afe ĩpaxanõ.
23 Nã afara chaka nõko ifono, ¿afanã noko kopifaimẽ? Akka aõnoax nõ naax nõ omiskõipakenaka. Akka Jesucristo nõ Ifofaino Epa Niospa noko afaa kopi yõkaima nõ afe nipaxanõ.