2
Jesús a Ifofaafo Efeso anoafo ato yoini taekõifakĩ
1 Jesús ea yoia iskafakĩ: “Efeso anoxõ a ea Ifofaafo a ato Niospa meka yoimisto na kirika ato anexonaito nikanõfo, iskafakĩ kenexõfe: ‘Ẽkĩa mãto Ifo Jesús keyokõi yorafo ẽfe Epa Niospa meka yoimisfo ẽ ato kexetaifaa. A ẽ mato yoiai anori ea nikasharakõikãfe.
2 A mã ikai keskara mẽ tãpia, mẽ mato õi. Mãfi eõxõ fãsi yonosharakõimiskĩ. Afara fetsa afeskara afiaito mã tenekõimis. A yorafãfe afarafo chakafamisfo anorikai mã tãpipaimisma. Akiki mã inimapaimisma afara chakafaifono, nãskax mã ato fe rafekaspamis. Yora fetsafãferi mato yoikĩ iskafakani: “Cristo ea nĩchia ẽ mato yoinõ,” ixõ mato yoiaifãfe, “Nõ ato nikayonõ,” ixõ mã ato nikataifaa. Fanĩrira mato yoiaito anã chanĩki yoimara mã faima mẽ mato õia mã askafaito. Anorima yoi ãa chanĩmisfo mã mã tãpia.
3 Nãskax mã eõnoax omiskõikĩ mã tenemis ea potakaspakĩ.
4 Mã anori shara shinãfimiskẽ ẽ anã meka fetsari yoinõ. Taefakĩ mã ea noiyopaonixakĩ anã iskaratĩa mã ea anã noisharaima. Mã mã ea shinãmaki fetsea.
5 Shinãsharakãfe a mã taefakĩ shinãyopaoni anori. A ea noikĩ mã taefani keskafakĩ anã ea noikãfe. Askatari mã ranã mã nõinãyopaoni keskakõikãfe. Akka mã ea tanaima, oa chii nokaito nõ anã kẽtefatiro keskafakãfe ea shinãkĩ. Mã ea Ifofasharayamainokai chipo tsõa anã mato tanaima. Mã ichanãi ano anã tsoakai mato fe ichanãima.
6 Mã askafixõ afara fetsa mã shara famis. A feronãfake ãfe ane Nĩkoraita fanĩrira yoiaito nikakakĩ atirifãfe mato anoxõ nikakaxõ, afãferi chakafamisfo keskafakĩ ẽri ato noikaspai. A ẽ noikaspai keskafakĩ mãri efeta noikaspai.
7 Mã pachoyakĩ ea nikakõikãfe. Niospa Yõshi Sharapa mato yoiaito nikasharakõikãfe. Satanás mato fanĩrira shinãmapaimiskĩ. A Satanás finõinĩfofã ea kachikiri fatama ea Ifofasharakõiaito, aafi Epa Nios ano ẽ ikimaxii efe isharapakexanõ,’ ” ixõ Jesús ea yoia anori Efeso anoafo a chanĩmara faafo ato ẽ kenexonõ.
Jesús Ifofaafo Esmĩrnã anoafo ato yoini
8 Anã Jesús ea yoia iskafakĩ: “A ea Ifofamisfo Esmĩrnã anoafo a ato Niospa meka yoimis ẽ yoinõ ea kirika kenexõfe iskafakĩ: ‘Ẽkĩa mãto Ifo Jesús ẽ mato yoi mã tãpinõ. Ea nikasharakãfe. Nã afama mĩshti onifataima ẽ iyopaoni. Iskaratĩa ẽ nĩpanaka. Mẽ nayofinixakĩ ẽ anã nanakama. Ẽ mato nonori yoi iskafakĩ:
9 Mã omiskõiaito mẽ õi. Askatari mã afaayafoma. Mã askafiaino ẽ mato fe ikano, ea keskarari mã shara itiro. Mẽ tãpia matoõnoa yora fetsafãfe meka chakayoiaifãfe. “Nõ judeofo, nõ Nios Ifofamis,” ikaxõ yoiaifo afokai efe yorafoma. Afofi Satanás yorafoki.
10 Akka a inõpokoai ẽ mato yoinõ. Satanás ifofaafãfe fatora fetsa fisti mato karaxa mẽra ikimaxikani mã ea shinãmakimãkai õixikakĩ. A mato mesenifaifono rateyamakãfe. Ea shinãmakitama nonori shinãkãfe iskafakĩ: “Ea retefiaifono ẽ meseima, ẽ Nios ari kai. Ẽfe Ifãfe ea potanakama. Ẽ ẽfe Ifo noikĩ finakõifafãini,” ixõ yoikãfe. Mã askax, nakẽ, ẽ mato ĩkipakenaka mã efe ĩpaxanõ.
11 Mã pachoyakĩ nikasharakõikãfe Niospa Yõshi Sharapa mato yoiaito mã Jesús Ifofakĩ. Fetsa omiskõifikĩ ea shinãmakiyamaito Satanás afeskafatiroma. Nãskax naax a omiskõipakenakafo mẽra katiroma,’ ” ixõ anori Jesús ea yoia a Ifofaafo Esmĩrnã anoafo ẽ ato kenexonõ.
Jesús Pérgamo anoafo a chanĩmara faafo ato yoini
12 Anã Jesús ea yoia iskafakĩ: “A ea Ifofamisfo Pérgamo anoafo a ato Niospa meka yoimis a ẽ yoipaiyai anori ẽ yoinõ ea kirika kenexõfe tãpinõfo. Iskafakĩ kenefe: ‘Ẽkĩa mãto Ifo Jesús ẽ mato yoi mã tãpinõ. Ẽfe meka oa keno chainipa takairafe ikikõiai keskaraxõ, ẽfe mekapas a ea noikaspaifo tii ẽ ato chakafatiro kopikĩ.
13 Mẽ tãpia a pexe rasi Pérgamo ano mã ika. A Pérgamo anoafãfe Satanás nikakõikani. Askaito õi mã mesemisma, ea Ifosharafai. “Jesús nõko Ifokõi,” ixõ mã ato yoimis. A ea Ifofamis fetsa ãfe ane Antipas eõnoa ato yoimis õikĩ mã reteafo noikaspakakĩ. Mã reteaifãfe õifiax mã atoki meseima, mã ea chai faama. Mãto õiti mẽra mã shinãsharakõi. “Noko retefiaifonokai nõko Ifo Jesús nõ chai faima,” ixõ mã yoimis. Anori mã shinãi sharakõi.
14-15 Akka nãno afara fetsa a sharama ẽ mato yoipai. Fatora mã fetsa a Balaam afara chaka yoini keskara mã shinãmakikaspai. Akka taeyoi xanĩfo Balac israelifo chakana famapaini. Nãskaxõ Balaam yõkani: “¿Afeskaxõ mĩ kaifo ẽ ato chakana famatiromẽ?” faito, Balaam kemani iskafakĩ: “Mĩ ato yoitiro mĩ fista mẽra ato ikikixiki. Nã mã akai keskarari akairi anõfo. Nã nõko niosra ixõ afara onifaxõ a mã piai mã inãmis. Nã israelifãfe pikanax chakananõfo mãto fista mẽranoax. Askatari ãto ãfima fe ikanax chakananõfo,” fani. Iskaratĩari nãskarafori mã fisti rasi chakanafo nã Nicolaitafãfe ato afara chaka tãpimanaifo keskara ikafo.
16 Nãskakẽ anã iskaratĩa askafayamakãfe. Nios Ifofakãfe, anã shinãkãfe. Mãto chaka xatekãfe shinãmitsayanã. Akka mã chaka xateyamaito, ẽ matoki samamashta nokoxõ ẽfe mekapa ẽ mato kopikĩ chakafatiro mã omiskõinõ. Ẽfe mekafi oa keno ikiai keskarakõikĩ.
17 Mã pachoyaki ea nikakãfe. Niospa Yõshi Sharapa eõnoa mato yoiaito, nikasharakãfe. Satanás mato chakafamapai. Fẽtsa Satanás nikayamaxõ ea kachikiri faamano, nã ẽ kexesharaxii nã ẽfe Epa israelifo kexesharani keskafakĩ. Shinãkapo. Epa Niospa israelifãfe ãto xinifo a piaifo ato inãni fonãikaifãfe afaa piamaifãfe Epa Niospa nai mẽraxõ ato põtani oa misi keskarafo ãfe ane mãnã nã pinõfo ato põtapaoni pena tii ato noikĩ. Nãskafakĩri nã ea chanĩmara faafo ea Ifo sharakõi faifo ẽ ato inãxii ẽfe Yõshi Shara isharapakexanõfo. Ea õiyamafiaifono pena tii ẽ ãto õiti xafasharakõi faxotiro. Askatari mã ea Ifo sharafaifono isharakõiyanã mã ea chanĩmara faino, akka ẽ mato ane fetsafaxõi tsõa tãpimisma, nã fiai fistichi tãpitiro. Tokiri oxosharakõikĩ nã tokiriki mã mãto ane kenea mãto ane fena ẽ mato inãxii. Nãskakẽ ea tãpisharakõixikani. Mã õitisharayakõi ixii,’ ” ixõ Jesús anori ea yoia a chanĩmara faafo Pérgamo anoafo ẽ ato kenexonõ.
Jesús a Tiatira anoafo a Ifofamisfo ato yoini
18 Anã Jesús ea yoikĩ iskafaa: “Ea Ifofaafo Tiatira anoafo Niospa meka ato yoimis a ẽ yoipaiyai anori ẽ yoinõ ea kirika kenexõfe iskafakĩ: ‘Ẽkĩa ẽ mãto Ifo Jesús ẽ mato yoisharapai mã tãpinõ. Ẽfe fero oa chii xoisai keskara. Nãskakẽ ẽ mato tãpikõia. Ẽfe taeri nã keno fakka fakka ikai keskara. Nãskakẽ ẽ mato yoikĩ iskafai:
19 “Mẽ mato tãpia, nã mã afara shara famis. Mã nõinãkõi. Askatari mã ea chanĩmara faxõ mã ea Ifokõi famis. Nãskakẽ fetsafori mã noisharakõimis ato kexesharayanã. Mã omiskõifikĩ eõxõ mã tenekõimis. Mã ea chanĩmara fakĩ taefanitĩa mã fetsafo sharafamis. Nãskakẽ iskaratĩari mã ato noisharataifaa.
20 Mã mã askafimisno afara fetsa ẽ mato yoinõ a ẽ fichipaiyaima mã anã fichipainõma. Akka kẽro fisti mato fe ichanãxõ, ‘Ẽ Niospa meka ẽ mato yoinõ, ea nikakãfe,’ ixõ mato yoipaikĩ, ẽfe mekakõi mato yoima. Nã kẽro Jezabel fanĩrira mato yoikĩ ãa mato pãramis. Mã Jesús Ifofafiamiskẽ mato pãramis iskafakĩ: ‘Mãto ãfimafo chotakãfe; kẽrofãferi mãto fenemafo chotamakãfe,’ mato famis. Askatari mato yoimis iskafakĩ: ‘Afara fetsa yora fakaxõ, nã nõko niosra ixõ, a mã piai ispaxõ nõko nios nõ inãira ixõ, ano fisti ichanãxõ, mã pitiro,’ ixõ na kẽro Jezabel mato yoikĩ mato pãramis.
21 A kẽromã fanĩrira mato yoimis mẽ yoitaifamis anã chakafanõma. Ẽ yoifiaitokai ãfe chaka xatepaima.
22 Ẽ yoifiaino ea nikayamaito õikĩ ẽ isinĩ imaxii rakatsax omiskõinõ. Askata a fetsafori a keskara a sharashinãifoma ãto chaka xateyamaifãfe ẽ ato omiskõimani.
23 A kẽromã shinãi keskarari shinãifo ẽ ato retexii. Ẽ askafaito, õikani a ea Ifofamisfo mai fetsafo arixõ tãpitirofo ẽ keyokõi yorafo ẽ tãpisharakõia. Mãto õitinĩ a mã shinãi anori mẽ tãpikõia. Tsõakai afaa pishta ekeki onetiroma. Ẽ keyokõi tãpikõia. Nãskakẽ mã afarafo shara famis ẽ mato shara faxii kopifakĩ. Akka a afarafo chakafamisfo ẽ ato omiskõimaxii kopikiri.
24 Efe yora mĩshtichi Tiatira anoafãfe, mã atiri nã kẽromã mato fanĩrira yoipaiyai anori mã nikamisma. Satanás ato tãpimamis keskara mã anori shinãpaima. Askara shara. Nãskakẽ ẽ anã mato afaa fetsa yoima.
25 Nãskakẽ ẽ anã fistiri mato yoi. Na eõnoa mã tãpimis anori shinãmakiyamakãfe. Ẽ mato ifiyoai mã eõnoa tãpimis anori shinãmakipaiyamakãfe.
26-28 Fẽtsa Satanás finõkõixõ, ea fisti Ifokõifaax mã naax nã efe nĩpanaka. Ẽ ato xanĩfo imaxii. Epa Niospa ea xanĩfokõi ima keyokõi ẽ ato ĩkinõ. Nãskarifakĩ ẽ ato xanĩfo imatiro efeta na maitio anoafo ato ĩkinõfo, mitsisipakõixõ. Akka a fetsafãfe ẽfe meka shara nikakaspaifãfe nõ ato omiskõimaxii. Oa nõ kesho kerexkai nõ yamĩ moshaino moshitiro keskara afeskaxõ nõ anã shara fatiroma. Nãskarifakĩ nã nikayospamisfo nõ ato omiskõimanaitĩa tsoa pishta ato timamatiroma nanõfoma. Mã penaino, fishifã fisti fafeaito, keyokõichi yorafãfe õitirofo. Aa keskara ẽ anã oxii ea õisharanõfo. Ẽ anã nokoxõ, ẽ ato yoixii nã ea Ifofamisfo efe isharapakexanõfo.
29 Mã pachoyakĩ ea nikasharakãfe. Niospa Yõshi Sharapa mato yoiai keskara nikasharakãfe,” ’ ” ixõ Jesús anori ea yoia a Ifofaafo Tiatira anoafo ẽ ato kenexonõ.