8
Nã taxtati mã keyoaino Jesús fẽpea
Mã kirika ãfe taxtati keyoano Jesús fẽpeaito ẽ õia namakẽ õiai keskara. Nã seis taxtati taefakĩ fẽpeyoa. Akka iskaratĩari fetsari fẽpea mã keyoaino. Fẽpeano Nios ika ano nai mẽranoax keyokõi nishparakafo. Media hora nishparakayoafo. Nishparakaifono ẽ õia Niospa ãfe ãjirifo siete a ketaxamei niafãfe, nãfãfe Niospa ato yoimis keskara anõfo. Niospa ato tii maneti inã nã ato yoiaitĩa ãto maneti chãi chãisafanõfo. Askata Niospa ãjiri fẽtsa sapa oro fakka fakka ikai keskara tsomax Epa Nios kĩfiti ano nia ẽ õia. Akka fẽtsa sapa kamaki nakas otaxõ naneaito ẽ õia. Nãskaxõ Nios kĩfiti mĩsa ano oro kamaki sapa faa. Askano ãfe kõi nakas shara nai mẽra foa ãfe mifi kamaki sapa tsomano. Nãskarifiai Niospa yorafãfe kĩfiaifono Epa Nios ika ari nokoaito nikatiro. Akka ẽ anã õia Epa Niospa ãfe ãjiri yoiaino, mĩsa kamakinoa chii fixõ ãfe sapa kamaki chii fospi faa. Fospi fata nai mẽraxõ mai ano pota. Askaino mai anoax nai fãsikõi tiiri ika pachakõi ika, kanari piishika mairi naya naya ika. Nãskakẽ nã chanĩmara faafoma tii ato omiskõimaxii.
Ãjirifãfe maneti chãi chãisafaafo
Askata Niospa ãfe ãjirifãfe siete nã manetifo Niospa ato tii inã itipinĩsharafaafo chãi chãisafaxikãki.
Askata fẽtsa ãfe maneti chãi chãisafaino faka matsi tokoro efapafo imia osia nai mẽranoax keyopakea. Chiiri imiya osia nai mẽranoax mai ano pakea. Mãifã kaxke fetsa koofi keyoa ififoya. Akka ranãri texea. Akka fasifo kooi keyokõia.
Askata Niospa ãjiri fẽtsa ãfe manetiri chãi chãisafaino machi efapa chii xoisai keskara Niospa nai mẽraxõ nãmã pota. Fakafã mẽra pakea. Askaino fakafã kaxke fetsa imi keskara ika. Nãskakẽ fakafã mẽranoax fafĩfo ranãri naafo. Askatari kanõanãfãfori ranãri kooafo.
10 Askata Niospa ãjiri fẽtsa atori ãfe maneti chãi chãisafaino fishi efapakõi xofisai chii keskara nai mẽranoax pakea fakafo mẽra. Akka faka fetsafo mẽrari pakeama. Askatari faka poyo poyo ikai ano pakea. 11 Nã fishifã ãfe ane Mokara famisfo. Nã fishi faka mẽra pakeano, faka moka paekõi ika. Nãskakẽ nã faka ayakanax yorafo ranãri nai fetseafo.
12 Askatari Niospa ãjiri fẽtsa ãfe manetiri chãi chãisafaino xinĩ anã chaxasharama. Õxeri anã chaxasharama. Askatari fishifãferi anã ranãrito chaxasharama. Nãskakẽ penafekẽ tsõa anã õisharatiroma. Fakish finakõia ika. Tsõa askara fakish õiyomisma.
13 Ẽ nãfo õiaino tetepafã keskara keya yoyaito ẽ nika. Fãsikõi mekayanã yoia iskafakĩ: “¡Ooa! Yorafãfe Nios nikakaspakanax omiskõikani finakõixikani. Niospa ãjiri tres fetsafãfe ãto maneti chãi chãisafaifono mai ano ikafo omiskõifinaxikani,” ixõ tetepafã keskarato yoia.