4
Timoteo, ẽ mia kaxeta yoima, nikafe. Jesús oatĩa nõko xanĩfokõi ixii Apa Nios feta, keyokõi yorafo namisfo yafi niafori ato yoixii. Jesús chanĩmara fakanax afe nai mẽra nisharapakenakafo; akka a chanĩmara famisfoma chiifã mẽra Niospa ato potai omiskõipakexanõfo. Nãskakẽ ãfe Fake Jesucristo feta Niospa noko õiaino ẽ mia yoi iskafakĩ: Niospa meka fena fenakima ato yoife fenãmãshta shara. A nikapaiyaifo askatari a nikakaspaifori ato yoisharafe, mĩ ato yoisharaino ãto chaka xatenõfo Jesús Ifofasharax isharanõfo. Shinãsharata, Niospa meka mẽstekõi yoife. A yora chakafamai nokoaino yorafãfe Niospa mekakõi nikakaspatirofo. A nikatamaroko meka fetsafo shinãtirofo, nã apaiyai keskafakakĩ. Anori fisti shinãkani. Nãskakanax ano fisti ichanãkaxõ anorima a fetsafãferi yoiaito nikakakĩ. A Niospa mekakõi nikakaspakani a ãto xinifãfe shinãpaonifo keskari fakakĩ. Nãskakẽ Timoteo, õisharafe. Afara afeskaraito Niospa mekakõi Ifofasharafe; mĩ shinãfenotama anori tãpisharafe. Mia omiskõimanaifono tenefe. Kafãkakaikĩ yorafo Jesúsnoa tãpimafe Ifofanõfo. Nã mia Niospa yoiai keskafafe shinãfãi.
Iskaratĩa eõnoa ẽ mia yoi. Anã ẽ samarakaima mẽ chaima nai ea Jesúsxõ retexikani. Mẽ yonosharakõitiani ẽfe Ifo Jesúsxõ. Ẽ chanĩmara fatitaifaa enekima. Keyokõi Niospa ea yoiai keskara mẽ aka. Nõko Ifokõichi ea õimis ẽ Ifofasharakõiaito. Nãskakẽ ẽ akiki nokoaito ea afarafo inãsharaxii. Eres fisti ẽ fixiima. Nã nõko Xanĩfo finakõia oaitĩa keyokõi nã Ifofaafãferi fixikani. Aõ noikĩ a manaifori ato inãsharaxii.
Pablonõ Timoteo fisti yoini kirika kenexokĩ
Timoteo, ea ano orisape. 10 Demãs afarafo fichipaikĩ ea nonoa õifaiti, Tesalónica ano kakĩ. Askatari Crescenteri kati Galacia ano. Askatari Titori Dalmacia ano kati. 11 Akka na Lucas fisti efe ika. Nãskakẽ Marcos ea efexõfe ea axosharaiyonõ Niospa meka ato yoikĩ. 12 Akka ẽ Tíquico Efeso ano nĩchiyamea ẽa. 13 Mĩ oaitĩa ea ẽfe rakoti fexõfe a Troas ano ẽ faferati a Carpo pexe ano. Askata ẽfe kirikari ea fẽxota, askatari kirika fetsari ea fẽxota a fakka fichisharakõi ẽ akiki kenemis, aari ea fexõfe. Ẽ afo fichipaikai.
14 Na yami famis Alejandro ea fãsi mekafamis. Aato ea chakafaito õikĩ Niospa kopikiri omiskõimaxii. 15 Õisharafe. Alejandro miari chakafatiroki na meka shara Jesúsnoa nõ yoiaito noko meka xatemapai kiki.
16 Akka ea taefakĩ xanĩfo ano iyonifo tsõakai eõnoa yoisharanima. Akka keyokõichi ea õifainifo fõkakĩ. Askafiaifono ẽ Nios iskafakĩ yoini: “Epa, na ea nonoa õifainaifo ato chakafayamafe,” ixõ ẽ Nios yoiyamea. 17 Ea askafafiaifono ẽfe Ifãfe Jesús ea potayameama, ea kexexõ. Ea askafaifono ẽ ratetima ẽfe Ifãfe ea kexeano ãfe kerex ea inãno ẽ ato yoinõ. A judeofomafãfe ea yõkaifãfe keyokõi nikanõfo ẽ Niospa meka Jesúsnoa ato yoiyamea. Ẽ askaito ea retepaikakĩ, oa poomãnã noko pipaiyai keskara ea fatifo ea retepaikakĩ. Ea askafafiaifono ea Niospa kexesharayamea ea tsõa retenõma. 18 Afara chakafo ekeki nokoaito õikĩ ẽfe Ifãfe ea kexetaifa a ẽ akiki nai mẽra nokoaitĩa. Fãsi nõko Nios sharakõi, tsoa fẽtsakai askafatiroma. Nãskakẽ tsõa nõko Nios finõtiroma. Ares fisti sharafinakõia. Nõ aõnoa yoisharapakexanõ. Nãskapakexapainõ.
Pablo mã mekai xatekĩ ato meka shara fomani
19 Timoteoshta, ea Prisca yafi Aquila ea yoixõfe, keyokõi yorafo Onesíforo pexe ano ikafori ea yoixõfe. 20 Erasto Corinto ano nẽteyamea. Trófimo isinĩ ikĩ rakakẽ ẽ Mileto ano rataferayamea. 21 Nã mechaka ikamano ekeki ofe. Eubulonõ, Pudentenõ, Linõnõ, Claudianõ, keyokõichi Jesús chanĩmara faafãfe mato yoisharapaikani.
22 Nõko Ifo Jesucristo mefe ipaxanõ. Askatari Niospa mato noikõikĩ mato kexesharakõinõ keyokõi. Nã tii ẽ mato yoi.
Ẽkĩa Pablo