7
Ɲaxanla nun xɛmɛna xanuntenyana
Xɔyine falana:
1 I xun xɛtɛ, i xun xɛtɛ,
i tan Sulami kaana!
I xun xɛtɛ, i xun xɛtɛ
alogo nxu xa i mato.
Nanfera i Sulami kaan matoma
alo gali firinna nɛma e bodonma?
Xɛmɛna falana a ɲaxanla xa:
2 I sanne rayabu
i ya sankidine kui,
i tan xɔrɔ ɲaxanla!
I danbane rayabu
alo yiirafalan ɲɛrɛn naxan nafalaxi.
3 I xuli fundin luxi nɛn
alo lenge radigilinxina,
minse xiri ɲaxumɛn mi ɲanma dɛnaxan yi.
I kuiin luxi nɛn
alo murutu malanxina
naxan nabilinxi gabala fugene ra.
4 I xiɲɛ firinne luxi nɛn
alo bolen dii gulun firinne.
5 I kɔɛɛn mɛrɛndɛnxi nɛn
alo sanganso sama ɲin daxina.
I yɛɛne mayilenma
alo Xɛsibɔn dara igena,
Bati-Rabimi so dɛɛn dɛxɔn.
I ɲɔɛɛn fan alo Liban sangansoon
naxan tixi Damasi taan binni.
6 I xunna ratinxinxi i gbindin dɛ
alo Karemele geyana,
i xun sɛxɛne mayilenma
alo mangane dugi mamiloxine.
Mangan mi nɔɛ a yɛɛn bɛ e ra.
7 I rayabu, i tofan han,
n xanuntenna, n ma sɛwa xunna.
8 I kuya alo tugu binla,
i xiɲɛne luxi alo tugu bogi tɔnsɔnne.
9 Nanara, n na a falama, n naxa,
“N tema nɛn tugu binla kɔɛ ra,
n yi a bogine suxu.”
I xiɲɛne luxi nɛn
alo ɲaxundan tɔnsɔnne,
i dɛ foyen xirin luxi nɛn
alo mangon mɔɛɛn xirina.
10 I dɛɛn xirin luxi nɛn
alo manpa xiri ɲaxumɛna.
Ɲaxanla falana a xɛmɛn xa:
Na manpaan xa lu n xanuntenna nan xa,
a godo a dɛ kidine nun a ɲinne ma.
11 N xanuntenna nan gbee n na
a waxi n tan nan xɔn.
12 N xanuntenna,
fa en siga burunna ra,
en kɔɛne radangu banxidɛne ra.
13 Xɔtɔnni en kurun sigɛ manpa bili nakɔne yi,
en sa a mato
xa e solima, xa e fugama,
xa girenada binle fugama.
Mɛnni, n sa n ma xanuntenyaan yita i ra.
14 Marafan bogi binle e xiri faɲine raminima,
bogise faɲine birin en dɛxɔn.
N xanuntenna,
n fe faɲine birin namaraxi i tan nan xa
a fonne nun a nɛnɛne.