12
Tow’ath ni yib rok fare Kan Nthothup
1 Nggu wan nga murung’agen e pi tow’ath nma pi’ fare Kan Nthothup.
Pi walageg ni girdi’en Kristus, gub adag ni ngam nanged e tin nib riyul’ ni murung’agen e pi tow’ath nem.
2 Gimed manang ni ngiyal’ ni ba’aram ndawor mu nanged Got riy e i gagiyeg nagmed e liyos nma meybil boch e girdi’ ngay, ni bogi ban’en nib yam’, ni gubin ngiyal’ ma yad be fekmed nga wuru’ e kanawo’.
3 Thingar mu nanged ndariy be’ ni fare Kan Nthothup rok Got e be pow’iy nrayag ni nge ga’ar, “Dayigi buch wa’athan Jesus!” ma dariy be’ nrayag ni nge weliy ni nge ga’ar, “Jesus e Somol,” ni fa’anra gathi fare Kan Nthothup e ke pow’iy keyog.
4 Bo’or mit e salap nma yag ngak e pi’in girdi’en Kristus, machane ta’ab Kan Nthothup e be yib rok.
5 Bo’or kanawo’en ni yima pigpig, machane ta’ab Somol e yibe pigpig ngak.
6 Ba thilthil rogon e tin nrayag rok be’ nge be’ ko pigpig, machane ta’ab Got e be pi’ e salap ngak urngin e girdi’ ni fan nga urngin e pigpig.
7 Ra be’ ma kan pi’ ngak e mich riy ni bay fare Kan Nthothup rok ni fan e nge yib fan ngak urngin e girdi’.
8 Kan Nthothup e bay n’en me pi’ gelngin be’ nge yag rok fa’anem ni nge fonownag e girdi’ u fithik’ e gonop, ma ku re Kan Nthothup nem e pi’ gelngin yugu be’ nge yag rok fa’anem ni nge tamilangnag fan e thin rok Got u wan’ e girdi’.
9 Ma be’ e ka re Kan Nthothup nem e ke pi’ ngak e michan’ rok ngak Kristus, ma be’ e ke pi’ gelngin ni nge golnag e liliy rok e girdi’.
10 Ma re Kan Nthothup nem e bay n’en me pi’ gelngin be’ nge yag ni ngongliy fa’anem e maang’ang; me pi’ gelngin be’ ni nge machibnag e thin rok Got ngak e girdi’; me pi’ gelngin be’ nge yag ni nang e tin ni yib rok fare Kan Nthothup nge tin ni gathi Kan Nthothup e yib rok. Me pi’ gelngin be’ nge yag ni welthin nthin ndawor nrung’ag ma da nnang fan; me pi’ gelngin be’ nge yag ni weliy fan e pi thin nem.
11 Machane ta’ab Kan Nthothup e be rin’ urngin e pin’ey; ra be’ ma ba thil e bin nike pi’ e tow’ath ngak nrogon nike finey.
Ta’reb e dowef ma pire’ yang riy
12 Yi Kristus e bod ta’ab dowef ni bo’or yu yang riy ni bay; ka ta’ab dowef, ni yugu aram rogon nib thilthil rogon urngin yang riy.
13 Ere aram rogodad ni gadad gubin, ni piyu Israel nge pi’in gathi yad piyu Israel, nge pi sib nge pi’in yad e mmil farad ngorad ni kan tawfe nagdad kadmanged ta’ab dowef u daken ta’ab Kan ni Thothup, ma gadad gubin ni ta’ab Kan ni Thothup e kan pi’ ngodad.
14 Ya dowef e gathi ta’ab yang i dowey e ni ngongliy ngay, machane ni ngongliy nga bo’or yang u dowey.
15 Fa’anra nge ga’ar reb e rifrif u ey, “Gathi gag bang u dowey, ni bochan e gathi gag reb i rifrifen paay,” ma gathi aram e ra tal ndab ki mang bang ko fare dowef.
16 Ma fa’anra ga’ar baraba’ i teliy, “Gathi gag bangi dowey, ni bochan e gathi gag baraba’ i lan owchey,” ma gathi aram e ra tal ndab ki mang bang ko fare dowef.
17 Fa’an gomanga dowey ni polo’ e ta’ab lan mit mra di’in me rung’ag ban’en? Ma fa’an gomanga kemus ni baraba’ i teliy mra di’in me faray bon ban’en?
18 Machane aray rogon nra bangi dowey me Got e ke tay ko fare dowef nrogon ni finey.
19 Fa’an mang e dowey ni polo’ e ta’ab yang u dowey e ni ngongliy ngay ma dabi ngal’ nib dowef!
20 Ara’ rogon ni bo’or yang ni bay riy, machane ta’ab dowef.
21 Ere dabiyag ni nge ga’ar baraba’ i owchey ngak ba rifrif u paay, “I gur e dariy fam ngog!” Ara rayag ni nge ga’ar lolugey ngak e gal rifrif u ey, “Dariy famew ngog!”
22 Gathi aray rogon; ya dabiyag ni ngad pired ndariy e yungi n’en ni bay u dowdad ni gadad be finey nib me’waer,
23 ma yungi n’en u dowey nib tomur u wun’dad e ireram e yu yang ni ir e gadad ma tiyan’dad ngay ngu’ud fal’eged rogon; ma yu yang u dowey nde fel’ usun e ri yima ayuweg,
24 ma danir rin’ ngak e yu yang ni bfel’ ya’an u dowdad. I Got e ke chamey dowdad ni aram rogon ni fan e nge gel i tayfan e yungi n’em u dowey nib tomur u wun’uy.
25 Ere de yu raba’ dowey, machane urngin yang nra bang ma ba thil ni yad be ayuweg yad.
26 Fa’anra gafgow bang u dowey, ma urngin e yu yang ni kabay e yad ma un ngak ko gafgow; fa’anra nog e sorok ngak bang riy, ma urngin e yu yang ni kabay riy ni yad ra un ngak fa gi nem ko felfelan’.
27 Ere gimed gubin ni gimed downgin Kristus, mra bigimed me ir bang riy.
28 I Got e urngin e girdi’ nra be’ ma ke fek ke tay ko gin ntagil’ ko galesiya ni ba’aray rogon: som’on e pi apostel, me migid e pi profet, me migid ma pi tamchib; me migid ma pi’in yad ma ngongliy e maang’ang, me migid ma pi’in ke pi’ Got gelngirad ni ngar golniged e liliy, ara ngar ayuweged boch e girdi’, ara ra pow’iyed yad, ara ra welthingad nthin ndawor nrung’ag ma da nnang fan.
29 Gathi yad gubin ni apostel, ara pi profet, ara pi tamchib. Ma gathi yad gubin ni bay gelngirad nrayag ni ngar ngongliyed e maang’ang,
30 fa ra golniged e liliy, fa ra welthingad nthin ndawor nrung’ag ma da nnang fan, fa reb e ra weliyed fan e pi thin nem.
31 Ere mm’oneged u wun’med e tin ni ka ba ga’ fan e tow’ath nma pi’ Got.
Machane bin th’abi fel’ e kanawo’ e ba’aray.