7
De’er ni murung’agen e mabgol
1 Ere chiney e fulweg ko fapi thin ni mu yoloyed nga babyor nge yib e ba’aray rogon.
Ra par be’ ni dabi mabgol ma bfel’.
2 Machane bochan e bo’or e girdi’ ni be ngongliy e ngongol ko darngal, ma aram e gubin e pumo’on nra be’ ma nge par ni bay leengin, ma gubin e ppin nra be’ ma nge par ni bay figirngin.
3 En ni pumo’on e nge pi’ ir ngak e bpin rok nrogon figirngiy, ma en ni bpin e nge pi’ ir ngak e pumo’on rok nrogon leengiy, nge bagayow me fal’eg laniyan’ bagayow nrogon nike t’uf rok bagayow.
4 Ya leengiy e gathi ir e suwon downgin, ya fa’anem ni figirngin e ir e suwon; ma ku errogon e en ni figirngiy ni gathi ir e suwon downgin, ya fa’anem ni leengin e ir e suwon.
5 Ra ba wu’ e mabgol ma dabi tel bagayow ir rok bagayow, kemus ni fa’anra ke ta’reban’row ngay ni ngar talgow u rogon n’umngin nap’an ni yow ba’adag, ni fan e nge yag nra tiyan’gow ko meybil; me mu’ miyow sul ngkur rin’ew e n’en nma rin’ e mabgol, ya ri fek Satan ban’en i yib ngak bagayow, ni ban’en nrayag ni nge pingeg fa’anem nge denen, ni bochan e dakiyag rok fa’anem ni nge k’adan’.
6 Dagur yog ngomed e re bugithin ney ni ban’en nthingar mu rin’ed, machane ban’en nrayag ni ngam rin’ed.
7 Bin riyul’ riy e ku gub adag ni urngin e girdi’ ni ngar pired ni bod gag; machane ra be’ ma tin nrayag rok ni Got e ke pi’ ngak, ni be’ e ba’aray ban’en nrayag rok, ma ba’aram be’ ni yugu reb e ban’en e rayag rok.
8 Chiney e ba’aray e thin ni nggog ngak e pi’in ndawor ra uned ko mabgol nge pi’in ni ppin nike yim’ figirngirad ni nge lungug: kabfel’ ni ngu’um pired ndab mu uned ko mabgol, ni bod gag.
9 Machane fa’anra dabkiyag ni ngam k’adedan’med, me ere mu uned ko mabgol — ya kabfel’ ni nga ni mabgol ko bin ni ngu’u nim’ ni bochan e ngan par.
10 Ba’aray bbugithin ni fan ngak e pi’in kar uned ko mabgol, ni gathi thin rog ya thin rok Somol nike ga’ar: be’ ni bpin nike mabgol e thangri dabi chuw rok e pumo’on rok;
11 ma fa’anra rin’, ma thangri par ndabki un ko mabgol fa reb e nge sul ngak figirngin nge fel’ thilrow; ma be’ ni pumo’on nike mabgol e thangri dabi n’ag leengin.
12 Ma boch e girdi’ e nggog ngorad (ni gag e gu be leamnag, machane gathi Somol e yib rok) ni be lungug: fa’anra bay be’ nib mo’on ni ir reb i girdi’en Kristus ni bay leengin nde mich Kristus u wan’, ma kabfel’ u wan’ fare pin ni ngu’ur pirew ni yow mabgol, ma thangri dabi n’ag fare pumo’on fare pin.
13 Ma fa’anra bay be’ ni bpin ni ir reb i girdi’en Kristus ni bay figirngin nde mich Kristus u wan’, ma kabfel’ u wan’ fare mo’on ni ngu’ur pirew ni yow mabgol, ma thangri dabi chuw fare pin rok fare mo’on.
14 Ya fare mo’on nde mich Kristus u wan’ ni figirngin fare pin e ke yib rogorow Got ni bochan e kar ta’ab girdi’gow leengin, ma be’ ni bpin nde mich Kristus u wan’ ni leengin be’ nib mo’on nike mich Kristus u wan’ e ke yib rogorow Got ni bochan e kar ta’ab girdi’gow fare mo’on ni figirngin ni ir reb i girdi’en Kristus. Ya fa’anra dabi aray rogon, mra par fakrow ni bod pifak e pi’in ndar nanged Got; machane rogorad ni yad be par e chiney e bay rogorad Got.
15 Machane fa’anra finey e arorow nde mich Kristus u wan’ ni nge chuw rok e arorow nike mang reb i girdi’en Kristus ma fa’anem nike mang girdi’en Kristus e nge pag fa’anem nge yan. Ya ra yodorom ma fa’anem ni girdi’en Kristus ko fa gali yabgol ndemturug ko en ni figirngiy ara en ni leengiy e rayag ni nge pag fa’anem nge yan; ya Got e ke piningmed ni ngam pired u fithik’ e gapas.
16 I gur e en ni girdi’en Kristus gur ma leengiy gur, ke di’in ma ka mu nang ndabiyag ni ngam thapeg figirngim ngak Kristus? Ara ke di’in ma ka mu nang i gur e cha’ ni kam mang girdi’en Kristus ma figirngiy gur ndabkiyag ni ngam thapeg le’engim ngak Kristus?
Mpired nrogon ni piningmed Got
17 Ra be’ ma ngi i ngongol i yan nrogon e re mit i ngongol ni ir e rayag rok ni Got e ke pi’ ngak, ma nge par ni karogon me taw e thin rok Got ngak. Ireray e n’en ni ngan fol riy ni gu be machibnag u gubin e galesiya i yan.
18 Fa’anra bay be’ ni ka ni mu’ i maad’ad ngak me taw e thin rok Got ngak, me fol ko fare thin rok Got ma dabi guy rogon ni nge chuweg aban rok; ma fa’anra bay be’ ndawor ni maad’ad ngak me taw e thin rok Got ngak, me fol ko fare thin rok Got ma dabi guy rogon ni ngan maad’ad ngak.
19 Ya dariy ban’en nrogon ni fa’anra kan maad’ad ngom fa dawor. N’en ni bay fan e ngan fol ko tin ke yog Got ni ngan rin’.
20 Ra be’ ma nge par ni karogon ko ngiyal’ ni taw e thin rok Got ngak me fol riy.
21 I taw e thin rok Got ngom me gur reb e sib fa? Dabi magafan’um ngay; machane fa’anra mu guy nike bung rogom ni nge dab kum mang reb e sib ni aram e gur e ke mil fam ngom, ma ga rin’.
22 Ya en nib sib nike taw e thin rok Somol ngak e Somol e ke pithig fa’anem ko denen kemang reb e girdi’ rok; ere ku aram rogon ni be’ ni ir e mmil fan ir ngak me taw e thin rok Kristus ngak e kemang sib rok Kristus.
23 Ya Got e ke chuw’iymed nib tolang puluwmed nike pi’; ere dab kum manged e sib rok e girdi’.
24 Pi walageg, ra be’ ma ngi i par rok Got ni bod rogon ni immoy ko ngiyal’ ni taw e thin rok Got ngak.
De’er u murung’agen e pi’in ndawori mabgol nge pi’in ke yim’ figirngirad
25 Nggu weliy murung’agen e pi’in ndawor ra uned ko mabgol ni nge lungug: dariy bbugithin nike yib rok Somol ngog ni nggu weliy ni murung’agen e pi cha’ney, machane nggog e tin gu be finey, ya gag be’ nike runguyeg Somol mrayag ni ngan pagan’uy ngog.
26 Rogon ni gu be leamnag e gafgow ni yibe tay e chiney e wun’ug e kabfel’ ni nge par be’ nib mo’on ni karogon.
27 Bay le’engim fa? Ere dab mu guy rogon ni ngam n’ag. Dawor mu’un ko mabgol? Ere dab mu gay reb e bpin ni ngam le’ay.
28 Machane fa’anra mu’un ko mabgol ma dawor mu ngongliy ba denen; ma fa’anra un reb e bpin nib muchugbil ko mabgol ma dawori ngongliy ba denen. Machane gu be finey ni nge siy mpir’eged e gafgow ni be pir’eg e pi’in nib mabgol ni gubin e rran.
29 Pi walageg, ba’aray e n’en ni gu be yog: daki yo’or e tayim nike magey, chiney i yan ngam’on e pumo’on ni kar mabgolgad e ngar pired ni gowa dawor ra mabgolgad;
30 pi’in yad be yor e ngar pired ni susun e dawori kireban’rad; ma pi’in yad be minmin e ngar pired ni susun e dawori felfelan’rad; ma pi’in yad ra chuw’iy ban’en e ngar pired ni susun e dawori milfan ngorad e n’en ni kar chuw’iyed;
31 pi’in yad be ngongliy e tin nu fayleng ban’en e ngar pired ni dabi mang ir e nge m’on u wun’rad. Ya re fayleng ney ni bod rogon e chiney ni bay e dabi par, ya bayi chuw.
32 Gub adag ndab i magafan’med. Be’ nib mo’on ndawori un ko mabgol e be tiyan’ ko maruwel rok Somol, ya be guy rogon ni ngi i fel’ u wan’ Somol:
33 machane be’ nib mo’on nike mabgol e be tiyan’ ko tin nu fayleng ban’en, ya ba’adag ni nge yan ngan’ leengin,
34 ere ruw yang ni yibe tangernag ngay. Be’ ni bpin nib muchugbil ara be’ ni bpin ndawori nang e pumo’on e be tiyan’ ko maruwel rok Somol, ya ba’adag ni nge pi’ ir nge laniyan’ ngak Somol; machane be’ ni bpin nike mabgol e be tiyan’ ko tin nu fayleng ban’en, ya ba’adag ni ngi i yan ngan’ figirngin.
35 Gu be yog e re bugithin ney, ya gub adag ni nggu ayuwegmed. Gathi gu be guy rogon ni nggu yororiymed. Ya gub adag ni ngam rin’ed e tin nib mat’aw ma bfel’, mi gimed pi’med ni polo’ ko maruwel rok Somol nike puf rogomed.
36 Ra bay l’agruw ni’ ni kan duwgiliy ni ngar mabgolgow miyow duwgiliy ndab kur mabgolgow, ma aram e ba’aray rogon: fa’anra be finey fare mo’on nde fel’ ngak fare pin ni aram rogon, ara ri ba’adag fare mo’on fare pin ma be finey ni susun e ngar mabgolgow, me ere ngar mabgolgow nge yan i aw ngarogon ni ba’adag, ya dariy ban’en nib denen riy.
37 Machane fa’an danir gel nigey ngak be’ nib mo’on ni nge par ni dabi un ko mabgol, ma ke duwgiliy u wan’ ni dabi un ko mabgol, ma be thamiy rok nrayag rok ma ke mu’ i duwgiliy u wan’ e n’en ni nge rin’ me ere bfel’ ndab ra mabgolgow fare pin.
38 Ya re mo’on nra le’ay e re pin ni kanog ni ngar mabgolgow e bfel’ e n’en nike rin’, machane cha’ nde le’ay e re pin ni kanog ni ngar mabgolgow e kabfel’ e n’en nike rin’.
39 Be’ ni bpin nib mabgol e gathi ir e mmil fan ir ngak u n’umngin i nap’an ni kabfos figirngin; machane fa’anra yim’ figirngin, ma aram e ke puf rogon ni nge figirngiy e re mo’on ni ir e ba’adag; machane thangri aw nrogon e mabgol nma tay e pi’in girdi’en Kristus.
40 Machane kabfel’ rogon nra par nib muchugbil. Ireray rogon e leam rog, ma gu be finey ni ku er rogog ni bay fare Kan ni Thothup rok Got rog.