9
Ayuw ni ngan pi’ ngak pi walagey ni girdi’en Kristus
Dariy fan ni nggu weliy ngomed u babyor murung’agen e ayuw ni ngan pi’ nge yan ngak e girdi’ rok Got ni yad bay u Judea. Gu manang ni gimed ba’adag ni ngam pi’ed e ayuw, ma kug weliy murung’agmed ngak e girdi’ nu Macedonia ni gub felan’ ngay nike lungug, “Pi walagdad ni girdi’en Kristus ni yad bay u Greece e ka fa binem e duw nra pired ni kar fal’eged rogorad ni ngar pi’ed e ayuw.” Ma pasigan’ romed ni ngam pi’ed e ayuw e ke pi’ e pasig nga laniyan’ bo’or i yad. Ere chiney e nggu l’oeg e pi cha’ney ni walagdad ni girdi’en Kristus ngarbad, ni aram e tin kug weliyed ni murung’agmed ni gamad ba felan’ ngay u murung’agen e ren’ey e nge yan i m’ug ni gathi kemus nthin; machane nge m’ug nrogon ni gog ni kam fal’eged rogomed ni ngam pi’ed e ayuw. Ya richey me un e girdi’ nu Macedonia ngog nggu bad miyad pir’eg ndawor mu fal’eged rogomed ni ngam pi’ed e ayuw, ma ri gamad ra tamra’ ni fan e kari pagan’mad ngomed, ma kab gel e tamra’ ni gimed ra tay! Aram fan ni kug finey ni bfel’ ni nggog ngak e pi cha’ney ni walagdad ni girdi’en Kristus ngar m’onod rog ngarbad ngomed ngar ngongliyed rogon e n’en ni kamogned ni ngam pi’ed nib tow’ath. Mra gu taw ma kem’ay i ngongliy rogon, ma aram e ra m’ug riy ni ngam pi’ed ban’en ngak boch e girdi’ ni fan e gimed ba’adag, ma gathi kan gelnigey ngomed ni ngam rin’ed.
Dab mpaged talin e re bugithin ni ba’aray: cha’ nra yung e awoch nib lich e bochu’uw e n’en nrayag riy ngak; ma en nra yung e awoch ni pire’, e pire’ e n’en nrayag riy ngak. Ere ra be’ ma nge pi’ ban’en nrogon ni ir e ke duwgiliy u laniyan’, ni dabi kireban’ ngay nike pi’ fa reb e finey ni ban’en nthingari rin’; yi Got e ba t’uf rok e en nma pi’ ban’en u fithik’ e felfelan’. Mi Got e rayag rok ni nge pi’ ngomed e tin ni nge yag ngomed nge pag urngin, ni fan e gubin ngiyal’ ma bay romed urngin e tin ni nge yag ngomed, nike pag urngin ni fan ko tin ni bfel’ e ngongol. Ni bod ni be yog e babyor nib thothup ni be ga’ar:
Ma pi’ ban’en ngak e pi’in gafgow u fithik’ e gol,
ma rogon nga feni gol e dabi m’ay bi’id.
10 Mi Got nma pi’ e awoch ngak e cha’ nma wereg e awoch u milay’ nge ggan ni nge kay e ku bayi pi’ ngomed urngin e awoch ni nge yag ngomed me muruwliy nge tugul, nge yib wom’ngin ni pire’ ni nge yib ko gol ni mu ted. 11 Gubin ngiyal’ ni bayi ta’med ni bfel’ urngin e tin ni bay romed nge yag ni um pi’ed ban’en ni gubin ngiyal’ u fithik’ e gol, ni fan e nge yo’or e girdi’ nra pininged e magaer ngak Got ko tow’ath ni kam pi’ed ngorad. 12 Ya re ayuw ney ni bay mu ngongliyed e gathi kemus ni nge pi’ ngak e girdi’ rok Got e tin nthingari yag ngorad, machane ku errogon ni bayi ayuweg bo’or e girdi’ ngar pininged e magaer ngak Got. 13 Pi’in ni bay mu ayuweged e bay ra felan’gad ni gathi kemus ni bochan e tin ni kam pi’ed ngorad nge boch e girdi’ u fithik’ e gol, machane bay rogned e sorok ngak Got, ya ireyer e mich riy nri gimed ba yul’yul’ ko thin ni bfel’ ni yib rok Kristus ni ir e gimed be weliy. 14 Ma aram e bay ra pi’ed e meybil romed ngak Got ni bochan e kari mu t’ufgad rorad ma bochan e ayuw nike pi’ Got ngomed nike pag rogon. 15 Ere ngad pininged e magaer ngak Got ko tow’ath nike pi’ ngodad ndabiyag puluwon!