10
Moses ni ku ni pi’ ngak fapi Motochiyel bayay
(Exodus 34:1–10)
1 “Me ga’ar SOMOL ngog, ‘Mu th’ab ruw yang i malang ni bod fa galyang ni som’on, ma ga ngongliy ba kahol ni ngan tay ngay. Magab ngog nga daken e burey,
2 nggu yoloy nga daken e n’en ni gu yoloy nga daken fa galyang nem ni mu bilig, ma ga fek ngam tay ngalan e kahol.’
3 “Ere gu ngongliy ba kahol ni ren ni acacia e gu fanay ngay mu gu th’ab ruw yang e malang ni bod fa galyang nem ni som’on, mu gu fek i yan nga daken e burey.
4 Me yoloy SOMOL fa pi thin nga daken ni fa’ani yoloy nga daken fa gal yang ni som’on, ni aram fa Ragag i Motochiyel ni pi’ ngomed ko fa ngiyal’ ni i non u fithik’ e nifiy e rofen ni ba’aram nmu’ulunggad ko fare burey. Me pi’ SOMOL fa gal yang i malang ngog,
5 mu gu cheal nggu log u daken fare burey nga but’. Mu gu tay ni ruw yang ngalan fare kahol ni kug ngongliy ni bod rogon ni yog SOMOL ngog, ni kabay u rom ni ka’aram nap’an.”
(
6 Me chuw piyu Israel ko fapi luwed rok piyu Jaakan, ngranod nga Moserah. Me yim’ Aron ngan k’eyag u rom, me yan Eleazar nib mo’on ni fak nga luwan nge mang prist.
7 Miyad yan u rom nga Gudgodah, miyad yan riy nga Jotbathah, ni gin’em e ba pire’ e lul’ riy.
8 Ngiyal’nem e turguy SOMOL ni pumo’on ko ganong rok Levi e nge milfan fare kahol ko m’ag ngorad, ma ngu’ur pigpiggad ngak ni prist, ma yad e ngu’ur fal’eged wa’athan e girdi’ nga fithingan SOMOL. Pin’ey e ka yad be rin’.
9 Aram fan ni girdi’en e ganong rok Levi e dan pi’ e binaw ngorad ni bod e tin ba’aray e ganong ni kan pi’ e binaw ngorad; birorad e f’oth e ren’en ni ba’aram ni yad e ngu’ur manged prist, ni bod rogon ni yog SOMOL ni Got romed.)
10 “Gu par u daken e burey ni aningeg i ragag e rran nge nep’ ni bod ni gu rin’ ko som’on; ki rung’ag SOMOL e meybil rog e yanem, me magan’ ngay ni dabki thang owchemed.
11 Ma aram me ga’ar ngog, ‘Moses, mu fal’eg rogom ngam pow’iy e pi girdi’ nir ngalan fare nam ni gu michmicheg ngak e pi chitamangirad ni kakrom.’ ”
Tin ba’adag Got ni ngan rin’
12 “Gimed e girdi’ nu Israel, mang e ba’adag SOMOL ni Got romed? I SOMOL e ba’adag ni ngam liyorgad ngak mi gimed falwok rok, me t’uf romed mi gimed pigpig ngak u polo’ i gumircha’med ngu lanin’med,
13 mi gimed tay fapi motochiyel rok u gil’ nge machib rok ni nggu pi’ ngomed e daba’. Mu rin’ed ni aray rogon, mra fel’ e gubin u poluwmed.
14 I SOMOL e mus ko yu thal ni th’abi tolang nga lanelang e pi tharmiy ma bmilfan ngak, ma ku arrogon e fayleng nge gubin ban’en riy.
15 Machane feni t’uf e pi chitamangimed rok SOMOL, ma aram me mel’egmed u fithik’ gubin e girdi’, ke par riy ni aram rogon ni gimed e girdi’ rok.
16 Ere chiney i yan nga m’on e ngu’um folgad rok SOMOL ma ngam paged e gelan’.
17 I SOMOL ni Got romed e ir e pilung ko pi got nge Somol ko pi somol. Ir e ba ga’ ma ba th’abi gel gelngin, ma ir e ngu’un fol rok. Der ma laniyan’ ma der ma fek puluwon e sasaliyab.
18 Ma guy ni nge par ni ngu’un ayuweg e pi’in kanim’ rorad nge pi’in keyim’ figirngirad; ma t’ufeg e milekag ni yad bay u fithik’ e girdi’ rodad mma pi’ ngorad e ggan nge mad.
19 Ere nge t’uf romed e girdi’ u yugu boch e nam ni bay u fithik’med, ya um pired u Egypt ni gimed e milekag.
20 Ngu’um pired ni bay madgun SOMOL ni Got romed u wun’med ma kemus ni ir e ngu’um liyorgad ngak. Ma gimed be par ni gimed ba yul’yul’ ngak ma kemus ni fithingan e ngu’um micheged bbugithin ngay.
21 Um pininged e sorok ngak, ya ir e Got romed ma kam guyed nga owchemed e pi maang’ang ni un ngat ngay ni rin’ ni fan ngomed.
22 Fa’ani yan e pi chitamangimed ni kakrom nga Egypt ma kemus ni yad medlip i ragag u gubin. Machane SOMOL ni Got romed e ke yo’or nagmed kam pire’gad ni bod feni yo’or e t’uf u lanelang.