12
Ta’are Tagil’ e Liyor
1 “Mu telmed nga urngin e motochiyel ni ngam folgad riy u n’umngin nap’an ni ngu’um pired u lan e re nam ni SOMOL ni Got rok pi ga’ romed ni kakrom e nge pi’ ngomed.
2 Re nam nem ni ngam koled, e ngam kireb niged e yungi n’en nma yan e girdi’ ngay ngu’ur meybilgad ngak e pi got rorad, ni yungi n’em e bay u daken e pi burey nib tolang, nge yochi burey, nge tanggin yu ke gek’iy nib yo’or yuwan.
3 Mbuthuged e pi altar rorad nge malang ni kar ubunged ke tolang kar ted nib machmach. Mu urfiyed e yu ley i gek’iy ni kar suweged ngalang ni fan ko got ni bpin rorad ni Asherah fithingan, mi gimed th’eth’ab e pi liyos rorad nge par ndabkiyag ni ngan meybil ngay ko yungi n’em ni bay riy.
4 “Dab mu liyorgad ngak SOMOL ni Got romed ni bod kanawo’en ni be tay e picha’ nem fan e tirorad e kan.
5 Gi nam ni bayi par e pi ganong romed riy e bayi turguy SOMOL bang riy ni ir e ngu’um mu’ulunggad ngay ngam ted fan SOMOL mi gimed meybil ngak.
6 U rom e ngam pi’ed e pi gamanman ni maligach riy ni ngan urfiy nge yugu boch e maligach, nge ragag e pasent ko pin’en nike yag ngomed, nge pin’en ni ngam pi’ed ngak SOMOL, nge pin’en ni kam micheged ni ngam pi’ed ngak, nge pin’en ni kam turguyed u wun’med ni ngam pi’ed ngak, nge tin som’on i fak e pi garbaw nge pi saf romed.
7 U rom u p’eowchen SOMOL ni Got romed, ni ir e be fal’eg wa’athmed, e gimed nge girdi’en e tabnaw romed e ngam abichgad nga mu felfelan’gad ko tin bfel’ ni kam muruwliyed.
8 “Ra yan i taw ko ngiyal’nem ma dab kum ngongolgad ni bod ni um rin’ed. Kafaram i yib ke mada’ ko chiney mra bigimed ma tin ba’adag ni ngi i rin’ e be rin’,
9 ya dawor mmarod ngalan fare nam ni SOMOL ni Got romed e nge pi’ ngomed, ni aram e gin nrayag ni ngam pired riy u fithik’ e gapas.
10 Nap’an ni gimed ra th’ab e lul’ ni Jordan nga baraba’ ma bayi pagmed SOMOL ngam marod ngalan e re nam nem ngam pired riy. Bayi yororiymed rok urngin e pi to’ogor romed, ya nge yag ni mu pired u fithik’ e gapas.
11 I SOMOL e bayi turguy bang ni aram e gin ni ngu’um liyorgad riy ngak, mu rom e ngam feked i yib ngak urngin ban’en ni kugog ngomed; pi maligach romed ni ngan urfiy nge yugu boch e maligach, nge ragag e pasent ko pin’en ke yag ngomed, nge pi tow’ath nib mal’eag ni kam micheged ngak SOMOL ni ngam pi’ed ngak.
12 Ma aram mu um felfelan’gad u p’eowchen SOMOL, ni gimed nge pifakmed, nge pi tapigpig romed, nge pi Levite ni yad be par u lan e pi binaw romed. Dab mpaged talin ni pi Levite e gathi bay ni pi’ e binaw ngorad ngar tafned.
13 Dab mu og niged e pi maligach romed ko gin gimed e kam turguyed;
14 thingar mu og niged ko gin ke turguy SOMOL u lan tafen reb e pi ganong romed. Kemus nu rom e ngam pi’ed e pi maligach ni mo’oruf romed riy mi gimed rin’ urngin e tin kugog ngomed ni ngam rin’ed.
15 “Machane rayag ni ngu’um li’ed e gamanman romed ngam longuyed ko gin’en ni gimed be par riy. Rayag ni ngam longuyed urngin e tin nra pi’ SOMOL ngomed. Gimed gubin ndemturug ko gimed mmachalbog fa dangay nrogon ko motochiyel mrayag ni ngam longuyed, ni bod rogon ni gimed ma longuy e ufin ko gamanman ni deer nge antelope.
16 Machane thingar dab mu ked e racha’ ko fa pi gamanman. Thingar mu pu’oged nga daken e but’ ni bod rogon e ran.
17 Urngin e pin’en ni kam pi’ed ngak SOMOL e thingar dab mu ked ko gin ni gimed be par riy, ni aram e ragag e pasent ko grain romed, nge wayin, nge gapgep ko olive, nge bin som’on i fak e garbaw nge saf romed, ara pin’en ni kam micheged ngak SOMOL ni ngam pi’ed ngak, fa pin’en ni kam turguyed u wun’med ni ngam pi’ed ngak, ara yugu boch e maligach.
18 Gimed nge pifakmed nge pi tapigpig romed nge pi Levite ni yad be par u lan e yochi binaw romed e kemus nu p’eowchen SOMOL ni Got romed e ngam ked e pi maligach ney riy, u lan fa ta’gin’en ni tagil’ e liyor nike turguy SOMOL ni Got romed. Mu um felfelan’gad ni bochan urngin e pin’en ni kam mu’ niged.
19 Dab mpaged e pi Levite ni nge dab mpi’ed ngorad e f’oth rorad u n’umngin nap’an ni gimed be par u lan e nam romed.
20 “Fa’anra ga’nag SOMOL ni Got romed e gin tafenmed ni bod rogon nike micheg, mrayag ni ngam ked e ufin ko ngiyal’ ni gimed ba’adag.
21 Ma fa’anra kayigi palog fa ta’gin’en ni tagil’ e liyor, ma aram e demturug e ngiyal’ ni gimed ba’adag, mrayag ni mu li’ed reb e garbaw ara saf nike pi’ SOMOL ngomed, mrayag ni mu koyed e ufin riy u tabnaw, ni bod ni kugog ngomed.
22 Demturug be’ nib machalbog fa de machalbog, mrayag ni nge kay fare ufin ni bod rogon nra kay e ufin ko gamanman ni deer ara antelope.
23 Kemus ndab mu ked e racha’ ko ngiyal’ ni gimed ra kay e ufin ni bochan e yafos e bay u fithik’ e racha’, ma thingar dab mu koyed e yafos ngam chagiyed ko ufin.
24 Dab mu ked e racha’, ya ngam pu’oged nga daken e but’ ni bod rogon e ran.
25 Fa’an gimed ra fol ko ran’ey nike yog, ma gimed ra fel’ u wan’ SOMOL, ma aram e gimed nge pi’in owchamed e ra fel’ gubin ban’en u puluwmed.
26 Mu feked ko ta’gin’en ni tagil’ e liyor e pi maligach nge pi tow’ath ni ka mu micheged ngak SOMOL.
27 U rom e ngam pi’ed e maligach riy ni ngan urfiy u daken e altar rok SOMOL nge m’ay, mu kum pi’ed fapi maligach ni fa’an ka mu longuyed e ufin riy mi gimed pu’og e racha’ riy nga daken e altar.
28 Ngar mu yul’yul’gad ngu’um folgad u urngin e tin kugog ngomed ni ngam rin’ed, ma aram e gimed nge pi’in owchamed e gubin ban’en ni bayi fel’ u puluwmed ndariy n’umngin nap’an, ni bochan e gimed be rin’ e tin ba mat’aw nge tin bfel’ u wan’ SOMOL ni Got romed.
Ginaeng ni fan ngak e en be pigpig ngak yugu boch e got
29 “SOMOL ni Got romed e bayi thirif u but’ e pi nam ko ngiyal’ ni ngam marod ngalan e nam rorad ngam koled, nge mang gimed e mu tafned ngam pired riy.
30 Ma tomuren nike thirif SOMOL e pi nam nem u but’ ma ngam guyed rogon ndab mu uned nga yalen e pi taliw rorad, ya ra yib riy’en ngomed. Dab mu guyed rogon ni ngam nanged rogon ni yad ma tay fan e tirorad e got, ya ri mu’uned u rogon ni yad be tay fan e tirorad e kan.
31 Dab um liyorgad ku SOMOL ni Got romed ni bod kanawo’en ni yad be tayfan e tirorad e kan, ya rogon ni yad ma tay fan e tirorad e got e yad ma rin’ urngin e pin’en nib sunsonogor nri dabun SOMOL. Mus nga pifakrad ni yad ma urfiy u mit e nifiy u daken e pi altar rorad ngar pi’ed ni maligach.
32 “Mu rin’ed urngin e tin kugog ngomed ni ngam rin’ed; ndab mon’ed ban’en ngay ara mu chuweged reb riy.