21
Mthang pogofan ni dannang ko mini’ e cham
“Fa’anra chey nni pir’eg be’ ni kan li’ ke yim’ u daken bang i flang ko fare nam ni bayi pi’ SOMOL ni Got romed ngomed, ma dan nang ko mini’ e ke li’ ke yim’. Ma aram e pi tayugang’ nge pi tapuf oloboch romed e nga ranod ra foleged palogen e gin nni pirieg fare yam’ riy ko yochi binaw nib chugur ngay. Ma pi tayugang’ ko fare binaw ni th’abi chugur ko gin nni pir’eg fare yam’ riy e ngar feked ba fak e garbaw ndawor ni maruwel ngak. Ngar feked i yan nga pe’ening nga charen e l’ul ni dar ma m’ay e ran riy ma but’an e dawor ni gi’ ma dawor ni woldug riy bi’id, miyad t’ar k’angan fare garbaw u rom. Ma fapi prist ni pifak Levi e ku yad ra un ngaram, ni bochan e yad ma turguy urngin e yupa’ i oloboch nni rin’ u fithik’ e yargel. I SOMOL ni Got romed e ke mel’egrad ni ngar pigpiggad ngak ma yad be maybilnag e girdi’ nga fithingan ni nge fal’eg wa’atharad. Ma urngin e tayugang’ nu lan fare binaw nth’abi chugur ko fa gin nni pir’eg fare mo’on riy ni kan li’ ke yim’ e ngar maluk niged rifrifen pa’rad nga daken fare garbaw ni be lungurad, ‘Gathi gamad e gu li’ed fare mo’on nge yim’, ma ku dag nanged ko mini’ e li’. SOMOL, mu n’agfan rok e girdi’ rom nu Israel, ni fa’ani gur e mu chowegrad u Egypt. Mu n’agfan romad ma dab mu pag nge par e kireb u dakenmad ni fan ngak facha’ ni kan thang e fan rok ndariy ban’en nike bucheg.’ Ma aram e gimed ra rin’ nrogon nike yog SOMOL, mra chuw e kireb u dakenmed ko fare mathang pogofan.
Pi ppin ni kalbus u tan e mael
10 “Nap’an ni gimed ra yan ko mael ngak e to’ogor romed me pi’rad SOMOL ni Got romed ngalan pa’med mi gimed fekrad ni kalbus, 11 mra guy bigimed reb e bpin u fithikrad nib pidorang nib magan’ ngak ni ba’adag ni nge le’engiy. 12 Ma nge fek nga tafen, ma re bpin nem e nge puy piyan lolugen nge m’ay, me th’ab t’ingun ni gubin, 13 me thilyeg e mad rok. Me par u tabnaw rom i gur fare mo’on nge mowawnag e gal labthir rok nreb e pul, mfin mu le’engiy. 14 Ma fa’anra bingyal’ ni kam dabuy fare bpin, ma ga pag nge yan nike puf mat’wun. Dabiyag ni ngam pi’ nchuway’ ni bod ba sib nge yag e salpiy riy ngom, ni bochan e mu towasar ngak ngam pirew.
Marung’agen e gayog ko bin nganni’ i fakay ni pumo’on
15 “Fa’anra be’ nib mo’on ni l’agruw e ppin ni le’engin, nra bagyow make fakay e pagel, ma bagyow e ba’adag ma bagyow e danga’. Ma bin nganni’ i fak ni pumo’on e gathi fak fare pin ni ba’adag. 16 Nap’an nra leamnag fare pumo’on rogon ni nge f’oth e binaw rok u pa’ pifak, ma dabi laniyan’ u rogon e f’oth ni nge tay nge pi’ e f’oth rok e bin nganni’ u pifak ni pumo’on ko bin e pagel ni fak fare pin ni ir e ba’adag. 17 Fare pumo’on e nge pi’ ngak e bin nganni’ i fak ni pumo’on l’agruw e f’oth ko gayog rok, ni yug aram rogon ni gathi ireram e bin fak fare pin ni ba’adag. Thangri fel’ u wan’ fare matam e bin nganni’ i fak nib pumo’on nge pi’ ngak e f’oth rok nrogon nib mat’aw ko yalen.
Murung’agen fakey ni pumo’on ni dar fol
18 “Fa’anra bay be’ ni pumo’on ni bay ba pagel ni fak nib gelan’ ma ba tatogopluw, ma der ma fol ko gal labthir rok, ni dariy fan ni yow ma gechignag. 19 Ma aram e fa gal labthir e ngar fekew fare pagel nga mit fa pi’in yad ma yog e thin ko fare binaw nma par riy, ngan pufthinnag. 20 Nge lungurow ngorad, ‘Re pagel ni fakmow ney e ba gelan’ mab tatogopluw, ma dar ma fol romow; ba ta adbey e salpiy mab tachingaw’.’ 21 Ma aram e gubin e pumo’on u lan fare binaw e ngar malang niged fare pagel nge yim’, ya nge chuw e mitney e kireb u fithikmed. Ma urngin e girdi’ nu Israel ni yad ra rung’ag e tin ke buch, miyad ra rus.
Ku boch e motochiyel
22 “Fa’anra kan li’ be’ nib mo’on ke yim’ ni bochan e ke th’ab e motochiyel, ma kan tining ngalang ngab ley i ren, 23 ma dab ni pag u rom nge af nga reb e rran. Thingar ni k’eyag ni ka rofen nem, ni bochan e ba yam’ ni kan tining ngalang ko ren e ra fek i yib nga daken e binaw e buchwa’athan rok Got. Ere mu k’eyeged fare yam’, ya nge dab mu ta’ay niged fare nam ni bayi pi’ SOMOL ni Got romed ngomed.+
+ 21:23 Gal 3:13