23
Pi’in ngan chuwegrad u fithik’ girdi’en SOMOL
1 “Dariy be’ nib mo’on ni kan luf nuni ran ara kan th’ab downgin ni pumo’on ni yira uneg nga fithik’ e girdi’ rok SOMOL.
2 “Dariy be’ nni diyennag u muchugbil nrayag ni mang reb i chon e tirok SOMOL e girdi’. Ni mus ngak e pi’in owchen facha’ nge mada’ ko bin ragag e mfen, ma ku dabi yag ni yad ra mang chon e tirok SOMOL e girdi’.
3 “Dariy reb e girdi’ nu Ammon fa Moab fa reb e pi’in owcharad i yan nge mada’ ko bin ragag e mfen nra mang reb i chon e girdi’ rok SOMOL.
4 Ni bochan e pi girdi’ ney e dar pi’ed e ggan nge ran ngomed ko fare ngiyal’ i n’em ni gimed be yib i yib nga wuru’ yu Egypt. Ma ku bochan e ra pi’ed puluwon Balaam, nib mo’on ni fak Beor ni be’ ko fare binaw nu Pethor u Mesopotamia, ni nge bucheg wa’athmed.
5 Machane SOMOL ni Got romed e de motoyil ngak Balaam. Ya n’en ni rin’ e thilyeg e buchwa’athan nge ngal’ ni fel’wa’athan ni bochan e gimed ba t’uf rok.
6 N’umngin nap’an ni gimed be par ni gimed reb e nam, ma rdariy bangiyal’ ni ngam pi’ed e ayuw ngak e gali nam ney ara mu rin’en ban’en ni nge fel’ rogorad riy.
7 “Dab mu dabuyed e pi Edomite; ya gimed girdi’. Ma dab mu dabuyed e pi Egyptian; ya immoy bangiyal’ ni um pired u daken e but’ rorad.
8 Pi’in owcharad e rayag ni ngar manged boch girdi’en SOMOL ko bin dalip e mfen i yan ngaram.
Gin be par e salthaw riy ni yima kol falen
9 “Ra gimed bay u gil’ e mael u nap’an e mael, ma ngam paged i rin’ e tin nra alit nagmed nrogon ko yalen.
10 Fa’anra ta’ay be’ nib mo’on ni bochan e ke lik’ay nnep’ me garda’, ma nge yan nga wuru’ e gin be par e salthaw riy nge par u rom.
11 Me yan i blayal’ me maluk, me aw e yal’ me sul bayay ko gin ni yibe par riy.
12 “Mi gimed tay bang u wuru’ e gin ni gimed be par riy ni ngu’um sorgad ngay ko ngiyal’ ni ngam pithged rogmed.
13 Ra be’ ma nge uneg baley i gek’iy ko pi talin e maruwel rok ngi i fek. Ya nge yan kengnam ma ga ker e but’ ko fare ley i gek’iy ngam tharey.
14 Mu ted e gin ni gimed be par riy nib tabgul, ni bochan e bay SOMOL ni Got romed u lan e gin ni gimed be par riy ni ngi i ayuwegmed me pi’ e pi to’ogor romed ngalan pa’med. Dab mu rin’ed ban’en nib sonogor ya ra k’aring SOMOL nge pi’ keru’ ngomed.
Yug boch e motochiyel
15 “Fa’anra mil ba sib ko master rok nge yib ngomed ni ngam ayuweged, ma dab mu l’oged nge sul.
16 Rayag ni mel’eg reb e yochi binaw romed nge par riy, ma dab mu gafgow niged.
17 “Dariy be’ nib mo’on fa be’ ni bpin nu Israel ni ngi i chuway’ ngak u tempel.
18 Ma ku errogon e salpiy ni yag ko mitney e ngongol ni dab ni fek i yib ngalan e naun rok SOMOL ni Got romed, ni fan e ngam pi’ed ni puluwon ban’en ni kam micheged u fithingan Got. Ya SOMOL e fanenikan e pi’in yad ma pi’rad nchuway’ u tempel.
19 “Nap’an ni gimed ra pi’ e salpiy fa ggan ara yug ban’en ngak be’ ni ku reb e Israel, ma dab mun’ed e win romed ngay.
20 Rayag ni nga mun’ed e win romed ko tin gimed be pi’ ngak yug boch e girdi’ nu reb e nam, machane dab mu rin’ed ngak reb e girdi’ ni ku reb e Israel. Umfolgad ko re gafal ney, me fal’eg SOMOL ni Got romed wa’athan urngin e tin gimed ra ngongliy u lan fare nam ni bayi pi’ ngomed ni ngam tafned.
21 “Nap’an ni gimed ra mownag ban’en nga fithingan SOMOL ni Got romed, ma dab mmon’ed yaran e tin ka mu micheged ni ngam rin’ed. I SOMOL e bayi tay ngan’ e tin ka mu mow niged, ma ba denen ni fa’anra dab mu ted u gil’.
22 De denen ni fa’anra dab mu mow niged ban’en nga fithingan SOMOL,
23 machane ngam kol’ayuwgad ni dabisiy ni ngam rin’ed e n’en nike thay u langmed, ya gimed e lanin’med ni ngam mow niged u fithingan SOMOL ni Got romed nu langmed e mu micheged riy.
24 “Nap’an nra gimed be yan u ba kanawo’ ni yan u daken e milay’ ni grape rok be’, mrayag ni ngam ked urngin i wom’ngin e woldug ni grape ni gimed ba’adag, machane dab mu afed boch ngalan ban’en ngam feked.
25 Nap’an nra gimed be yan u ba pa’ i kanawo’ ni yan u daken e milay’ ko grain rok be’, mrayag ni ngam ked urngin wom’ngin e grain nrayag ni ngam puged nga pa’med, machane dab mu th’abed wom’ngin e grain ko kamma.