30
Rogon e sul nga rogon nge tow’ath
1 “Kug pagfan ngomed ni gimed e ngam duwgiliyed ko fel’wa’athan fa buchwa’athan e nge yib ngomed. Nap’an nra yib e pin’ey ngomed ni gimed be par ko pi nam i yan ni SOMOL ni Got romed e ke weregmed riy, ma nge yib ngan’med e pi thin ney ni kugog.
2 Fa’an gimed ra sul, nge pi’in owchamed, ngak SOMOL u polo’ i lanin’med ni ngam folgad ko tin ni yog ni ir e gu be weliy ngomed e daba’,
3 ma aram e SOMOL ni Got romed e bayi runguymed, bayi fulwegmed ngam chuwgad ko fapi nam ni weregmed riy, me gagiyeg nagmed nge fel’ rogomed bayay.
4 Ni yug aram rogon ni weregmed ko yungin th’abi orel u fayleng, me SOMOL ni Got romed e bayi kunuymed nge fulwegmed,
5 ngam tafnayed e re nam ney ni i par pi chitamangimed riy kakrom. Ma bayi gagiyeg nagmed nge gel e fel’ rogon romed ngam yo’orgad ngak pi chitamangimed.
6 SOMOL ni Got romed e bay i gagiyegnag lanin’med nge laniyan’ e pi’in ni owchemed ngu’um folgad, ya ngu’um pired ni kari t’uf SOMOL romed u polo’ i gum’ircha’med ngu polo’ i lanin’med nge n’uw nap’med ni mu pired.
7 Bayi cheleg gubin e pi buchwa’athan ney nge aw ngak e pi to’ogor romed, ni pi’in yad be fananikaymed ni yad be gafgow nagmed,
8 ma aram e bay mu folgad rok bayay mi gimed tay u gil e tin ni taychilen ni irera’ ni gu be yog ngomed e daba’.
9 I SOMOL e bayi fal’eg rogmed ko urngin e pin’en ni gimed ra muruwliy, bayi yo’or pifakmed, me yo’or e garbaw romed, me pire’ e ggan ni bay yib ko woldug romed. Ra falan’ ngay ni nge fal’eg rogomed ni bod ni fal’eg rogon e pi chitamangimed kakrom nib falan’ ngay,
10 machane dabisiy ni ngu’um folgad rok mu um folgad u urngin fapi motochiyel rok ni ka ni yoloy ngalan e re ke babyor ney ni bay riy urngin e tin be fil ngomed. Dabisiy ni ngam chelgad ngak u polo’ i gum’ircha’med ngu polo’ i lanin’med.
11 “Re motochiyel ney ni nggu pi’ ngomed e daba’ e gathi ban’en nib mo’maw’ ara ban’en ni dab mu dadgad ngay.
12 Gathi ban’en ni bay u lanelang. Dabiyag ni nge lungumed, ‘I mini’ e nge yan nga lanelang nge fek ngodad nga but’, nge yag nda rung’aged ma gadad fol riy?’
13 Ma ku gathi bay u bang ni nge chur be’ u maday nge yan i fek. Dabiyag ni nge lungumed, ‘I mini’ e nge chur u maday nge yan i fek ngodad ngad rung’aged ma gadad fol riy?’
14 Danga’, ya fare thin e rib chugur ngomed; bay u langmed ma bay u lanin’med, ere rayag ni ngam folgad riy.
15 “Daba’ e kug pagfan ngomed ni nge mang gimed e mu duwgiliyed ko fel’ fa kireb, ara yafos fa yam’.
16 Fa’anra um folgad ko tin keyog SOMOL ni Got romed ngomed ni ir e kug weliy ngomed e daba’, fa’anra t’uf SOMOL romed ma gimed be fol rok nge urngin e pi motochiyel rok ma aram e ra i fel’ rogomed mi gimed mang ba nam ni pire’ e girdi’ riy. I SOMOL ni Got romed e bay i ayuwegmed u lan e re nam ni ngam marod ngay ngam pired riy.
17 Machane fa’anra dab mu folgad ma dab mu motoyilgad, ma bay ni waliymed nga orel ngu’um tedfan yug boch e kan,
18 gu be micheg ngomed u roy e chiney nib muduwgil ni yira thirifmed u but’, ma dabi n’uw nap’med u lan e re nam nem ni bay nga ba’nem e Jordan, ni bay mmarod ni ngam pired riy.
19 Kug pining e tharmiy nge fayleng ni ngar mangew mich romed e daba’, ya kug tay nga puluwmed e yafos nge yam’, fel’wa’athan nge buchwa’athan; ni gimed e ngam mel’eged. Mmileg’ed e yafos.
20 Nge t’uf romed SOMOL ni Got romed, nga um folgad rok ma gimed be par ni gimed ba yul’yul’ ngak, ni fan e gimed nge pi’in owchemed e nge yag ni mu pired nib n’uw nap’med u lan e re nam ni ba’aram ni micheg ngak pi chitamangimed ni kakrom ni bayi pi’ ngorad, ni aram Abraham nge Isak nge Jakob.”