7
Girdi’en SOMOL
(Exodus 34:11–16)
1 “SOMOL ni Got romed e bayi fekmed i yan ngalan fare nam ni ngam pired riy, me tuluf bo’or e nam ni bay riy ngar chuwgad u lan fare nam ni aram e pi Hittite, Girgashite, Amorite, Kanaanite, Perizzite, Hivite, nge pi Jebusite, ni medlip i nam ni yad ba ga’ ma yad ba gel ngomed.
2 Ma nap’an nra pi’rad SOMOL ni Got romed nga pa’med ngam gelgad ngorad ma thingar mu thanged owcherad ni yad gubin. Dab mu ngongliyed e m’ag u thilmed ara mu runguyed yad.
3 Dab mu mabgolgad ngorad; dab mu pi’ed pifakmed ngak pi fakrad ngar mabgolgad,
4 ya yad ra pingeg pifakmed nge dab ku ra folgad rok SOMOL miyad tay fan yugu boch e kan, ma aram e ra damumuw SOMOL ngomed nge thang owchemed nib machreg.
5 Are mu buthuged e pi altar rorad, mi gimed bilbilig e pi malang ni kar ubunged ngalang kar ted nib machmach, mi gimed th’ab nga but’ e pi pow ko fare got ni bpin ni Asherah, mi gimed urfiy e pi liyos rorad.
6 Ngam rin’ed ni era’ rogon ya gimed girdi’en SOMOL ni ir e Got romed. Ke mel’egmed u fithik’ girdi’en urngin e pi nam nu fayleng ni ngam manged girdi’en.
7 “I SOMOL e gathi mu t’ufgad rok me mel’egmed ni bochan e gimed pire’ ngak girdi’en yugu boch e nam; ya gimed e umoyed ni gimed bochu’uw.
8 Machane gimed ba t’uf rok SOMOL ma ba’adag ni nge tay u gil’ e tin ni micheg ngak pi chitamangimed ni kakrom. Aram fan ni maruwel nga gelngin nib gel nge chuwegmed u lan yu Egypt ni um pired riy ni gimed e sib rok fare pilung nu Egypt.
9 Ri dab mpaged talin ni SOMOL ni Got romed e kemus ni ir e Got, ma rib yul’yul’. Bayi tay u gil’ fare m’ag nike ngongliy u thilmed nge Ir, mi i dag ngak reb e biyu e mfen e t’ufeg rok ni dabimus, ni pi’in ur pired nib t’uf SOMOL rorad ma yad be fol ko tin keyog ni ngu’ur rin’ed,
10 machane dabi tuntun ni nge gechignag e pi’in ni dubrad daken. Gathi bayi sowath ni nge rin’, ya ra rin’ nib machreg.
11 Ere um folgad ko tin kan fil ngomed; um folgad u urngin e pi motochiyel ni kug pi’ ngomed e daba’.
Fel’ rogon nma yib ko fol
(Deuteronomy 28:1–14)
12 “Fa’anra um motoyilgad ko pi motochiyel ney ngu’um yul’yul’gad ngay, me SOMOL ni Got romed e bayi tay u gil’ fare m’ag nike ngongliy u thilmed nge ir, mi i dag ngomed ni yig gimed be par ni gimed ba t’uf rok ni bod rogon nike micheg ngak pi chitamangimed ni kakrom.
13 Bay mu pired ni gimed ba t’uf rok mi i fal’eg wa’athmed, ma be yo’ornagmed, ma be yo’or pifakmed; me fal’eg rogon e woldug romed nge yib e ggan ngay ni pire’, ni grain nge wayin nge gapgep ni olive, me pi’ e garbaw nge saf ngomed ni pire’. Bayi pi’ ngomed urngin e pi fel’ rogon ney u lan e re nam nem ni micheg ngak pi chitamangimed ni kakrom ni bayi pi’ ngomed.
14 Dariy girdi’en reb e nam u fayleng ni bay i fal’eg rogorad ni bod gimed. Dariy bigimed ara garbaw romed nra par ndabiyag ni nge diyen.
15 I SOMOL e bay i yororiymed u urngin mit e m’ar. Dabi girengiy nga dakenmed reb fapi liliy nib kireb ni i yib ngomed u Egypt, ya pi to’ogor romed e ra girengiy nga dakenrad.
16 Mu thanged owchen urngin e girdi’ ko pi nam ni SOMOL ni Got romed e bayi pi’ nga pa’med, ma dab mu runguyed yad. Dab mu ted fan ara mu meybilgad ko pi got rorad. Ya gimed ra rin’ ma ra yib riy’en ngomed.
17 “Dabi lungumed u wun’med, ‘Girdi’ ko pi nam ney e yad bo’or ngodad. Ere uw rogon ni ngad tulufed yad ngar chuwgad?’
18 Dab mu rusgad ngorad, ma dab mpaged talin e n’en ni rin’ SOMOL ni Got romed ngak fare pilung nu Egypt nge girdi’en e nam rok.
19 Mu leam niged fapi gafgow nib gel ni mu guyed nga owchemed, nge fapi maang’ang nge fa pin’en ni un ngat ngay, nge gelngin SOMOL ni Got romed nib gel ni ir e maruwel ngay nge chuwegmed u Egypt. Bayi thang owchen urngin e girdi’ ni gimed be rus ngorad e chiney ni bod ni thang owchen piyu Egypt.
20 I SOMOL ni Got romed e ra k’aring e marus ngorad nib gel, me thang owchen e pi’in yad ra thay ngar mithgad.
21 Dab mu rusgad ngorad, ya SOMOL ni Got romed e bay romed; ya ir ba Got nib sorok me ir e ngan rus ngak.
22 I SOMOL ni Got romed e bay i chuweg girdi’en e pi nam u m’on romed ni be boech-mboechnag; gathi bay mu thanged owcherad ta’ab yay, ya ra yo’or e gamanman ni malboch ngar gafgow niged gimed.
23 SOMOL e bayi pi’ e pi to’ogor romed nga pa’med me gagiyeg nagrad ngar rusgad nge yan i mada’ ko ngiyal’ ni kam thanged owcherad.
24 Bayi pi’ e pi pilung rorad nga pa’med ma bay mu thanged e pogofan rorad nge dab kun leam nagrad. Dariy be’ nrayag rok ni nge talegmed, ya bay mu thanged owcherad ni yad gubin.
25 Mu urfiyed e pi liyos ni ya’an fapi kan rorad. Dab mu chogow niged e silber nge gol ni kan tay ko pi liyos nem, ma dab mu feked ni ngam faned, ya fa’an gimed ra rin’, ma ra yib riy’en ngomed. Ya SOMOL e dabun ni nge tay e girdi’ fan e liyos fa ra meybilgad ngay.
26 Ri dab mfeked reb e pi liyos nem nga naun romed; ya gimed ra rin’ ma buch wa’athan ni yib ngorad e ku ra yib ngomed. Thingar mu fanenikayed e pi liyos nem me par ni bogi ban’en ndariy fan u wun’med, ya ke bucheg SOMOL wa’athrad.